Yobo 5:1-27
5 “Ala ita! Bushe kuli uwa kukwasuka?Kabili ni kuli ani pa ba mushilo uko wingaalukila?
2 Pantu umuwelewele ukukalifiwa kukamwipaya,No ubelelekwa bwangu umufimbila ukamwipaya.
3 Ine nalimona uko umuwelewele aleikala bwino,+Lelo mu kupumikisha natampile ukutiipwila ubwikalo bwakwe.
4 Abana bakwe tabapokololwa nangu panono,+Bafyengelwa pa mpongolo apabula uwa kubapokolola.
5 Ico alobolola, uwa nsala alya;Ne fili ku fya kukobekako inama umuntu alafikobololako,Kabili iciteyo cilacibaula ifya maliila fyabo fyonse.
6 Pantu icabipa tacifuma mu lukungu,Na mu mushili tamufuma amafya.
7 Pantu umuntu afyalilwa ukucula,Filya insase shima ukuya mu muulu.
8 Awe mba nine kuti nalomba kuli Lesa,Kabili kuli Lesa e ko ningatuula umulandu wandi,+
9 Ku ucite fikulu kabili ifyo tushingomfwikisha,Ifipesha amano ifishingapendwa;+
10 Ku upeela imfula pano isonde ponse,+No kuleta amenshi mu mabala yonse;+
11 Ku ubika abalanda apacindama,+No kuleka abali no bulanda babe apasansuka apo bengapusuka;
12 Ku ufulunganya amapange ya ncenjeshi,+No kuleka iminwe yabo ifilwe ukucita icili conse;
13 Ku wikatila aba mano mu bucenjeshi bwabo,+No kuleka ukupanda amano ukwa ncenjeshi kulete icimfulumfulu;+
14 Baponenwa ne mfifi mu nshita ya kasuba,Kabili akasuba pa kati balapampanta kwati bushiku;+
15 Kabili ku upususha abantu ukufuma ku lupanga lwa mu tunwa twa babifi,No kupususha umupiina mu minwe ya wakosa.+
16 E ico ku mulanda kwaba isubilo,+Lelo ababifi bacilika pa kanwa.+
17 Mona! Alipaalwa umuntu uo Lesa alungika;+Kabili ukufunda kwa Wa Maka Yonse wikusuula!
18 Pantu ena alakalifya, lelo alakakila icilonda;Alasansaula, lelo iminwe yakwe ilaposha.
19 Ku macushi mutanda (6) akakupokolola,+Awe na ku fintu cinelubali (7) ububi tabwakakukumyemo.+
20 Mu cipowe akakulubula ku mfwa,+Na mu nkondo akakupususha ku maka ya lupanga.
21 Akakufisa ukufuma ku lulimi ulukapa ngo bwembya,+Kabili tawakatiine ilyo ukusampa kukesa.
22 Ukusampa ne nsala ukafiseka,Ne finama fya mu mpanga tawakafitiine.
23 Pantu ukapangana icipangano na mabwe ya mu mpanga,Ne finama fya mu mpanga fikaba ifya mutende kuli iwe.+
24 Kabili ukeshiba ukuti umutende litenti lyobe,Kabili ukayapempula impanga yobe iya mulemfwe, no kukanalufyako akantu.
25 E lyo ukeshiba ukuti abana bobe bengi,+Na bafuma mu nda yobe bali nge cani ca pano isonde.+
26 Ukafika ku nshiishi ucili na maka,+Kwati mwina wa myanshi mu nshita ya iko.
27 Mona! Ici e co ifwe tufwailiishe. Kabili e fyo cili.Kutika, kabili—ciishibe we mwine.”
