Ibuuku lya Kubalilapo Ilya Imilandu 11:1-47
11 Mu kupita kwa nshita abena Israele bonse baile kuli Davidi ku Hebrone+ kabili bamwebele abati: “Moneni! Ifwe tuli bamunyinenwe.*+
2 Kale ilyo Shauli ali imfumu yesu, nimwe mwaletungulula* abashilika abena Israele mu nkondo.+ Kabili Yehova Lesa wenu amwebele ati: ‘Niwe ukalacema abantu bandi abena Israele, kabili ukaba intungulushi ya bantu bandi abena Israele.’”+
3 E ico abakalamba bonse aba mu Israele baile ku mfumu ku Hebrone, kabili Davidi apangene nabo icipangano mu Hebrone pa cinso ca kwa Yehova. Lyena basubile Davidi pa kuti abe imfumu ya bena Israele+ ukulingana ne fyo Yehova alandile ukupitila muli Samwele.+
4 Pa numa Davidi na bena Israele bonse baile ku Yerusalemu, e kutila ku Yebusi,+ ukwaleikala abena Yebusi.+
5 Abena Yebusi basaalwile Davidi abati: “Tawaingilemo muno!+ Na lyo line Davidi apokele umusumba wa Sione,+ uwali na malinga ayakosa. Uyu nomba Musumba wa kwa Davidi.+
6 E ico Davidi alandile ati: “Uukabalilapo ukwipaya abena Yebusi e ukaba umukalamba wa bashilika.” Yoabu+ umwana wa kwa Seruya e wabalilepo ukuya, kabili aishileba umukalamba wa bashilika.
7 Lyena Davidi atampile ukwikala mu musumba wa malinga ayakosa, kabili batendeke ukuwita abati Umusumba wa kwa Davidi.
8 Davidi atampile ukukuula umusumba ne fikuulwa fimbi ukufuma pa Milo* ukufika fye na mu kati ka musumba, kabili Yoabu e wakuulile cipya cipya ifikuulwa fimbi ifyashele mu musumba.
9 E fyo Davidi aile alekwatilako amaka,+ kabili Yehova wa mabumba ali nankwe.
10 Nomba aba e bali abakalamba ba bashilika ba maka aba kwa Davidi e lyo na bena Israele bonse abamutungilile pa kuti abe imfumu nga fintu Yehova alaile abena Israele.+
11 Aya e mashina ya bashilika ba maka aba kwa Davidi: Yashobeamu+ umwana wa mwina Hakmone, e wali umukalamba wa aba abashilika batatu.+ Bushiku bumo aipeye abantu 300 kwi fumo.+
12 Uwakonkelepo ali ni Eleasari+ umwana wa kwa Dodo umwana wa kwa Ahohe.+ Ali pali aba abashilika batatu aba maka.
13 Uyu e wali na Davidi ku Pas-damimu,+ uko abaPelishiti balongene pa kuti balwe inkondo na bena Israele. Nomba kwali ibala umwali barle iingi, kabili abantu balifulumwike abaPelishiti.
14 Lelo ena alishipile aiminina na pa kati ke bala no kulicingilila. Atwalilile ukwipaya abaPelishiti ica kuti Yehova alengele abantu bakwe bacimfya icine cine.*+
15 Intungulushi shitatu pa ntungulushi 30 shaile ku cilibwe ukwali Davidi ku lucengo lwa Adulamu+ ninshi abashilika abaPelishiti nabapanga inkambi mu Mupokapoka* wa Refaimu.+
16 Pali ilya nshita ninshi Davidi alifiseme, kabili ninshi abashilika ba baPelishiti bapangile inkambi mu Betelehemu.
17 Lyena Davidi afulwike amenshi ya mu Betelehemu e lyo atila: “Ala ifyo ningatemwa ukunwa amenshi ya mu cishima ca mu Betelehemu+ icabela mupepi ne mpongolo!”
18 E lyo aba abashilika ba maka batatu baileingila mu nkambi ya baPelishiti ku maka, kabili batapile amenshi mu cishima ca mu Betelehemu icabela mupepi ne mpongolo, e lyo baletela Davidi; lelo alikeene ukunwa, ayetile panshi pa cinso ca kwa Yehova.
19 Alandile ati: “Te kuti ncite ica musango yu mwe Lesa wandi! Bushe inwe umulopa wa bantu abaci-ibika mu kapoosa mweo?+ Pantu baci-ibika mu kapoosa mweo pa kuti bayetapa amenshi.” E ico alikeene ukunwa yalya menshi. Ifi e fyo abashilika bakwe batatu aba maka bacitile.
