Ibuuku lya Kubalilapo Ilya Ishamfumu 6:1-38
6 Mu mwaka walenga 480 ukutula apo abena Israele* bafumiine mu calo ca Egupti,+ mu mwaka walenga 4 ukufuma apo Solomone abelele imfumu ya bena Israele, mu mweshi wa Sivu,*+ (e kutila umweshi wa bubili), Solomone atendeke ukukuulila Yehova*+ ing’anda.
2 Ing’anda iyo Solomone akuuliile Yehova yali imikono* 60 mu butali, imikono 20 mu bwipi, kabili yasanseme+ imikono 30.
3 Umuputule wa kwingililapo+ mwi tempele* uwali pa ntanshi wali imikono 20 mu butali,* nge fyo ing’anda yalepele mu bwipi. Wali imikono 10 mu bwipi, ku ntanshi ya ng’anda.
4 Ku ng’anda apangiileko amawindo ayakwete amafulemu+ ayalecepa kunse nga baisula, lelo ayalekula mu kati.
5 Kabili ku mbali ya ng’anda akuuliileko icikuulwa icashingulwike ing’anda yonse, ne fibumba fye tempele no muputule wa mu kati sana.+ Kabili mu mbali apangilemo imiputule ukushinguluka icikuulwa conse.+
6 Umuputule wa mu mbali uwa panshi sana wakulile imikono 5, uwa pa kati wakulile imikono 6, no walenga butatu wakulile imikono 7, pantu ku ng’anda alipangiileko apa kushintilila imbao ukushinguluka ing’anda yonse,+ pa kuti imbao tashingiile mu cibumba.
7 Bakuulile ing’anda na mabwe ya kwimba ayo baputwilile limo,+ pa kuti ilyo balekuula ing’anda, peba icongo ca sando nangu ice sembe nelyo ica fibombelo fya cela.
8 Umwinshi wa muputule wa mu mbali uwa panshi sana wali ku kapinda ka ku kulyo* aka ng’anda,+ kabili pali amatabo aya kunina pa kuya pa muputule wa pa kati, na yafumine pa muputule wa pa kati yaya pa muputule walenga butatu.
9 Atwalilile ukukuula ing’anda kabili ali-ipwishishe.+ Ilyo apwishishe, abikile imyalo ya mukedari pa ng’anda e lyo afimbapo imbao sha mukedari.+
10 Akuulile imiputule ya mu mbali ukushinguluka ing’anda yonse.+ Cila muputule wasanseme imikono 5, kabili imbao sha mukedari eshasuntinkenye iyi imiputule ku ng’anda.
11 Pali ilya nshita, Yehova aebele Solomone ati:
12 “Nga wakulakonka+ ifyo nakulakweba, ubupingushi bwandi na mafunde yandi yonse, nkafikilisha ifyo naebele Davidi wiso+ pali iyi ing’anda iyo ulekuula,
13 kabili nkekala mu bena Israele,+ kabili nshakalekeleshe abantu bandi abena Israele.”+
14 Solomone akonkenyepo ukukuula ing’anda pa kuti aipwishe.
15 Ku fibumba fya mu kati ka ng’anda abikileko imbao sha mukedari. Abikileko imbao ukufuma panshi ya ng’anda ukufika muli palafu, kabili panshi ya ng’anda ponse abikilepo imbao sha mukupri.+
16 Kabili ku numa ya ng’anda apangiileko umuputule wa mikono 20 uwa mbao sha mukedari, ukufuma panshi ukufika mu myalo, kabili mu kati* apangilemo umuputule wa mu kati sana,+ Uwa Mushilo Nga Nshi.+
17 Kabili itempele,*+ e kutila ulubali ulwabelele ku ntanshi ya ng’anda lwali imikono 40.
18 Pa mbao sha mukedari mu kati ka ng’anda babashiilepo ifyaba nge fitanga menshi+ na maluba ayabalula.+ Konse kwali imbao sha mukedari; takwali ne libwe ilyalemoneka.
19 Kabili mu kati sana+ aka ng’anda apangiilemo umuputule uwa kubikamo icipao ca cipangano ica kwa Yehova.+
20 Umuputule wa mu kati sana wali imikono 20 mu butali,+ wali imikono 20 mu bwipi kabili wasanseme imikono 20. Kabili abikileko golde iyalopololwa bwino; ku ciipailo+ abikileko imbao sha mukedari.
21 Solomone abikile golde iyalopololwa bwino+ mu kati ka ng’anda, kabili pa ntanshi ya muputule wa mu kati sana+ abikilepo amaceni ya golde, kabili mu muputule wa mu kati sana abikilemo golde.
