Ibuuku lya Kubalilapo Ilya kwa Samwele 1:1-28
1 Nomba kwali umwaume umo uwa ku Ramataimu-sofimu*+ mu citungu ca mpili ica kwa Efraimu,+ ishina lyakwe ali ni Elkana,+ umwana wa kwa Yehoramu, umwana wa kwa Elihu, umwana wa kwa Tohu, umwana wa kwa Sufi, umwina Efraimu.
2 Aupile abanakashi babili, umo ali ni Hana, e lyo umbi ali ni Penina. Penina alikwete abana, lelo Hana ena takwete abana.
3 Cila mwaka Elkana alefuma mu musumba wa ku mwabo kabili aleya ku Shilo+ mu kupepa* na mu kutuulila Yehova wa mabumba amalambo. Ku Shilo e ko Hofini na Finehasi,+ abana ba kwa Eli balebombela Yehova+ bushimapepo.
4 Bushiku bumo ilyo Elkana atuulile ilambo, apeele Penina umukashi wakwe na bana bakwe abaume bonse na bana bakwe abanakashi+ ifipande fyabo ifye lambo,
5 lelo Hana amupeele icipande ce lambo icaibela, pantu e o atemenwe sana; lelo Yehova tamupeele abana.*
6 Kabili umukashi munankwe alemusaalula sana pa kuti alemukalifya pantu Yehova tamupeele abana.
7 Cila mwaka alemusaalula nga aya ku ng’anda ya kwa Yehova.+ Alemusaalula sana ica kuti alelila fye kabili alefilwa no kulya.
8 Lelo Elkana umulume wakwe amwipwishe ati: “Hana, cinshi ulelila, kabili cinshi ico tauleliila ifya kulya, kabili cinshi ubelele no bulanda sana?* Bushe nshawama ukucila abana abaume 10?”
9 Lyena Hana alimine ilyo bapwishishe ukulya no kunwa mu Shilo. Pali iyi nshita ninshi shimapepo Eli ekele pa cipuna mupepi na pa mwinshi we tempele*+ lya kwa Yehova.
10 Hana ali no bulanda sana* kabili atampile ukupepa kuli Yehova+ kabili alililile nga nshi.
11 Kabili alapile umulapo wa kuti: “Mwe Yehova wa mabumba, moneni ifyo ndecula. Nga mukanjibukisha ne mubomfi wenu kabili nga tamwakandabe ne mubomfi wenu kabili nga mukapeela ne mubomfi wenu umwana umwaume,+ nkamupeela mwe Yehova pa kuti akalemubombela inshiku shonse isha mweo wakwe, kabili takatale abeyapo umushishi wakwe.”+
12 Hana alipepele kuli Yehova pa nshita iitali, kabili Eli alemulolekesha pa kanwa.
13 Hana alepepela mu mutima, imilomo e yaletenta fye, lelo ishiwi talyaleumfwika. E ico Eli ena alemona kwati alikolelwe.
14 Eli amwebele ati: “Bushe walakololoka nshita nshi? Leka ukunwa umwangashi.”
15 E lyo Hana ayaswike ati: “Awe mwe shikulu! Ndi mwanakashi uulecula sana;* nshinwenepo umwangashi nangu ubwalwa, lelo nacilalondolwela Yehova+ fyonse ifili mu mutima wandi.
16 Mwimona umubomfi wenu ngo mwanakashi icinangwa. Icilengele ntwalilile ukulanda ukufika na pali ino nshita ni co ndi no bulanda sana kabili ndi na macushi ayengi.”
17 Lyena Eli amwebele ati: “Kabiye umutende, kabili shi Lesa wa kwa Israele akupeele ico umulombele.”+
18 Na o alandile ati: “Shi mwingaba ne cikuuku kuli ne mubomfi wenu.” Kabili Hana alile. Pa numa aliliile ifya kulya no bulanda bwalipwile.
19 Lyena balicelele ukubuuka kabili balipepele Yehova, e lyo babwelelamo ku ng’anda yabo ku Rama.+ Nomba Elkana alileele no mukashi wakwe Hana, kabili Yehova alibukishe Hana.+
20 No mwaka tawapwile* Hana alimite kabili afyele umwana umwaume amwinika+ no kuti Samwele,* pantu atile “namulombele kuli Yehova.”
21 Mu kupita kwa nshita Elkana aile na ba mu ng’anda yakwe bonse mu kutuulila Yehova ilambo+ lya pa mwaka na mu kutuula umutuulo wa pa mulapo wakwe.
22 Lelo Hana ena taile,+ pantu aebele umulume wakwe ati: “Uno muku nshaye. Umwana nga asumuka fye, e lyo nkamutwala pa kuti akamoneke pa cinso ca kwa Yehova kabili kulya kwine e ko akalaikala.”+
23 Lyena umulume wakwe Elkana amwebele ati: “Cita ico ulemona ukuti e ciweme.* Shala pa ng’anda mpaka ukamusumune. Shi Yehova akacite ifyo walanda.” E ico Hana ashele pa ng’anda kabili aleonsha umwana wakwe mpaka amusumuna.
24 Ilyo fye amusumwine, alimutwele ku Shilo, asendele ne ng’ombe iilume iya myaka itatu, itepe* limo ilya buunga no mutondo uukalamba uwa mwangashi,+ kabili aile ku ng’anda ya kwa Yehova ku Shilo,+ atwala no mwana wakwe.
25 Lyena baipeye ing’ombe iilume kabili batwele umwana kuli Eli.
26 E lyo Hana atile: “Mwe shikulu! Ndelapa pa cinso cenu* mwe shikulu, ukuti e ine ulya mwanakashi mwaiminine nankwe pano pene ilyo nalepepa kuli Yehova.+
27 Uyu e mwana nalelomba kuli Yehova, kabili alimpeela umwana uo namulombele.+
28 E ico na ine nomba na-ashimisha Yehova uyu mwana. Inshiku shonse isha mweo wakwe akaba wa kwa Yehova.”
Kabili Elkana alikontamiine Yehova palya pene.
Amafutunoti
^ Nelyo “uwa ku Rama, umwina Sufite.”
^ Nelyo “mu kukontamina Lesa.”
^ Mu ciHebere, “alimwisele ifumo.”
^ Nelyo “cinshi umutima obe ubelele no bulanda?”
^ E kutila, itenti lya mushilo.
^ Nelyo “umweo wakwe wali no bulanda.”
^ Nelyo “umwanakashi uulecula sana no mupashi.”
^ Nelyo kuti yapilibula no kuti, “Ilyo inshita yafikile.”
^ Ilyalola mu kuti “Ishina lya kwa Lesa.”
^ Mu ciHebere, “ico ulemona ukuti e ciweme mu menso yobe.”
^ Mwi tepe limo mwaleingila nalimo amalita 22. Moneni Ifyebo Fyalundwako pa B14.
^ Nelyo “Na pali fye umweo wenu.”
