Yobo 2:1-13
2 Kabili bushiku bumo ilyo abana baume ba kwa Lesa wa cine baishile ku kwiminina pa ntanshi ya kwa Yehova, Satana na o aishileiminina pa kati kabo pa ntanshi ya kwa Yehova.+
2 E lyo Yehova aipwishe Satana, ati: “Wafuma kwi?” Satana ayaswike Yehova no kutila: “Nafuma mu kusabanta pe sonde no kwendaukapo.”+
3 Kabili Yehova atile kuli Satana: “Bushe naubika umutima obe pa mubomfi wandi Yobo,+ no kumona ukuti tapaba uwaba nga ena pe sonde, umuntu uwa kaele kabili umulungami,+ uutiina Lesa+ kabili uutaluka ku fyabipa?+ Kabili acili uwa kaele,+ nelyo ca kuti ulentunka+ ukuti imonaule apabula umulandu.”+
4 Lelo Satana+ ayaswike Yehova no kutila: “Inkanda pa nkanda, kabili conse ico umuntu akwata kuti apeelela pa mweo wakwe.+
5 Nomba, shi tambikeni ukuboko kwenu, mukumyeko na kwi fupa lyakwe na ku munofu wakwe kabili mumone nga takamutuke pa menso yenu.”+
6 E lyo Yehova atile kuli Satana: “Mona ali mu minwe yobe! Nomba ukumwipaya kwena wimwipaya!”
7 Awe Satana afumine ku cinso ca kwa Yehova+ kabili ailelwalika Yobo ifipute+ ifyabipisha ukutampila ku nyantilo ya lukasa lwakwe no kufika pa kati ka mutwe.
8 Na o asukile abuula ici-inga e ko alaipalawila; kabili aleikala mu mito.+
9 E lyo umukashi amwebele ati: “Bushe mucili namwikatisha bukaele bwenu?+ Tukeni Lesa pa kuti mufwe!”
10 Na o atile: “Ulelanda ngo mwanakashi icipuba.+ Bushe tufwile ukusumina fye ifisuma ifilefuma kuli Lesa wa cine no kukaana ifibi?”+ Muli ifi fyonse Yobo tabembwike ku milomo yakwe.+
11 Awe abanankwe ba kwa Yobo batatu balyumfwile ubucushi bonse ubwamuponene, kabili baliishile, cila muntu afumine ku mwakwe, Elifasi umwina Temani+ na Bildadi umwina Shuhi,+ na Sofari umwina Naamati.+ Awe bakumanine apo bapangene+ ukukumanina ku kwisamulilila ubulanda no kumusansamusha.+
12 Ilyo bainwine amenso yabo kutali kutali bafililwe ukumwishiba. E lyo batampile ukubilikisha no kulila kabili cila muntu alepwile+ ica kufwala cakwe icabula amaboko no kukuba ulukungu mu muulu e lyo luleponena pa mutwe wakwe.+
13 Kabili baikele+ nankwe pa nshi inshiku cinelubali (7) akasuba no bushiku, kabili takwali nangu umo uwalemusosha, pantu bamwene ukuti alekalipwa+ nga nshi.