Yeremia 7:1-34
7 Ici e cebo icaishile kuli Yeremia ukufuma kuli Yehova, ica kuti:
2 “Iminina mu mpongolo ya ng’anda ya kwa Yehova, bila ici cebo,+ no kusosa, auti, ‘Umfweni icebo ca kwa Yehova, mwe baYuda bonse, mwe baleingila mu mpongolo ishi pa kuti mukontamine Yehova.
3 Yehova, Lesa wa mabumba, Lesa wa kwa Israele atila: “Wamyeni imibele yenu ne myendele yenu, na ine nkaleka mukekale muli cino cifulo.+
4 Mwicetekela amashiwi ya bufi,+ aya kuti, ‘Bena e tempele lya kwa Yehova, e tempele lya kwa Yehova, e tempele lya kwa Yehova!’
5 Pantu nga mwawamya imibele yenu ne myendele yenu, nga mwaba no mulinganya ku banenu,+
6 nga tamulecusha umulebeshi, umwana wa nshiwa na mukamfwilwa,+ tamulesuumya no mulopa uwa kaele muli cino cifulo,+ kabili nga tamulekonka balesa bambi ku kuiletela ubucushi,+
7 ninshi na ine nkaleka mukekale muli cino cifulo, mu calo ico napeele ifikolwe fyenu, ukufuma umuyayaya no kuya umuyayaya.”’”+
8 “Moneni mulecetekela amashiwi ya bufi—tayakamwafwe kantu nakalya.+
9 Bushe kuti muleiba,+ no kwipaya+ no kucita ubucende+ no kulapa ubufi+ no kufutumuna icushi kuli Baali+ no kukonka balesa bambi abo mushaishibe,+
10 no kwisaiminina ku cinso candi muli ino ng’anda iyainikwa ishina lyandi,+ no kusosa, amuti, ‘Ukupokololwa tukapokololwa,’ nangu ca kuti mulecita ifi fyonse ifya bunani?
11 Bushe ino ng’anda iyainikwa ishina lyandi+ naisanguka ulucengo lwa fipondo mu menso yenu?+ Nomba, ine nimona,” e fyasosa Yehova.+
12 “‘Lelo kabiyeni ku cifulo candi icali mu Shilo,+ uko nabikile ishina lyandi pa kubala,+ no kumona ifyo nacitile kuli cena pa mulandu wa bubi bwa bantu bandi abena Israele.+
13 Nomba pa mulandu wa kuti mwalecita fyonse ifi,’ e fyasosa Yehova, ‘kabili nalecelela no kumweba+ lelo tamwaumfwile,+ kabili nalemwita lelo tamwayaswike,+
14 filya nacitile kuli Shilo+ e fyo nkacita na ku ng’anda iyainikwa ishina lyandi,+ iyo mwacetekelamo,+ kabili e fyo nkacita na ku cifulo ico napeele kuli imwe na ku fikolwe fyenu.
