Yobo 41:1-34
41 “Bushe kuti waloba ing’wena+ ku bulobo,Nelyo bushe kuti watininkisha ululimi lwa iko ku mwando?
2 Bushe kuti wabika umwando mu myona ya iko,+Nelyo bushe kuti watula insekete sha iko ku muunga?
3 Bushe kuti yakupapaata,Nelyo bushe kuti yasosa amashiwi yafuuka kuli iwe?
4 Bushe kuti yapangana na iwe icipangano,Ukuti ibe umusha obe umuyayaya?
5 Bushe kuti wayangasha nge cuni,Nelyo bushe kuti waikakila pa kuti abakashana baleyangasha?
6 Bushe aba makwebo kuti baicitilapo amakaabu?Bushe aba makwebo kuti bayakana?
7 Bushe kuti waisusha imifwi+ ya mabanga mu mpapa ya iko,Nelyo bushe kuti waisusha amela mu mutwe wa iko?
8 Esha ukuikatamo.Ibukisha ifyo washombweke na yo. Wibwekeshapo na kabili.
9 Mona! Uulesubila ukuikata kuti alengwapo fye insoni.Umuntu kuti awa pa nshi pa kuimona fye.
10 Takuli uwingapama ukuibala.Kabili nani uwingeminina ku cinso candi?+
11 Nani wabalilepo ukumpeela, pa kuti imubweseshe?+Fyonse ifyaba mwi samba lya muulu fyandi.+
12 Nshaikale tondolo ukwabula ukusosa ifilundwa fya ikoNelyo amaka ya iko no kuyemba kwa mubili wa iko.
13 Nani engaifuula ica kufwala ca iko?Nani engengila mu ncendwa sha iko?
14 Nani engasamuna akanwa ka iko?Ameno ya iko yonse yalatiinya nga nshi.
15 Yaba ne cilumba pa mulandu wa mamba ya iko,Yalilundinkana kwati bayakakatikapo fye.
16 Yakumana pamo bwino bwino,Ica kuti no mwela te kuti wingile mu kati ka yako.
17 Yalilambatana na yanankwe;Yalikatana kabili te kuti yapaatukane.
18 Ukutesemuna kwa iko kubyasha ulubuuto,Na menso ya iko yaba ngo kucelebuka kwa lucelo.
19 Mu kanwa ka iko mufuma ukubyata kwa nkuba,Mufuma ne nsase sha mulilo.
20 Mu myona ya iko mufuma icushi,Nge lungu basontekele ku tumuti utwauma.
21 Umupu wa iko kuti wabilimya amalasha,No lubingu lufuma mu kanwa ka iko.
22 Mu mukoshi wa iko mwaba amaka,Abali ku cinso ca iko balekatwa umwenso.
23 Iminofu ya mubili wa iko yalikambantana;Yaba nge yakambatikwapo fye, taitenta.
24 Umutima wa iko wakosa nge libwe,Wakosa ndi nge mpelo.
25 Nga yaibuka aba maka balatutuma;+Pa mulandu wa mwenso balafulungana.
26 Nelyo ulupanga lwaisanga talwingilamo,Nangu lifumo, umufwi nangu ifumo ilikalamba.+
27 Imona icela+ nga kacani,No mukuba nge cimuti icabola.
28 Umufwi te kuti uifulumune;Kuli yena amabwe ya mu cisukushilo+ yasanguka icani.
29 Imona inkonto nge tete,+Kabili iseka ukutenta kwe fumo baipoosela.
30 Mwi samba lya iko muli ifi-inga ifyatwa;Nga yapita pa matipa paba kwati papitile ica kupuulilako.+
31 Ilenga amenshi ukubilauka kwati menshi yalebilauka mu mpoto;Ilenga bemba ukumoneka nge nongo ya baleipikamo amafuta ya kusuba.
32 Ilenga umo yapita mwashala kwati mulebeeka;Umuntu kuti amona amenshi ayashika yabuuta kwati ni mfwi.
33 Pa mushilinshi tapali icapalana na yo,Yabumbilwe iyabula umwenso.
34 Conse icasansabala ilacimona.Yena ni mfumu pa nama mpanga shonse isha cilumba.”