20 Abishai+ munyina Yoabu+ ali mukalamba wa bashilika bambi batatu; aipeye abantu 300 kwi fumo, kabili na o aishibikwe nga filya fine balya bambi batatu baishibikwe.+
21 Pali balya batatu e wali uwacindikwa ukucila abashala babili, kabili e wali intungulushi yabo, lelo tafikile pa cifulo ico balya abashilika batatu aba kubalilapo bafikilepo.
22 Benaya+ umwana wa kwa Yehoyada ali mwaume uwashipa* uwacitile ifingi mu Kabseele.+ Aipeye abana abaume babili aba kwa Ariele uwa ku Moabu, kabili pa bushiku kwali imfula ya bungululu bwa buuta, aingile mu cilindi, aipaya ne nkalamo.+
23 Na kabili aipeye umwina Egupti ipaka uwalepele imikono 5.*+ Nangu ca kuti umwina Egupti alikete ifumo ilyakwete ica kwikatilako icali nga kamulando ka bakapikula ba nsalu,+ aile kuli ena ne nkonto kabili amusompwele ifumo, e lyo amwipaila kuli lilya line ifumo.+
24 Ifi e fyo Benaya umwana wa kwa Yehoyada acitile, kabili na o aishibikwe nga filya fine balya abashilika ba maka batatu aba kubalilapo baishibikwe.
25 Nangu ca kuti ali uwacindikwa sana ukucila balya 30, tafikile pa cifulo ico balya batatu bafikilepo.+ Lelo Davidi amupeele umulimo wa kulamulinda.
26 Abashilika aba maka abalebomba ubushilika bali ni Asaele+ munyina Yoabu, Elhanani umwana wa kwa Dodo uwa ku Betelehemu,+
27 Shamote umwina Harore, Helese umwina Pelone,
28 Ira+ umwana wa kwa Ikeshe umwina Tekoa, Abiesere+ umwina Anatote,
29 Sibekai+ umwina Husha, Ilai umwina Ahohe,
30 Maharai+ umwina Netofa, Helede+ umwana wa kwa Baana umwina Netofa,
31 Itai umwana wa kwa Ribai uwa ku Gibea umwina Benjamini,+ Benaya umwina Piratone,
32 Hurai uwa ku mimana ya Gaashi,+ Abiele umwina Arba,
33 Asmabete umwina Baharumu, Eliaba umwina Shaalibimu,
34 abana ba kwa Hashemu umwina Gisone, Yonatani umwana wa kwa Shage umwina Harari,
35 Ahiamu umwana wa kwa Sakari umwina Harari, Elifali umwana wa kwa Uri,
36 Hefere umwina Mekerati, Ahiya umwina Pelone,
37 Hesero umwina Karmele, Naarai umwana wa kwa Esbai,
38 Yoele munyina Natani, Mibhari umwana wa kwa Hagri,
39 Seleke umwina Amone, Naharai umwina Beerote, uwalesendela Yoabu umwana wa kwa Seruya ifyanso;
40 Ira umwina Itri, Garebu umwina Itri,
41 Uria+ umwina Hiti, Sabadi umwana wa kwa Alai,
42 Adina umwana wa kwa Shisa umwina Rubene, intungulushi ya bena Rubene, uwali na bantu 30;
43 Hanani umwana wa kwa Maaka, Yoshafati umwina Mitni,
44 Usia umwina Ashterate, Shama na Yeiele, abana ba kwa Hotamu umwina Aroere;
45 Yediaele umwana wa kwa Shimri na Yoha munyina, umwina Tisi;
46 Eliele umwina Mahabi, Yeribai na Yoshabia abana ba kwa Elnaamu, na Itma umwina Moabu;
47 Eliele, Obedi na Yaasiele umwina Soba.
Amafutunoti
^ Nelyo “balupwa lwenu.”
^ Mu ciHebere, “mwalefumya abena Israele kabili nimwe mwalebengisha.”
^ Nalimo ili lyali liloba ilyo baletuulika mu mbali ye linga pa kuti bacingilile umusumba.
^ Nelyo “apuswishe abantu bakwe.”
^ Nelyo “Impanga Iyabatama.”
^ Mu ciHebere, “ali mwana umwaume uwa mwaume uwa maka.”
^ Alepele nalimo ukucilako panono pa mamita yabili. Moneni Ifyebo Fyalundwako pa B14.
