Yobo 22:1-30
22 E lyo Elifasi umwina Temani ayaswike no kutila:
2 “Bushe umuntu mulimo nshi akwata kuli Lesa,+Bushe uwacenjela kuti aba uwa mulimo kuli ena?
3 Bushe Uwa Maka Yonse alasekelela mu kuti uli uwalungama,+Atemwa bushe alasekelamo nga wawamya imibele yobe?+
4 Bushe kuti akwebawila pa mulandu wa kuba na katiina kuli ena,Bushe kuti walubulula nankwe mu cilye ca milandu mwa?+
5 Bushe ububi bobe tabwafula,+Kabili bushe imembu shobe tashakapwe?
6 Pantu upoka iciikatilo kuli bamunonko apa fye,+Kabili ufuula ifya kufwala abali kale ubwamba.
7 Taupeela uwatembuka amenshi ya kunwa,Kabili utana uuli ne nsala ifya kulya.+
8 Lelo umuntu uwaba na maka, icalo cakwe,+No watemwikwa e wikalamo.
9 Bamukamfwilwa wabaleka baye iminwe nkutwa,Ne minwe ya nshiwa waifunaula.+
10 E mulandu wine inkose+ shakushingulukila,Kabili e mulandu wine umwenso wa kupumikisha wakwikatila;
11 Kabili e mulandu wine imfifi yakwishila, pa kuti wimona nangu kamo,Kabili e mulandu wine ilyeshi lya menshi lyakufimbila.
12 Bushe Lesa tali uwasansama ngo muulu?+Kabili mona intanda+ shonse, shaba mu muulu.
13 Lelo watila: ‘Nga kanshi cinshi Lesa aishiba?Bushe amenso yakwe kuti apusha mwi kumbi lyafiita pa kuti apingule?
14 Amakumbi yalamucinga pa kuti emona,Kabili enda mu muputule wa mu muulu.’
15 Bushe inshila ya kale e yo uleikalililamo fyeUmwalepita ababifi,
16 Abasendelwe ilyo inshita yabo tailafika,+Abo umufula+ wabo wapomweke ngo mumana,
17 Abaleti kuli Lesa wa cine: ‘Fumeniko kuli ifwe!+Kabili cinshi Uwa Maka Yonse engacita kuli ifwe?’
18 Lelo aisusha ifisuma mu mayanda yabo;+Kabili ukupanda amano kwa babifi kwataluka kuli ine.+
19 Abalungama bakamona no kusekelela,+No wa kaele akabapumya ati:
20 ‘Cine cine abalwani besu nabaloba;Ne fintu fyabo ifyashalapo umulilo ukafipwisha.’
21 Umwishibe bwino, pa kuti pabe umutende;E lyo ifisuma fikesa kuli iwe.
22 Shi pokelela ku kanwa kakwe amafunde,No kubika ifyebo fyakwe mu mutima obe.+
23 Nga wabwelela ku Wa Maka Yonse,+ ubucindami bobe bukabwela;Nga watalusha ifyabipa ku matenti yobe,
24 Kabili nga wabika ulubwe lwauma umutengo mwi lobaNa golde wa ku Ofiri+ mu fimabwe fya mu mimana,
25 E lyo Uwa Maka Yonse akaba ulubwe lobe ulwauma umutengo,Kabili akaba kuli iwe silfere umusuma.+
26 E lyo ukasanga ubusuma ku Wa Maka Yonse,+No kwinwina icinso cobe kuli Lesa.+
27 Ukalilila kuli ena, na o akakumfwa;+Ne milapo yobe ukafikilisha.+
28 Kabili ukapingula ica kucita, na co cikacitika;Na pa nshila shobe pakabalikila ulubuuto.+
29 Pantu aseebanya uulanda cilumba cilumba;+Lelo uwafuuka akamupususha.+
30 Akapususha uwa kaele,+Na iwe ukapusukila pa kusanguluka kwa minwe yobe.”+
