Ibuuku lya Kubalilapo Ilya Imilandu 16:1-43
16 E ico baletele Icipao ca kwa Lesa wa cine no kucibika mwi tenti ilyo Davidi acipangiile.+ Lyena batuuliile Lesa wa cine imituulo ya koca na malambo ya mutende.+
2 Ilyo Davidi apwishishe ukutuula imituulo ya koca+ na malambo ya mutende,+ apaalile abantu mwi shina lya kwa Yehova.
3 Na kabili apeele abena Israele bonse, abaume na banakashi, cila muntu umukate umo, keke ya fisabo fya tuncindu na keke ya myangashi.
4 Lyena asontele abena Lebi bamo aba kubombela apali Icipao ca kwa Yehova+ pa kuti balecindika* Yehova Lesa wa kwa Israele, balemutasha no kumulumbanya.
5 Asafi+ e wali intungulushi, e lyo pakonkele Sekaria; kabili Yeiele, Shemiramote, Yehiele, Matitia, Eliabu, Benaya, Obedi-edomu na Yeiele,+ e balelisha ifilimba fya nsale ne nsango;+ kabili Asafi e walelisha amalimba,+
6 e lyo Benaya na Yahasiele bashimapepo balelisha amapenga pa ntanshi ya cipao ca cipangano ica kwa Lesa wa cine.
7 Ubu e bwali ubushiku ubo Davidi abalilepo ukushika ulwimbo lwa kulumbanya Yehova kabili aebele Asafi+ na bamunyina ukuti bembe ulu lwimbo. Baimbile abati:
8 “Tooteleni Yehova,+ lilileni kwi shina lyakwe,Lengeni abantu na bantu beshibe imilimo yakwe!+
