Ibuuku lya Kubalilapo Ilya Imilandu 21:1-30
21 Lyena Satana* aimiine abena Israele kabili atunkile Davidi pa kuti apende abena Israele.+
2 E ico Davidi aebele Yoabu+ ne ntungulushi sha bantu ati: “Kabiyeni kapendeni abena Israele ukutendekela ku Beere-sheba ukufika ku Dani;+ lyena mukesenjeba pa kuti nkeshibe ifyo bafulile.”
3 Lelo Yoabu alandile ati: “Yehova nafushe abantu bakwe imiku 100! Shikulu mwe mfumu, bushe abantu bonse te babomfi benu mwe shikulu? Cinshi mwe shikulu mulefwaila ukucitila ifi? Cinshi mulefwaila abena Israele babembuke?”
4 Lelo imfumu yalipatikishe Yoabu. E ico Yoabu aile mu kupenda abena Israele mu Israele monse. Pa numa alibwelele ku Yerusalemu.+
5 E lyo Yoabu apeele Davidi impendwa ya bantu abo alembele. Abaume abena Israele bonse abo apendele abengalwa no lupanga bali 1,100,000. Abaume abo apendele mu mukowa wa kwa Yuda abafikilepo ukuya ku nkondo bali 470,000.+
6 Lelo Yoabu tapendeeleko abena Lebi na bena Benjamini,+ pantu tatemenwe ifi imfumu yamwebele ukucita.+
7 Nomba ifi Davidi acitile fyalikalifye sana Lesa wa cine, e ico alikandile abena Israele.
8 Lyena Davidi aebele Lesa wa cine ati: “Ulubembu ulo ncitile+ lukalamba nga nshi. E ico napaapaata mbeleleni uluse ne mubomfi wenu pa lubembu ncitile,+ pantu ifyo ncitile buwelewele.”+
9 Lyena Yehova aebele Gadi+ uwalemwenako Davidi ifimonwa ati:
10 “Kebe Davidi auti, ‘Yehova atila: “Ndekupeela ifintu fitatu ifyo ufwile ukusalapo. Usalepo cimo ico mfwile ukukucita.”’”
11 E ico Gadi aile-eba Davidi ati: “Yehova atila, ‘Salapo
12 nampo nga ulefwaya mu calo mukabe icipowe+ pa myaka itatu, nelyo ulefwaya abalwani bobe bakakucimfye pa myeshi itatu kabili bakakusanse no lupanga,+ nelyo ulefwaya Yehova akakukande no lupanga pa nshiku shitatu, e kutila akalete icikuko mu calo,+ malaika wa kwa Yehova akese onaula+ icalo conse ica bena Israele.’ Nomba tontonkanyapo bwino e lyo unjebe ifyo mfwile ukuyaeba uuntumine.”
13 E ico Davidi aebele Gadi ati: “Ici cintu cansakamika sana. Leka Yehova e o ankande pantu wa luse nga nshi;+ lelo wileka abantu e bo bankande.”+
14 Lyena Yehova aletele icikuko+ mu Israele ica kuti abantu 70,000 balifwile.+
15 Na kabili, Lesa wa cine atumine malaika ku Yerusalemu pa kuti ayeonaula uyu musumba; lelo ilyo malaika ali mu kuonaula, Yehova alyumfwile ubulanda pa mulanda na bantu abo icikuko caipeye,+ kabili aebele malaika uwaleipaya abantu ati: “Capwa!+ Nomba bwesha ukuboko kobe.” Malaika wa kwa Yehova ali mupepi na po Ornani+ umwina Yebusi+ alepumina ingano.
16 Ilyo Davidi ainwine amenso, amwene malaika wa kwa Yehova naiminina mu lwelele* ninshi nasonta ulupanga+ pa musumba wa Yerusalemu. Ilyo line Davidi na bakalamba bawile ubukupeme+ ninshi nabafwala ne nsamu.+
17 Davidi aebele Lesa wa cine ati: “Bushe te ine nalandile ukuti bapende abantu? Nine nabembuka kabili nine nalufyanya;+ nomba ishi mpaanga, cinshi shalufyanya? Mwe Yehova Lesa wandi, kandeni ine wine na ba mu ng’anda ya kwa tata; lelo mwileta icikuko pa bantu benu.”+
18 Lyena malaika wa kwa Yehova, aebele Gadi+ ukuti aye-eba Davidi ukuti ayekuulila Yehova iciipailo apo Ornani umwina Yebusi+ alepumina ingano.
19 E ico Davidi alilecita ifyo Gadi amwebele ukulingana ne fyo Yehova alandile.
20 Nomba ilyo Ornani alepuma ingano, alipilibwike e lyo amona malaika, kabili abana bakwe 4 abo ali nabo balifiseme.
21 Ilyo Davidi alungeme Ornani, Ornani alimumwene kabili ilyo line alifumine apo alepumina ingano ayakontamina Davidi, afisha ne mpumi panshi.
22 E lyo Davidi aebele Ornani ati: “Nshitisha icifulo upuminapo ingano, pa kuti nkuulilepo Yehova iciipailo. Ndekulipila indalama shonse isho walampingula pa kuti icikuko cifume pa bantu.”+
23 Lelo Ornani aebele Davidi ati: “Cibuuleni fye shikulu mwe mfumu yandi, kabili tuulilenipo ilambo ilyo alefwaya.* Ing’ombe sha kutuula ilambo ishi, ica kupuminako ingano+ na makoli ya ng’ombe ifi, e fyo fibe inkuni ne ngano sha kutuula ishi. Fyonse namupeela.”
24 Lelo Imfumu Davidi yaebele Ornani aiti: “Awe, mfwile ukucishita pa mutengo walapingula pantu te kuti mbuule icifulo cobe mpeele Yehova, nelyo te kuti ntuule amalambo ya koca ukwabula ukupoosapo nangu shimo.”+
25 E ico Davidi alipile Ornani amashekele* ya golde 600.
26 Kabili palya pene e po Davidi akuuliile Yehova iciipailo+ e lyo atuulilapo amalambo ya koca na malambo ya mutende. Lyena aliliile kuli Yehova, kabili na o alimwaswike ilyo aponeshe umulilo+ uwaocele ilambo lya koca ilyali pa cipailo.
27 Lyena Yehova aebele malaika+ ukuti abweseeshe ulupanga lwakwe mu cikwama ca luko.
28 Ilyo Davidi amwene ukuti Yehova amwasukile apo Ornani umwina Yebusi alepumina ingano, alitwalilile ukutuulilapo amalambo.
29 Lelo pali ilya nshita, itenti lya mushilo ilya kwa Yehova ilyo Mose apangile mu matololo ne ciipailo ca kutuulilapo amalambo ya koca, fyali pa ncende balepepelapo mu Gibeone.+
30 Lelo Davidi taileko pa kuti epushe Lesa ifya kucita pantu aletiina ulupanga lwa kwa malaika wa kwa Yehova ulo amwene.
Amafutunoti
^ Nelyo kuti lyapilibula no kuti, “uulwisha.”
^ Mu ciHebere, “pa kati ke sonde no muulu.”
^ Mu ciHebere, “ilyalawama mu menso yakwe.”
^ Ishekele lyalefina ukucilako panono pa magramu 11. Moneni Ifyebo Fyalundwako pa B14.
