Ibuuku lya Kubalilapo Ilya Imilandu 15:1-29
15 Kabili Davidi alitwalilile ukuikuulila amayanda mu Musumba wa kwa Davidi, alipekenye ne cifulo apa kwikala Icipao ca kwa Lesa wa cine kabili alitanike itenti umwa kucisungila.+
2 E lyo Davidi alandile ati: “Takuli umbi uufwile ukusenda Icipao ca kwa Lesa wa cine kano fye abena Lebi, pantu e bo Yehova asala pa kuti balesenda Icipao ca kwa Yehova kabili balemubombela lyonse.”+
3 Lyena Davidi alonganike abena Israele bonse mu Yerusalemu pa kuti balete Icipao ca kwa Yehova ku cifulo ico acipekanishishe.+
4 Abatuntwike muli Aarone+ na bena Lebi abo Davidi alonganike ni aba:+
5 mu bena Kohati, ni Uriele intungulushi na bamunyina 120;
6 mu bena Merari, ni Asaya+ intungulushi na bamunyina 220;
7 mu bena Gershomu, ni Yoele+ intungulushi na bamunyina 130;
8 mu batuntwike muli Elisafani,+ ni Shemaya intungulushi na bamunyina 200;
9 mu batuntwike muli Hebrone, ni Eliele intungulushi na bamunyina 80;
10 mu batuntwike muli Usiele,+ ni Aminadabu intungulushi na bamunyina 112.
11 Kabili Davidi aitile bashimapepo, e kutila Sadoke+ na Abiatari.+ Aitile na bena Lebi, e kutila Uriele, Asaya, Yoele, Shemaya, Eliele na Aminadabu,
12 kabili abebele ati: “Imwe muli ntungulushi sha ba mu mayanda ya bashinwe abena Lebi. Imwe na bamunyinenwe isangululeni, kabili mulete Icipao ca kwa Yehova Lesa wa kwa Israele ku cifulo uko ncipekanishishe.
13 Pa mulandu wa kuti te imwe mwacisendele pa kubala,+ Yehova Lesa wesu alitufulilwe,+ pantu tatwakonkele ifyo tufwile ukucita pa kucisenda.”+
14 E ico bashimapepo na bena Lebi bali-isangulwile pa kuti balete Icipao ca kwa Yehova Lesa wa kwa Israele.
15 Lyena abena Lebi basendele Icipao ca kwa Lesa wa cine pa mabeya yabo ku mitembo,+ nga fintu Yehova alandile ukupitila muli Mose.
16 Lyena Davidi aebele intungulushi sha bena Lebi ukusala bamunyinabo abali no kulaimba ne nsansa. Bali no kulaimba ne filimba, e kutila ifilimba fya nsale, insango+ na malimba.+
17 E ico pa bena Lebi banabo basalilepo Hemani+ umwana wa kwa Yoele, Asafi+ umwana wa kwa Berekia na Etani+ umwana wa kwa Kushaya uwa mu lupwa lwa kwa Merari.
18 Bamunyinabo abo bali pamo nabo aba mwi bumba lyalenga bubili+ ni Sekaria, Beni, Yaasiele, Shemiramote, Yehiele, Uni, Eliabu, Benaya, Maaseya, Matitia, Elifelehu na Mikneya, Obedi-edomu na Yeiele abalelonda impongolo.
19 Hemani,+ Asafi+ na Etani, e bali no kulalisha amalimba ya mukuba+ pa kwimba;
20 kabili Sekaria, Asiele, Shemiramote, Yehiele, Uni, Eliabu, Maaseya na Benaya balelisha ifilimba fya nsale ifya pali Alamote;*+
21 kabili Matitia,+ Elifelehu, Mikneya, Obedi-edomu, Yeiele na Asasia balelisha insango sha pali Sheminiti,*+ pa kuti baletungulula bakemba.
22 Kenania+ uwali intungulushi ya bena Lebi mu kusenda Icipao, e wale-angalila abalesenda Icipao pantu alishibe sana umulimo wa kusenda Icipao,
23 kabili Berekia na Elkana e balelinda Icipao.
24 Shebania, Yoshafati, Netanele, Amasai, Sekaria, Benaya na Eliesere abali bashimapepo balelisha sana amapenga ku ntanshi ya Cipao ca kwa Lesa wa cine,+ kabili Obedi-edomu na Yehia nabo balelonda Icipao.
25 Lyena Davidi na bakalamba ba mu Israele ne ntungulushi sha mabumba ya bantu 1,000 bale-endela pamo na basendele icipao ca cipangano ica kwa Yehova ilyo balecifumya ku ng’anda ya kwa Obedi-edomu+ ninshi balesekelela.+
26 Ilyo Lesa wa cine ayafwile abena Lebi abasendele icipao ca cipangano ica kwa Yehova, batuulile abana ba ng’ombe abalume 7 ne mpaanga ishilume 7.+
27 Davidi na bena Lebi bonse abasendele Icipao, bakemba na Kenania uwaleangalila umulimo wa kusenda ifipe kabili uwaleangalila na bakemba, bafwele ifya kufwala fyabula amaboko ifya nsalu iisuma. Davidi alifwele na efode iyo bapangiile no bushishi ubusuma.+
28 Ilyo abena Israele bonse baleleta icipao ca cipangano ica kwa Yehova, baleaula utupundu,+ balelisha intandala na mapenga+ na malimba. Balelisha sana ifilimba fya nsale ne nsango.+
29 Nomba ilyo bafishishe icipao ca cipangano ica kwa Yehova mu Musumba wa kwa Davidi,+ Mikali umwana mwanakashi wa kwa Shauli+ alengeele pe windo kabili ilyo amwene Imfumu Davidi ilecilauka kabili ilecinda, ali-isuulile mu mutima wakwe.+
