Yeremia 50:1-46
50 Aya e mashiwi ayo Yehova asosele pali Babiloni,+ pa calo ca bena Kaldi,+ ukupitila muli Yeremia kasesema:
2 “Bilisheni mu nko no kusabankanya.+ Kabili imyeni icishibilo;+ cisabankanyeni. Mwifisa nangu cimo. Soseni amuti, ‘Babiloni napokwa.+ Bele* naseebana.+ Merodaki ali no mwenso. Ifimpashanya fyakwe nafilengwa insoni.+ Ifimpashanya fyakwe ifya bunani fili no mwenso.’
3 Pantu nakwisa uluko lwa kumulwisha ukufuma ku kapinda ka ku kuso.+ Luko ululenga icalo cakwe ukuba ica kupapa, ica kuti mwashala fye umwabula uwa kwikalamo.+ Abantunse ne nama nafifulumuka,+ nabaya.”+
4 “Mu nshiku shilya na mu nshita ilya,”+ e fyasosa Yehova, “abana ba kwa Israele, pamo na bana ba kwa Yuda, bakesa.+ Kabili bakesa balelila,+ no kufwaya Yehova Lesa wabo.+
5 Bakalaipusha inshila ya ku Sione, ninshi nabalosha ifinso fyabo ku Sione,+ abati, ‘Natuleya, no kuilunda kuli Yehova mu cipangano ca muyayaya icishakalabwe.’+
6 Abantu bandi bali ngo mukuni wa mpaanga ishileloba.+ Bakacema babo babalenga ukulubanta.+ Babatwele pa mpili.+ Balebalenga ukulubanta ukufuma pa lupili no kuya ku kapili. Balilaba ne cifulo cabo ica kutuushishapo.+
7 Bonse ababasanga balabepaya,+ na balwani babo baleti,+ ‘Tatwakabe no mulandu,+ pantu balibembukile Yehova, umwaikala ubulungami+ ne subilo lya fikolwe fyabo,+ Yehova.’”
8 “Fulumukeni muli Babiloni, no kufuma mu calo ca bena Kaldi,+ no kuba nga basawe abaletungulula impaanga.+
9 Pantu moneni, ndeimya no kuleta pali Babiloni ibumba lya nko ishikalamba ukufuma ku calo ca ku kapinda ka ku kuso,+ kabili shikaiteyanya ukumulwisha.+ Kabili kulya e ko bakamupoka.+ Imifwi yabo yaba nge ya mpalume iilenga abafyashi ukufwilwa abana, impalume iishibwelelamo ukwabula ukucitapo akantu.+
10 Kabili icalo ca bena Kaldi cikapokololwa.+ Na bonse abakacipokolola bakasekelamo,”+ e fyasosa Yehova.
11 “Pantu mwalesekelela,+ kabili mwalesamwa pa kusansa ubupyani bwandi.+ Pantu mwaletolauka ngo mwana wa ng’ombe mu mulemfwe uuteku+ kabili mwalelila nga bakabalwe.+
12 Nyinenwe naseebana nga nshi.+ Uwamufyele naumfwa insoni.+ Moneni! E wacepesha mu nko, ali fyicalo ca cilala, kabili iciswebebe.+
13 Pa mulandu wa bukali bwa kwa Yehova takekalwemo nakalya,+ kabili akashala fye icibolya konse.+ Kabili uwapita mupepi na Babiloni, akalolesha no kupapa no kulisha umunsoli pa mulandu wa finkunka fyakwe fyonse.+
14 “Iteyanyeni ukulwisha Babiloni no kumushinguluka,+ bonse mwe baishiba ukubomfya ubuta.+ Mulaseni.+ Mwishako umufwi nangu umo, pantu abembukile Yehova.+
15 Pundeni ukupunda kwa nkondo konse konse.+ Babiloni nacimba.+ Inceshi shakwe nashiwa. Amalinga yakwe nayabongololwa.+ Pantu cilandushi ca kwa Yehova.+ Mulandule pa fyo amucitile. Ifyo acitile, e fyo na imwe mumucite.+
