Ibuuku lya Kubalilapo Ilya Imilandu 12:1-40
-
Abaletungilila Davidi pa kuti abe imfumu (1-40)
12 Aba e baume abaishile kuli Davidi ku Siklagi+ ninshi taya nangu kumo pa mulandu wa kuti aletiina Shauli+ umwana wa kwa Kishi. Aba bali pa bashilika ba maka abalemwafwilisha ukulwa inkondo.+
2 Bali-ipangeshe na mata, kabili balishibe ifya kubomfya ukuboko kwa ku kulyo no kwa ku kuso+ pa kusukusa amabwe+ ukubomfya icisukushilo na pa kupoosa imifwi. Bali ni bamunyina ba kwa Shauli, abatuntwike muli Benjamini.+
3 Ahiesere e wali umukalamba wa bashilika e lyo uwakonkelepo ni Yoashi. Aba bali bana ba kwa Shema umwina Gibea;+ lyena kwali Yesiele na Pelete abana ba kwa Asmabete,+ Beraka, Yehu umwina Anatote,
4 Ishmaya umwina Gibeone,+ e wali umushilika wa maka pa bashilika 30+ kabili e walebangalila; kwali na Yeremia, Yahasiele, Yohanani, Yosabadi umwina Gedere,
5 Elusai, Yerimote, Bealia, Shemaria, Shefatia umwina Harifu,
6 Elkana, Ishia, Asarele, Yoesere na Yashobeamu, abena Kora;+
7 na Yoela na Sebadia abana ba kwa Yerohamu uwa ku Gedore.
8 Abena Gadi bamo baileilunda kuli Davidi mu ncende iyafisama mu matololo.+ Aba bali bashilika ba maka abasambilile ifya kulwa inkondo kabili abaishibe sana ifya kubomfya inkwela iikalamba ne fumo. Pa menso balemoneka kwati ni nkalamo, kabili balebutukisha kwati ni mpombo pa mpili.
9 Esere e wali umukalamba wabo, Obadia e wakonkelepo, Eliabu e wali uwa butatu,
10 Mishmana e walengele 4, Yeremia e walengele 5,
11 Atai e walengele 6, Eliele e walengele 7,
12 Yohanani e walengele 8, Elsa e walengele 9,
13 Yeremia e walengele 10, Makbanai e walengele 11.
14 Aba bali bena Gadi,+ abakalamba ba bashilika. Uushakwatishe amaka pali aba alekumanisha ukulwa na bashilika 100, e lyo uwakwatishe amaka alekumanisha ukulwa na bashilika 1,000.+
15 Aba e bashilika aba-abwike umumana wa Yordani mu mweshi wa kubalilapo ninshi nawisula ukufika na mu lulamba, kabili batamfiishe bonse abaleikala mu mpanga iyabatama ku kabanga na ku masamba.
16 Abaume bamo abena Benjamini na baYuda nabo baishile kuli Davidi ku ncende iyafisama.+
17 Lyena Davidi alifumine pa kuti alande nabo, kabili abebele ati: “Nga ca kuti mwishile mu mutende kabili mwishile mu kungafwa, ninshi nalamupokelela bwino. Lelo nga mwishile mu kumbeleleka pa kuti abalwani bandi bancimfye nangu ca kuti tapali ico nalufyanya, ninshi Lesa wa fikolwe fyesu alolekeshepo kabili apingule.”+
18 Lyena umupashi wa kwa Lesa waishile pali Amasai,+ uwali umukalamba wa baume 30 kabili atile:
“Tuli bantu bobe Davidi mwana Yese, kabili tuli ku lubali lobe.+
Umutende, umutende ube na iwe, kabili uulekwafwa abe no mutende,Pantu Lesa obe alekwafwa.”+
E ico Davidi alibapokelele kabili abasontele ukuba abakalamba ba bashilika.
