Ibuuku lya Kubalilapo Ilya Imilandu 17:1-27
17 Ilyo Davidi atampile fye ukwikala mu ng’anda* yakwe, aebele kasesema Natani+ ati: “Mona ine ndeikala mu ng’anda ya mbao sha mikedari,+ lelo Icipao ca kwa Yehova caba mwi tenti.”+
2 Natani aebele Davidi ati: “Citeni conse ico mulefwaya pantu Lesa wa cine ali na imwe.”
3 Mu nshita ya bushiku bulya bwine bushiku, Lesa aebele Natani ati:
4 “Kabiye kebe umubomfi wandi Davidi auti, ‘Yehova alanda ati: “Te iwe ukankuulila ing’anda ya kwikalamo.+
5 Pantu nshatala njikalapo mu ng’anda ukufuma fye ubushiku nafumishe abena Israele mu Egupti ukufika na buno bushiku, lelo monse umo nale-enda naleikala fye mwi tenti.*+
6 Bushe inshita yonse iyo naendele na bena Israele bonse nalyebelepo umo pali bakapingula ba bena Israele abo napeele umulimo wa kucema abantu bandi nati, ‘Cinshi ico ushankuulile ing’anda ya fimuti fya mikedari?’”’
7 Nomba kebe umubomfi wandi Davidi auti, ‘Yehova wa mabumba alanda ati: “Nakufumishe mu mpanga ya mulemfwe umo walecema impaanga pa kuti wise ube intungulushi ya bantu bandi abena Israele.+
8 Kabili nakulaba na iwe konse uko wakulaya,+ nkalofya abalwani bobe bonse pa menso yobe;+ kabili nkalenga ukalumbuke nga baume ba pe sonde abalumbuka.+
9 Nkasalila abantu bandi abena Israele icifulo uko bakekala, kabili takwakabe uwa kubapumfyanya; kabili ababifi tabakabacushe na kabili nge fyo babacushishe kale,+
10 ukutula pa bushiku nasontele bakapingula abalepingula abantu bandi abena Israele.+ Kabili nkacimfya abalwani bobe bonse.+ Na kabili nakweba nati, ‘Yehova akakukuulila ing’anda.’*
11 “‘“Ilyo ukafwa nge fyafwa ifikolwe fyobe, pa bufumu bobe nkapyanikapo umwana* obe umwaume,+ kabili nkakosha ubufumu bwakwe.+
12 E ukankuulila ing’anda,+ kabili nkakosha ubufumu bwakwe umuyayaya.+
13 Nkaba wishi, na o akaba umwana wandi.+ Nshakaleke ukumulanga ukutemwa ukushipwa+ nga filya nalekele ukulanga uo wapyene pa bufumu.+
14 Nkalenga akekale pa cipuna candi ica bufumu umuyayaya,+ kabili ubufumu bwakwe bukabako umuyayaya.”’”+
15 Natani aebele Davidi amashiwi yonse aya e lyo ne ci icimonwa conse.
16 E lyo Imfumu Davidi yaikele pa cinso ca kwa Yehova e lyo yatila: “Nine nani, mwe Yehova Lesa? Kabili bushe ing’anda yandi yalicindama pa kuti muncitile ifi mwancitila?+
17 Mwe Lesa mwalanda no kuti ing’anda ya mubomfi wenu ikatwalilila ukubako na ku nshita ya ku ntanshi sana,+ kabili mwe Yehova Lesa mwancita kwati muntu uo mufwile ukucindamika* na kabili.
18 Finshi fimbi ne mubomfi wenu ningamweba pa fyo mwancindamika apo mwalinjishiba bwino ne mubomfi wenu?+
19 Mwe Yehova, pa mulandu wa mubomfi wenu kabili ukulingana ne fyo mufwaya, mwalicita ifi fintu fyonse ifikalamba kabili mwalilenga fyaishibikwa.+
20 Mwe Yehova, takwaba uwaba nga imwe,+ kabili takwaba Lesa umbi ukucila pali imwe;+ fyonse ifyo twaumfwa filanga ukuti takwaba uwacila pali imwe.
21 Kabili luko nshi lumbi pe sonde ulwaba nga bantu benu abena Israele?+ Lesa wa cine ailebalubula pa kuti babe abantu bakwe.+ Mwaipangiile ishina pa mulandu ne fya maka ifyo mwabacitiile kabili ifya kutiinya.+ Abantu benu abo mwalubwile mu Egupti, mwalibatamfiisheko inko.+
22 Mwalengele abena Israele baba abantu benu umuyayaya;+ kabili imwe, mwe Yehova mwaishileba Lesa wabo.+
23 Nomba mwe Yehova, fikilisheni ifyo mwalaya umubomfi wenu na ba mu ng’anda yakwe umuyayaya, kabili fikilisheni ifyo mulaile.+
24 Ishina lyenu nalitwalilile ukubako umuyayaya kabili abantu bengalalilumbanya+ umuyayaya, pa kuti bakalelanda abati, ‘Yehova wa mabumba, Lesa wa bena Israele, ni Lesa wabo,’ kabili mwingalenga ing’anda ya mubomfi wenu Davidi ikabeko umuyayaya.+
25 Pantu mwe Lesa wandi, mwasokolwela ne mubomfi wenu ukuti mukankuulila ing’anda.* E co ne mubomfi wenu nkwatile amaka ya kupepa ili ipepo kuli imwe.
26 Nomba mwe Yehova, nimwe Lesa wa cine, kabili namulaya ne mubomfi wenu ifi ifintu ifisuma.
27 E ico paaleni ing’anda yandi ne mubomfi wenu, kabili naitwalilile ukubako, pantu ico imwe mwe Yehova mwapaala, cikaba icapaalwa umuyayaya.”
Amafutunoti
^ Nelyo “isano.”
^ Kuti yapilibula no kuti “naleikala mwi tenti mu ncende ishalekanalekana.”
^ Nelyo “isano.”
^ Mu ciHebere, “ulubuto.”
^ Nelyo “umwaume wa cifulo ca pa muulu.”
^ Nelyo “isano.”