22 Mu ng’anda yonse abikilemo golde mpaka ing’anda yonse yapwa. Ku ciipailo+ conse icabelele mupepi no muputule wa mu kati sana nako alibikileko golde.
23 Mu muputule wa mu kati sana apangiilemo bakerubi+ babili aba mbao sha fimuti fya mafuta, kabili umo umo alepele+ imikono 10.
24 Ipindo limo ilya kwa kerubi lyalepele imikono 5, ne pindo limbi lyalepele imikono 5. Ukufuma pa mpela ye pindo limo ukufika pa mpela ye pindo limbi palepele imikono 10.
25 Amapindo ya kwa kerubi umbi nayo yalepele imikono 10. Bakerubi bonse babili balilingene ubukulu kabili balemoneka cimo cine.
26 Kerubi umo alepele imikono 10, kabili ifi fine e fyo na kerubi umbi alepele.
27 Lyena abikile bakerubi+ mu muputule wa mu kati sana uwa ng’anda. Amapindo ya bakerubi baliyafungulwile ica kuti ipindo limo ilya kwa kerubi lyafikile ku cibumba cimo, ne pindo lya kwa kerubi umbi lyafikile ku cibumba cimbi, kabili amapindo yabo yalifikile pa kati ka ng’anda, kabili yalikumene.
28 Kuli bakerubi abikileko golde.
29 Kabili pa fibumba fyonse ifya mu Muputule wa Mushilo Nga Nshi ne fya mu muputule wa Mushilo alengelepo bakerubi,+ utuncindu+ na maluba ayabalula.+
30 Panshi ya iyi miputule abikilepo golde.
31 Kabili pa mwinshi wa muputule wa mu kati sana apangiilepo ifiibi ifya mbao sha fimuti fya mafuta, inceshi sha mu mbali, ne nceshi sha pa mwinshi, nge ciputulwa calenga 5.*
32 Ifiibi fibili afipangiile ne mbao sha fimuti fya mafuta, kabili abashiilepo bakerubi, utuncindu na maluba ayabalula, abikako na golde. Kabili kuli bakerubi na ku tuncindu abikileko golde.
33 Pa mwinshi we tempele,* abikilepo inceshi sha pa mwinshi isha mbao sha fimuti fya mafuta, ishali mu ciputulwa calenga 4.*
34 Kabili apangile ifiibi fya mbao sha mukupri. Pa mwinshi umo pali ifiibi fibili ifyaleisukila ku mainceshi, kabili pa mwinshi umbi napo pali ifiibi fibili ifyaleisukila ku mainceshi.+
35 Pa fiibi abashiilepo bakerubi, utuncindu na maluba ayabalula, kabili abikile golde ku fyo abashiilepo.
36 Apangile ulubansa lwa mu kati+ akuulilako ne cibumba ca mitande itatu iya mabwe ayaputulwa kabili pa muulu+ abikilepo imbao sha mukedari.
37 Mu mwaka walenga 4, mu mweshi wa Sivu,* Solomone alipangile+ umufula wa ng’anda ya kwa Yehova;
38 kabili mu mwaka walenga 11, mu mweshi wa Buli* (e kutila umweshi walenga 8), alipwishishe ukukuula ing’anda yonse, ukulingana ne fyo alingile ukuikuula.+ E ico akuulile ing’anda mu myaka 7.
Amafutunoti
^ Moneni Ifyebo Fyalundwako pa B8.
^ Moneni Ifyebo Fyalundwako pa B15.
^ Mu ciHebere, “abana ba kwa Israele.”
^ Umukono walelepa amasentimita ukucilako panono pali 44. Moneni Ifyebo Fyalundwako pa B14.
^ Mu ciHebere, “itempele lya ng’anda.”
^ Nelyo “wakulile imikono 20.”
^ Mu ciHebere, “ku kulyo.”
^ E kutila, mu kati ka ng’anda.
^ E kutila, Umuputule wa Mushilo, uwabelele ku ntanshi ya Muputule wa Mushilo Nga Nshi.
^ Nalimo aya amashiwi yalelanda pa fyo bapangile inceshi sha pa mwinshi nelyo ifyo ifiibi fyakulile.
^ E kutila, umuputule wa Mushilo.
^ Nalimo aya amashiwi yalelanda pa fyo bapangile inceshi sha pa mwinshi nelyo ifyo ifiibi fyakulile.
^ Moneni Ifyebo Fyalundwako pa B15.
^ Moneni Ifyebo Fyalundwako pa B15.