15 Kabili nkamupasa ukufuma ku cinso candi,+ ifyo napashile bamunyinenwe bonse, abana bonse aba kwa Efraimu.’+
16 “Na iwe, wipepelako aba bantu, nangu ukubapapaatilako nangu ukubapepelako, kabili wipapaata kuli ine,+ pantu nshakakumfwe.+
17 Bushe taulemona ifyo balecita mu misumba ya mu Yuda na mu misebo ya mu Yerusalemu?+
18 Abana baleteba inkuni, na bashibo balekosha umulilo, na bakashi balekasa umufuba wa kuti bapangilemo imikate ya kupeela amalambo kuli ‘namfumu wa mu muulu,’+ kabili balepongolwela imituulo ya mwangashi+ kuli balesa bambi pa kuti bankalifye.+
19 ‘Bushe nine balekalifya?’ e fyasosa Yehova.+ ‘Bushe te bene baleikalifya, pa kuti babe ne nsoni pa menso?’+
20 E ico Shikulu Mulopwe Yehova atila, ‘Moneni! Ubukali bwandi e lyo ne cipyu candi filepongolwelwa pali cino cifulo,+ na pa bantunse na pa fitekwa, na pa miti ya mu mpanga+ na pa fisabo fya mwi bala; kabili fikapya, no kushima iyo.’+
21 “Yehova wa mabumba, Lesa wa kwa Israele, atila, ‘Lundeni imituulo yenu iya koca pa malambo yenu no kulya umunofu.+
22 Pantu nshalandile ne fikolwe fyenu pa mituulo ya koca na pa malambo, kabili nshabebele pali ifi mu bushiku nabafumishe mu Egupti.+
23 Lelo aya e mashiwi nabebele ilyo nabapeele amafunde, nati: “Muleumfwa kwi shiwi lyandi,+ na ine nkaba Lesa wenu,+ na imwe mukaba abantu bandi; kabili mule-enda mu nshila shonse+ isho namweba, pa kuti ifintu fikamuwamine.”’+
24 Lelo tabaumfwile, kabili tabakutike,+ lelo balekonka amapange ukulingana no kutalama kwa mitima yabo,+ ica kuti batendeke ukubwelela ku numa, no kuleka ukuya ku ntanshi,+
25 ukutula pa bushiku ifikolwe fyenu fyafumine mu calo ca Egupti ukufika na lelo;+ kabili nalemutumina ababomfi bandi bonse bakasesema, ukucelela cila bushiku no kubatuma.+
26 Awe tabaumfwile kuli ine, kabili tabakutike,+ lelo baletalamika imikoshi yabo.+ Ifyo bacitile fyalicilile pa fyacitile ifikolwe fyabo.+
27 “Kabili ukabebe amashiwi yonse aya,+ lelo tabakomfwe kuli iwe nakalya; kabili ukabilikishe kuli bena, lelo tabakakwasuke nakalya.+
28 Kabili ukabebe, auti, ‘Ulu e luko ulushumfwa kwi shiwi lya kwa Yehova Lesa wabo,+ abashaumfwa ukubasalapula.+ Bucishinka bwalipwa, bwalifuma mu tunwa twabo.’+
29 “Beyeni umushishi wenu uo mushabeya no ku-upoosa,+ kabili samuneni ulwimbo lwa bulanda+ pa tupili apashaba kantu, pantu Yehova nakaana+ kabili nasha inkulo iyo ubukali bwakwe bwaishilepo.+
30 ‘Pantu abana ba kwa Yuda nabacita ifyabipa mu menso yandi,’ e fyasosa Yehova. ‘Balibika ifya bunani mu ng’anda iyainikwa ishina lyandi, pa kuti baikoweshe.+
31 Kabili nabakuula ififulo fya kupepelapo mu Tofete,+ ifyaba mu mupokapoka wa mwana wa kwa Hinomu,+ pa kuti boce abana babo abaume na bana babo abanakashi mu mulilo,+ icintu ico nshasosele kabili icishatalile acisa mu mutima wandi.’+
32 “‘E ico, moneni! inshiku shileisa,’ e fyasosa Yehova, ‘ilyo kushakabe Tofete no mupokapoka wa mwana wa kwa Hinomu, lelo ukaba umupokapoka wa kwipailamo;+ kabili mu Tofete e mo bakalashiika abantu mpaka incende ikabule.+
33 Ne fitumbi fya aba bantu fikaba ifya kulya fya fyuni fya mu lwelele ne fya nama sha mu mpanga, kabili takwakabe uwa kufitiinya.+
34 Kabili nkatalalika mu misumba ya kwa Yuda na mu misebo ya mu Yerusalemu ishiwi lya kusekelela, ne shiwi lya kwa shibwinga ne shiwi lya kwa nabwinga;+ pantu icalo cikaba fye icibolya.’”+