Yobo 17:1-16
17 “Umutima wandi naufulungana,+ inshiku shandi nashipwa;Kuli ine kushele fye inshiishi.+
2 Cine cine kuli abalempumya,+Na menso yandi yali pa mibele yabo iya bucipondoka.
3 Shi mbikileni iciikatilo cibe kuli imwe bene.+Nani umbi uwingafunkana na ine mu minwe?+
4 Pantu imitima yabo mwali-italusha ku kwiluka.+E co mushibasumbwila.
5 Umuntu kuti aeba abanankwe ukusendapo ifipe fyakwe,Lelo amenso ya bana bakwe kuti yanaka.+
6 Kabili mwalenga abantu na bantu ukulanandapo mu mapinda,+Icinso candi casuka caba ica kufwishilapo amate.+
7 Kabili amenso yandi yanaka ku kukalipa+Ne filundwa fyandi fyonse fyaba nge cinshingwa.
8 Abalungama bapapa pa filecitika,No wa kaele afulilwa umusangu.
9 Uwalungama ena akonka fye inshila yakwe,+No wasanguluka iminwe+ alundako fye amaka.+
10 Lelo, imwe bonse mwalatendeka na kabili. Aleni konkanyenipo,Pantu nshisangile uwa mano nangu umo pali imwe.+
11 Inshiku shandi nashipita,+ amapange yandi nayafulunganishiwa,+Pamo na matontonkanyo ya mutima wandi.
12 Ubushiku babusangula akasuba+ abati:‘Apo nakufiita, ulubuuto luli mupepi.’
13 Nga nalolela, Inshiishi yalaba e ng’anda yandi;+Mu mfifi+ e mo ndi no kwanshika ubusanshi bwandi.
14 Ndi no kwita inindi,+ nati, ‘Ni we tata!’Na ku mutiti+ nati, ‘Ni we mayo kabili inkashi yandi!’
15 Nga kanshi isubilo lyandi lili kwi?+Kabili nani winganjeba ukuti ndi ne subilo?
16 Bakatentemukila ku Nshiishi,Ilyo ifwe, bonse pamo, tukatentemukila ku lukungu.”+