19 Abena Manase bamo nabo baishileba ku lubali lwa kwa Davidi ilyo aishile na baPelishiti mu kulwa na Shauli; lelo ta-afwile abaPelishiti, pantu ilyo bakateka ba baPelishiti+ bapandishenye amano balimutamfishe, batile: “Akayaba ku lubali lwa kwa shikulu wakwe Shauli, bakatwipaye no kutwipaya.”+
20 Ilyo aile ku Siklagi,+ aba mu mukowa wa kwa Manase abaile ku lubali lwakwe ni aba: Adna, Yosabadi, Yediaele, Mikaele, Yosabadi, Elihu na Siletai. Aba bali bakalamba ba mabumba ya bantu 1,000 aba mu mukowa wa kwa Manase.+
21 Balyafwilishe Davidi ukulwisha ifipondo ifyalebelamina abantu, pantu bonse bali bashilika ba maka, abashipa,+ kabili baishileba abakalamba ba bashilika.
22 Cila bushiku abantu baleisa kuli Davidi+ mu kumwafwa, mpaka inkambi yakula yaba fye nge nkambi ya kwa Lesa.+
23 Aba e baishile kuli Davidi ku Hebrone ninshi nabasenda ifyanso fya nkondo+ pa kuti bayefumya Shauli pa bufumu babikepo Davidi nga fintu Yehova alandile.+
24 Abaume aba mu mukowa wa kwa Yuda abasendele inkwela ishikalamba na mafumo bali 6,800, abaipekenye ukuya ku nkondo.
25 Abashilika ba maka kabili abashipa aba mu mukowa wa kwa Simeone, bali 7,100.
26 Abena Lebi bali 4,600.
27 Yehoyada+ e waletungulula abatuntwike muli Aarone,+ kabili abo ali nabo bali 3,700.
28 Sadoke+ umulumendo uwa maka kabili uwashipa, na o aishile na bakalamba ba mu ng’anda ya fikolwe fyakwe, abali 22.
29 Abena Benjamini bamunyina Shauli,+ bali 3,000. Abengi pali aba, kale baletungilila aba mu ng’anda ya kwa Shauli.
30 Abafumine mu mukowa wa kwa Efraimu bali 20,800. Bali baume ba maka, abashipa kabili balilumbwike pa ba mu mayanda ya bashibo.
31 Abafumine muli hafu ya mukowa wa kwa Manase bali 18,000. Aba e bo basalile pa kuti bayebika Davidi pa bufumu.
32 Aba mu mukowa wa kwa Isakari, abaleiluka ifyalecitika kabili abaleishiba ifyo abena Israele balingile ukulacita, bali abakalamba 200, kabili e baletungulula bamunyinabo bonse.
33 Abafumine mu mukowa wa kwa Sebuluni abaipekenye ukulwa inkondo kabili abakwete ifyanso ifyalekanalekana bali abashilika 50,000. Bonse aba bali ku lubali lwa kwa Davidi kabili bali ne cishinka sana kuli ena.*
34 Mu mukowa wa kwa Naftali mwafumine abakalamba ba bashilika 1,000, kabili bali pamo na bashilika 37,000 abali ne nkwela ishikalamba na mafumo.
35 Aba mu mukowa wa kwa Dani abaipekenye ukulwa inkondo bali 28,600.
36 Kabili aba mu mukowa wa kwa Ashere abaipekenye ukulwa inkondo bali 40,000.
37 Abashilika abafumine kwi shilya lya Yordani,+ aba mu bena Rubene, mu bena Gadi na ba muli hafu ya mukowa wa kwa Manase abali ne fyanso fya nkondo ifyalekanalekana, bali 120,000.
38 Aba bonse bali bashilika abaipekenye ukulwa inkondo. Baishile ku Hebrone no mutima umo pa kuti babike Davidi pa bufumu, aleteka abena Israele bonse. Kabili abena Israele bonse abasheleko balefwaya* Davidi abe imfumu.+
39 Kabili baikele kulya kwine na Davidi pa nshiku shitatu, balelya no kunwa ifyo bamunyinabo babapekanishishe.
40 Kabili bonse abali mupepi nabo, ukubikako fye na bali ukutali abena Isakari, abena Sebuluni na bena Naftali, baleleta ifya kulya pa mpunda, pa ngamila, pa mfalashi na pa ng’ombe. Baleleta ubuunga bwa ngano, amakeke ya mikunyu ne myangashi iyauma, umwangashi, amafuta, ing’ombe ne mpaanga kabili ifyo baleleta fyaleba ifingi nga nshi, pantu abena Israele balesekelela.
Amafutunoti
^ Nelyo “bonse abailundile kuli Davidi tabali ne mitima ibili.”
^ Mu ciHebere, “bali no mutima umo.”