9 Mwimbileni, mwimbileni inyimbo sha kumulumbanya,+Tontonkanyeni sana* pa fipesha amano fyonse ifyo acita.+
10 Itakishisheni pe shina lyakwe ilya mushilo.+
Lekeni imitima ya bafwaya Yehova isekelele.+
11 Fwayeni Yehova+ na maka yakwe.
Lyonse mulemulomba ukuti alemwafwa.+
12 Ibukisheni ifisuma ifyo acita,+Ifipesha amano fyakwe no bupingushi bwakwe,
13 Mwe bana* ba kwa Israele umubomfi wakwe,+Mwe bana baume ba kwa Yakobo abo asala.+
14 Ni Yehova Lesa wesu.+
Alapingula aba mwi sonde bonse.+
15 Mwikalaba icipangano cakwe umuyayaya,Icipangano ico apangene* ne nkulo iyalenga 1,000,+
16 Icipangano ico apangene na Abrahamu,+No mulapo uo alapile kuli Isaki,+
17 Uo alengele waba icipope ico apeele Yakobo+Kabili icipangano ca muyayaya ico apangene na Israele,
18 Ilyo amwebele ati, ‘Nkakupeela icalo ca Kanaani+Pa kuti cikabe ubupyani bobe.’+
19 Pali ilya nshita mwali fye abanono,Abanono sana, kabili mwali abalebeshi muli ici calo.+
20 Balyendawike mu nko ishingi,Baleti bafuma ku bufumu bumo baya ku bufumu bumbi.+
21 Talekele umuntu nangu umo abacusha,+Lelo pa mulandu wabo akalipiile imfumu,+
22 Ashebele ati, ‘Mwi-ikata abantu abo nasuba,Kabili bakasesema bandi mwibacita icabipa nangu cimo.’+
23 Imbileni Yehova mwe bantu bonse aba pano isonde!
Cila bushiku mulebilisha ifyo apususha abantu!+
24 Bilisheni ubukata bwakwe mu nko,Bilisheni ifipesha amano ifyo acitila abantu bonse.
25 Pantu Yehova mukulu kabili alilinga ukumulumbanya nga nshi.
Alilinga ukumutiina ukucila tulesa tonse.+
26 Tulesa twa nko tonse, twa fye.+Lelo Yehova e wapangile imyulu.+
27 Uko ekala kwalicindama kabili kusuma;+Amaka no kusekelela fyaba uko ekala.+
28 Peeleni Yehova ifyo alinga ukumupeela mwe ndupwa sha bantu bonse,Peeleni Yehova ifyo alinga ukumupeela, pa mulandu wa bukata bwakwe na maka.+
29 Peeleni Yehova ubukata ubwalinga ishina lyakwe;+Leteni ubupe kabili mwise kuli ena.+
Kontamineni* Yehova ninshi namufwala ifya kufwala fya mushilo.*+
30 Mwe ba mwi sonde bonse tutumeni pa mulandu wakwe!
Alipampamika isonde; te kuti litelentenshiwe.+
31 Lekeni imyulu isansamuke, ne sonde lisekelele,+Bilisheni mu nko amuti: ‘Yehova naba Imfumu!’+
32 Lekeni bemba na fyonse ifyabamo fimulumbanye;Lekeni impanga isekelele pamo na fyonse ifyabamo.
33 Pa nshita imo ine lekeni ifimuti fya mu mpanga fisekelele pa mulandu wa kwa Yehova,Pantu aleisa* mu kupingula isonde.
34 Tooteleni Yehova pantu musuma;+Ukutemwa kwakwe ukushipwa kwa muyayaya.+
35 Kabili landeni amuti, ‘Tupususheni, mwe Lesa we pusukilo lyesu,+Tulonganikeni kabili tupususheni ku nko,Pa kuti tulumbanye ishina lyenu ilya mushilo+Kabili tumulumbanye ne nsansa.+
36 Yehova Lesa wa kwa Israele nalumbanishiweUkufuma umuyayaya no kuya umuyayaya.’”
Kabili abantu bonse batile, “Ameni!”* kabili balilumbenye Yehova.
37 Lyena Davidi ashiile Asafi+ na bamunyina palya pene apaali icipao ca cipangano ca kwa Yehova pa kuti lyonse balebombela palya pene,+ ukulingana ne milimo iyo balingile ukulabomba cila bushiku.+
38 Obedi-edomu na bamunyina 68, na Obedi-edomu umwana wa kwa Yedutuni na Hosa e balelonda impongolo;
39 e lyo Sadoke+ shimapepo na bashimapepo banankwe bali pe tenti lya mushilo ilya kwa Yehova ilyali apo balepepela mu Gibeone+
40 pa kuti lyonse ulucelo ne cungulo baletuulila Yehova amalambo ya koca pa ciipailo ca kutuulilapo amalambo ya koca na pa kuti balecita fyonse ifyalembwa mu Mafunde ya kwa Yehova ayo apeele abena Israele.+
41 Abo bali nabo ni Hemani na Yedutuni+ na baume bonse abo basalile abo balumbwile amashina pa kuti baletootela Yehova,+ pantu “ukutemwa kwakwe ukushipwa kwa muyayaya”;+
42 kabili bali na Hemani+ na Yedutuni pa kuti balelisha amapenga, amalimba ne filimba fimbi ifyo balelisha pa kulumbanya Lesa wa cine; e lyo abana ba kwa Yedutuni+ bali pa mpongolo.
43 Lyena abantu bonse balibwelelemo ku mayanda yabo, kabili Davidi na o aile mu kupaala aba mu ng’anda yakwe.
Amafutunoti
^ Mu ciHebere, “baleibukisha.”
^ Nelyo kuti lyapilibula no kuti, “Landeni.”
^ Nelyo “mwe batuntuka.” Mu ciHebere, “ulubuto.”
^ Mu ciHebere, “amashiwi ayo aebele.”
^ Nelyo “Pepeni.”
^ Nelyo kuti yapilibula no kuti, “pantu wa mushilo nga nshi.”
^ Nelyo “naisa.”
^ Nelyo “Nacibe ifyo fine.”