16 Onauleni katanda wa mbuto wa mu Babiloni,+ no wikata icikwakwa mu nshita ya kulobolola. Pa mulandu wa lupanga ulukali, umuntu onse akalukila ku bantu bakwe, kabili bakafulumukila cila muntu ku calo cakwe.+
17 “Abena Israele bali nge mpaanga ishasalangana.+ Inkalamo e shibapashile.+ Imfumu ya ku Asiria e yabaliilepo ukubalya,+ na Nebukadresari imfumu ya ku Babiloni e walekeleshe ukukolokota amafupa yabo.+
18 E ico Yehova wa mabumba, Lesa wa kwa Israele, atila, ‘Moneni, ndi no kukanda imfumu ya ku Babiloni ne calo ca iko filya fine nakandile imfumu ya ku Asiria.+
19 Kabili nkabwesha abena Israele ku calo cabo ica mulemfwe,+ na bo bakalya umulemfwe mu Karmele+ na mu Bashani;+ kabili bakekuta mu calo ca mpili ica kwa Efraimu+ ne ca Gileadi.’”+
20 “Kabili mu nshiku shilya na mu nshita ilya,”+ e fyasosa Yehova, “kukaba ukufwaya ifilubo fya bena Israele,+ lelo tafyakabepo; ne membu sha bena Yuda,+ lelo tashakasangwe, pantu nkeleela abo nkashapo.”+
21 “Kalwisheni icalo ca Merataimu, kalwisheni+ na bekashi ba ku Pekode.+ Bepayauleni no kubonaula,” e fyasosa Yehova, “kabili citeni ukulingana ne fyo namweba.+
22 Kuli icongo ca nkondo mu calo, no kubongoloka kukalamba.+
23 Iye, ifyo baputula no kukontola+ sando+ ya kutobawilako aba pano isonde bonse! Iye, ifyo Babiloni aba ica kupapa mu nko!+
24 Ninkuteya iciteyo kabili nawikatwamo, we Babiloni, ukwabula ukuti wishibe.+ Walisangilwe no kwikatwa, pantu wasonsombele Yehova.+
25 “Yehova naisula umwa kututila mwakwe, no kufumya ifyanso fya bukali bwakwe.+ Pantu Shikulu Mulopwe,+ Yehova wa mabumba, ali no mulimo mu calo ca bena Kaldi.+
26 Iseni kuli ena ukufuma ukwalepesha.+ Isuleni amatala yakwe.+ Mutuulikeni filya batuulika imiina,+ no kumonaula.+ Kwiba nangu bamo abaleshalapo pali ena.+
27 Ipayauleni ing’ombe shakwe shonse ishilume.+ Lekeni shiye mu kushipaya.+ We bulanda kuli bena, pantu ubushiku bwabo nabufika, inshita ya kubakanda!+
28 “Kuli icongo ca balefulumuka na balefyuka ukufuma mu calo ca Babiloni+ ku kuyashimika mu Sione pa cilandushi ca kwa Yehova Lesa wesu,+ icilandushi cakwe pa mulandu we tempele lyakwe.+
29 “Iteni abapoosa imifwi, bonse abaishiba ukubomfya ubuta bese ku kulwisha Babiloni.+ Citeni inkambi konse konse. Kwiba nangu bamo abalefyuka.+ Mulanduleni ukulingana ne milimo yakwe.+ Citeni kuli ena ukulingana na fyonse ifyo acitile.+ Pantu ni kuli Yehova e ko aituntumbile, ku Wa Mushilo wa kwa Israele.+
30 E ico abalumendo bakwe bakafwila mu mansa shakwe,+ na bonse abaume bakwe aba bulwi bakafwa mu bushiku bulya,”+ e fyasosa Yehova.
31 “Mona! Ninkwimina,+ we uituntumba,”+ e fyasosa Shikulu Mulopwe,+ Yehova wa mabumba, “pantu ubushiku bobe buli no kwisa, inshita ilyo nkakukanda.
