Yobo 29:1-25
29 E lyo Yobo abwekeshepo ukulanda no kutila:
2 “Iye kanshi nga ndi filya nali imyeshi ya kale,+Ifyo nali mu nshiku Lesa aleninda;+
3 Ilyo ansanike inyali yakwe pa mutwe,Ilyo nale-enda mu mfifi ku lubuuto lwakwe;+
4 Nga ndi ifyo nali mu nshiku sha bulumendo bwandi,+Ilyo ukutemwa kwa kwa Lesa kwali pe tenti lyandi;+
5 Ilyo Uwa Maka Yonse aali na ine,Ilyo ababomfi bandi bonse baali mupepi na ine!
6 Ilyo nalekubula amakasa yandi mu mukaka watikama,Ne cilibwe icasansuka calepongolola imilonga ya mafuta;+
7 Ilyo naleya ku mpongolo ya musumba,+Pa lubansa e po naleteeka icipuna candi!+
8 Bakalume balemona no kubelama,Na bakote baleima, baiminina.+
9 Bacilolo baletekanya pa kulanda,Kabili balebika ne minwe pa tunwa twabo.+
10 Amashiwi ya ntungulushi tayaleumfwika,Ne ndimi shabo shalambatile mu kanwa.+
11 Pantu ukutwi kwalyumfwile no kunjeba ati nalipaalwa,Ne linso lyalimwene no kunjikalila bukambone.
12 Pantu nalepususha umulanda uwalefwaya ubwafwilisho,+No mwana wa nshiwa na onse uushali na wa kumwafwa.+
13 Ipaalo+ lya wali mupepi no kuloba—lyaleisa pali ine,No mutima wa kwa mukamfwilwa naleulenga ukutemwa.+
14 Nalefwala ubulungami, na bo bwalemfimba.+Umulinganya wandi wali nge ca kufwala cabula amaboko—kabili nge citebo.
15 Nali amenso ku mpofu;+Kabili nali amakasa ku walemana.
16 Nali wishi umwine mwine uwa bapiina;+No mulandu wa muntu uo nshaishibe na kwishiba—naleufwailisha.+
17 Kabili naletobaula insekete sha ncitatubi,+Kabili nalemupoka ica kutakaanya icili mu meno yakwe.
18 Awe naleti, ‘Nkafwila mu cisansala candi,+Kabili nkafusha inshiku shandi ngo mucanga.+
19 Imishila yandi ya-andalila mu menshi,+No mume ukekala ubushiku bonse ku musambo wandi.
20 Ubucindami bwandi bucilipo,No buta bwandi mu minwe yandi bukalalasa libili libili.’
21 Abantu balenkutika; kabili balendolela,Awe baleikala fye tondolo ukulolela ukupanda amano kwandi.+
22 Ilyo naleka ukusosa tapaleba uwa kupoosapo ishiwi na limbi,Na mashiwi yandi yalepongolwelwa pali bena.+
23 Awe balempembela ifyo abantu bapembela imfula,+No tunwa twabo baleyasamwina imfula ya kulekelesha.+
24 Ilyo nalebamwentwila tabalesumina—Kabili icinso candi icasansamuka+ balefilwa ukucilenga ubulanda.
25 Nalebasalila inshila ya kuyamo, kabili naleba ku ntanshi;Awe nali nge mfumu pa bashilika ba iko,+Nali ngo usansamusha abaleloosha.+
