Ibuuku lya Kubalilapo Ilya Imilandu 26:1-32
26 Ifi e fyo abalelinda impongolo+ babaakenye: pa bena Kora, pali Meshelemia+ umwana wa kwa Kore umwana wa kwa Asafi.
2 Kabili abana abo Meshelemia akwete bali ni: Sekaria ibeli, Yediaele e wamukonkelepo, uwalenga butatu ali ni Sebadia, uwalenga 4 ali ni Yatniele,
3 uwalenga 5 ali ni Elamu, uwalenga 6 ali ni Yehohanani, uwalenga 7 ali ni Elihoenai.
4 Kabili abana abo Obedi-edomu akwete bali ni: Shemaya ibeli, Yehosabadi e wamukonkelepo, uwalenga butatu ali ni Yoa, uwalenga 4 ali ni Sakari, uwalenga 5 ali ni Netanele,
5 uwalenga 6 ali ni Amiele, uwalenga 7 ali ni Isakari kabili uwalenga 8 ali ni Peuletai; pantu Lesa alipaalile Obedi-edomu.
6 Kabili umwana wakwe Shemaya afyele abana abaume abali intungulushi sha ba mu ng’anda ya kwa shibo, pantu bali baume ba maka kabili aba cishinka.
7 Abana ba kwa Shemaya bali ni: Otni, Refaele, Obedi na Elsabadi; kabili Elihu na Semakia bamunyina nabo bali baume ba cishinka.
8 Bonse aba bali bana ba kwa Obede-edomu; bena na bana babo na bamunyinabo, bali baume ba cishinka kabili abafikapo ukubomba imilimo. Balupwa lwa kwa Obede-edomu bonse bali 62.
9 Kabili Meshelemia+ alikwete abana na bamunyina. Bonse bali 18 kabili bali baume ba cishinka.
10 Kabili Hosa uwatuntwike muli Merari alikwete abana. Shimri e wali intungulushi, pantu nangu ca kuti te wali ibeli, wishi alimusontele ukuba intungulushi,
11 Hilkia e wali uwa bubili, Tebalia e wali uwa butatu, Sekaria e wali uwalenga 4. Abana ba kwa Hosa na bamunyina bonse pamo bali 13.
12 Abali intungulushi sha mabumba ayalelinda impongolo nabo balikwete imilimo, nga filya fine bamunyinabo bakwete imilimo iyo balebomba pa ng’anda ya kwa Yehova.
13 E ico bonse abali intungulushi sha mayanda ya bashibo balibapendwilile+ nampo nga baice nelyo bakalamba pa kuti beshibe impongolo isho bali no kulalinda.
14 Lyena icipendwilo ca ku kabanga caponene pali Shelemia. Bapendwilile Sekaria umwana wakwe, uwali impanda mano iyaleiluka, kabili icipendwilo cakwe cawilile ku kapinda ka ku kuso.
15 Ica kwa Obedi-edomu cawilile ku kapinda ka ku kulyo, kabili abana bakwe+ babapeele umulimo wa kubombela ku matala.
16 Ica kwa Shupimu na Hosa+ cawilile ku masamba mupepi ne Mpongolo ya Shalekete ku musebo uwaya pa muulu. Amabumba ya balinshi yaleloshanya;
17 ku kabanga kwaleba abena Lebi 6; ku kapinda ka ku kuso kwaleba 4 cila bushiku, ku kapinda ka ku kulyo kwaleba 4 cila bushiku; ku matala+ kwaleba babili babili;
18 ku lukungu lwa ku masamba, kwaleba 4 mu musebo,+ kabili babili baleba pa lukungu.
19 Ifi e fyo abena Kora na bena Merari abalelinda impongolo babaakenye imilimo.
20 Pa bena Lebi, Ahiya e waleangalila ifipao fya ng’anda ya kwa Lesa wa cine ne fipao umo balesungila ifya mushilo.*+
21 Pa bana ba kwa Ladani, e kutila abana ba mwina Gershone uwatuntwike muli Ladani, intungulushi sha ba mu mayanda ya bashibo ishatuntwike muli Ladani umwina Gershone, pali Yehiele+
22 na bana ba kwa Yehiele, Setamu na Yoele munyina abaleangalila ifipao fya ng’anda ya kwa Yehova.+
23 Pa bena Amramu, abena Isari, abena Hebrone na pa bena Usiele,+
24 Shebuele umwana wa kwa Gershomu umwana wa kwa Mose e waleangalila amatala.
25 Bamunyina abatuntwike muli Eliesere+ bali ni, Rehabia,+ Yeshaya, Yoramu, Sikri na Shelomote.
26 Uyu Shelomote na bamunyina baleangalila ifipao umo balesungila ifya mushilo,+ ifyo Imfumu Davidi,+ intungulushi sha ba mu mayanda ya bashibo,+ intungulushi sha mabumba ya bantu 1,000 ne ntungulushi sha mabumba ya bantu 100, e lyo na bakalamba ba bashilika basangulwile.
27 Ifipe ifyo bapokele+ abo balelwa nabo inkondo+ balifipaatwile pa kuti fibe ifya mushilo pa kuti balefibomfya pa kuwamya ing’anda ya kwa Yehova;
28 na fyonse ifyo Samwele uwaleiluka ifimonwa,+ Shauli umwana wa kwa Kishi, Abnere+ umwana wa kwa Nere na Yoabu+ umwana wa kwa Seruya+ balifipaatwile pa kuti fibe ifya mushilo. Shelomite na bamunyina e baleangalila fyonse ifyo abantu balepaatwila Lesa.
29 Pa bena Isari,+ Kenania na bana bakwe bali ni bacilolo kabili bakapingula+ ba bena Israele. Balebombela kunse ya ng’anda ya kwa Lesa.
30 Pa bena Hebrone,+ Hashabia na bamunyina, baleangalila abena Israele abaleikala mu citungu ca ku masamba ya Yordani kabili baleangalila umulimo onse uwa kwa Yehova no mulimo wa mfumu. Bonse bali abaume 1,700 kabili bali ba cishinka.
31 Pa batuntwike mu lupwa lwa kwa Hebrone, Yeriya+ e wali intungulushi. Mu mwaka walenga 40 ukutula apo Davidi atendekeele ukuteka,+ balifwaile abaume ba maka kabili aba cishinka pa bena Hebrone. Babasangile mu Yasere+ ya mu Gileadi.
32 Kabili bamunyina, abaume ba cishinka, abali intungulushi sha ba mu mayanda ya bashibo bali 2,700. E ico Imfumu Davidi yabapeele umulimo wa kulatungulula abena Rubene, abena Gadi na hafu ya mukowa wa bena Manase, pa kuti balebomba umulimo wa kwa Lesa wa cine no mulimo wa mfumu.
Amafutunoti
^ Nelyo “ifyo bapaatwilile Lesa.”
