Yobo 40:1-24
40 Kabili Yehova akonkenyepo ukwasuka Yobo no kutila:
2 “Bushe uufwailisha ifilubo kuti akansana no Wa Maka Yonse?+Uulekalipila Lesa, aasuke.”+
3 E lyo Yobo ayaswike Yehova no kutila:
4 “Moneni! Nshili kantu.+Cinshi ningamwasuka?Iminwe yandi nabika pa kanwa.+
5 Ninsosa umuku umo, lelo nsha-asuke na kabili;Awe ninsosa imiku ibili, lelo nshalundepo.”
6 E lyo Yehova ayaswike Yobo ukufuma mu nkuuka+ no kutila:
7 “Shi kaka mu musana ngo mwaume;+Ine nalakwipusha, na iwe unjebe.+
8 Bushe cine cine ulefulunganya umulinganya wandi?Bushe uletila ndi mubifi pa kuti iwe ube uwalungama?+
9 Nelyo bushe waba no kuboko ngo kwa kwa Lesa wa cine,+Kabili bushe ishiwi lyobe kuti lyabulukuta nge fibulukuta ishiwi lyakwe?+
10 Shi isaamike ukupuulama+ no kusansama;+Kabili ufwale ubucindami+ na bukatebebe.+
11 Salanganya ubukali bobe,+Kabili mona uwa matutumuko onse no kumuceefya.
12 Mona uwa matutumuko onse no kumuceefya+Kabili nyantawila ababifi apo beminine.
13 Bafise bonse pamo mu mushili,+Kakila ifinso fyabo umwafisama,
14 E lyo ine ndekutasha,Pantu ukuboko kobe ukwa ku kulyo kuti kwakupususha.
15 Ale nomba mona imfubu iyo nabumba pamo pene na iwe.Ilya+ umulemfwe nga ing’ombe.
16 Amaka ya iko yaba mu ntungu sha iko,No bulamba+ bwa iko bwaba mu mishipa ya pe fumo.
17 Ikongamika umucila ngo mukedari;Ubushipa bwa matanta ya iko bwalipikana.
18 Amafupa ya iko mipaipi ya mukuba;Amafupa ya iko ayakosa yapala icela bafula.
19 Yena e ya ntanshi mu fyapangile Lesa;Kalenga+ wa iko e wingapalamikako ulupanga lwakwe.
20 Pantu impili shipeela ifisabo fya shiko ku mfubu,+Ne finama fya mpanga fyonse fyangalila kulya.
21 Mwi samba lya muunganunshi e mo isendama,Umwafisama mu matete+ na mu nika ya matipa.+
22 Imyunganunshi ilaicinga ku cintelelwe ca iko;Imiarabimu ya ku mumana ilaishinguluka.
23 Umumana nga waba no mukuku, taisakamana.Ilateeka umutima nangu ca kutila Yordani+ alompokela pa kanwa ka iko.
24 Bushe kuli uwingaikata ilyo ilemonako?Bushe kuli uwingaiteya pa kuti aitule imyona ku cinkobwe?