32 Kabili uituntumba akaipununa no kuwa,+ kabili tapakabe na wa kumwimya.+ Kabili nkakoleka umulilo mu misumba yakwe, na o ukoca fyonse ifyamushinguluka.”+
33 Yehova wa mabumba atila: “Abana ba kwa Israele na bana ba kwa Yuda balebacushisha pamo, kabili balibekata kuli bonse ababatwala muli bunkole.+ Balikaana ukubaleka.+
34 Umulubushi wabo alikosa,+ Yehova wa mabumba e shina lyakwe.+ Ukubalubulwila kwena akabalubulwilako,+ pa kuti aleke icalo ukutuushako,+ no kutenkanya abekashi ba mu Babiloni.”+
35 “Kuli ulupanga ulwimiine abena Kaldi,”+ e fyasosa Yehova, “ulwimiine abekashi ba mu Babiloni+ na bacilolo+ bakwe na ba mano bakwe.+
36 Kuli ulupanga ulwimiine abalanda ifya fye,+ kabili bakalacita nge fipuba.+ Kuli ulupanga ulwimiine impalume shakwe,+ kabili shikatutuma.+
37 Kuli ulupanga ulwimiine bakabalwe+ babo na maceleta yabo aya nkondo na cintobentobe wa bantu bonse abali mu kati kakwe,+ kabili bakaba fye nga banakashi.+ Kuli ulupanga ulwimiine ifyuma fyakwe,+ kabili fikapokololwa.
38 Amenshi yakwe nayonaulwa, kabili yali no kukama.+ Pantu ici calo ca fimpashanya ifyabaswa,+ kabili pa mulandu wa fimonwa fyabo ifya kutiinya, balecita nga bapena.
39 E ico abantu ba mu fitungu fyaumisha bakekala ne nama ishilila, mukekala na bamwakatala;+ kabili tamwakekale umuntu, kabili Babiloni takabeko ku nkulo ne nkulo.”+
40 “Filya fine Lesa awishishe Sodomu na Gomora+ ne mishi yakwe iyali mupepi,”+ e fyasosa Yehova, “tamwakekale umuntu, kabili tamwakekale umulebeshi.+
41 “Moneni! Abantu baleisa ukufuma ku kapinda ka ku kuso; no luko ulukalamba+ ne shamfumu+ ishikalamba shikabalamunwa ukufuma ukwalepesha pe sonde.+
42 Bali na mata na mafumo.+ Bankalwe kabili tabakomfwe na luse.+ Icongo cabo cili nga bemba uulepooma,+ kabili bali pali bakabalwe;+ nabaiteyanya no mutima umo ku kulwa na iwe, we mwana mwanakashi Babiloni.+
43 “Imfumu ya ku Babiloni nayumfwa ulwa bena,+ na maboko ya iko nayatompoka.+ Kuli ukucula! Ukushikitika nakuikata, ngo mwanakashi uulepaapa.+
44 “Moneni! Bakesa ku bwikalo bwa muyayaya nga filya inkalamo iilefuma mu mushitu mu mbali ya Yordani isa,+ lelo mu nshita fye inono nkabalenga bakafulumukeko.+ Kabili uwasalwa e o nkabikako.+ Pantu nani uwaba nga ine,+ kabili nani engansonsomba,+ kabili ni kacema nshi uwingeminina ku cinso candi?+
45 E ico umfweni, ico Yehova alefwaya ukucita+ kuli Babiloni,+ ne fyo aletontonkanya ukucita ku bena Kaldi.+ Abana ba mpaanga bakabakululula.+ Kabili akalenga icifulo cabo ukuba icibolya pa mulandu wa bo.+
46 Kabili ilyo Babiloni akekatwa, pakatenta pe sonde ponse,+ no kulila kukomfwika mu nko shonse.”+
Amafutunoti
^ Bele ali ni lesa wa bena Babiloni.