Ibuuku lya Kubalilapo Ilya kwa Samwele 10:1-27
10 Lyena Samwele abuulile akamutondo ka mafuta kabili aitulwilile amafuta pa mutwe wa kwa Shauli.+ Alimutomwene e lyo amweba ati: “Yehova nakusuba ukuba intungulushi+ ya bantu bakwe.*+
2 Ilyo walalekana na ine lelo, walayasanga abaume babili mupepi ne nshiishi ya kwa Rakele+ mu citungu ca kwa Benjamini pa Selesa, kabili balayakweba abati, ‘Impunda mwaile mu kufwaya shalimoneka. Wiso nomba alileka ukusakamana pa mpunda,+ asakamana pali imwe. Atila: “Umwana wandi talamoneka, ndecita shani?”
3 Upitilile mpaka uyefika ku cimuti ca Tabore, uko walayakumana na baume batatu abaleya mu kupepa Lesa wa cine ku Betele,+ umo nasenda utwana twa mbushi tutatu, umbi nasenda imikate itatu e lyo umbi asendele umutondo uukalamba uwa mwangashi.
4 Balayamuposha kabili balayamupeelako imikate ibili. Nga bamupeela imikate, mufwile ukupoka.
5 Pa numa mwalayafika ku lupili lwa kwa Lesa wa cine ukwaba inkambi ya bashilika abaPelishiti. Nga mwafika ku musumba, mwalakumanya ibumba lya bakasesema abalefuma ku cifulo ca kutuulilapo amalambo, kabili pa ntanshi yabo paleba abalelisha icilimba ca nsale, akaoma, umutoolilo ne nsango, uku ninshi bakasesema balesesema.
6 Umupashi wa kwa Yehova uleisa pali iwe,+ kabili walayasesemena pamo nabo kabili walayaba fye kwati muntu umbi.+
7 Ifi ifishibilo nga fyacitika, uye ucite ifyo ulingile ukucita, pantu Lesa wa cine ali na iwe.
8 E ico tangilako ku Gilgali,+ nkesa kuli iwe ku kutuula amalambo ya koca na malambo ya mutende. Ufwile ukulolela pa nshiku 7 mpaka nkese. Lyena nkesakweba ifyo ufwile ukucita.”
9 Ilyo Shauli afutatile fye Samwele, Lesa atendeke ukwalula Shauli, aba fye kwati muntu umbi, kabili ifishibilo fyonse ifyo amwebele fyalicitike pali bulya bushiku.
10 E ico bafumine kulya baya ku lupili, kabili kulya kwine e ko ibumba lya bakasesema lyakumanine nankwe. Ilyo line fye umupashi wa kwa Lesa waishile pali ena,+ kabili atampile ukusesemena+ pamo na bakasesema.
11 Ilyo bonse abamwishibe bamumwene alesesemena pamo na bakasesema, baleipushanya abati: “Cinshi cacitika ku mwana wa kwa Kishi? Bushe Shauli na o ni kasesema?”
12 Lyena umwaume umo uwaleikala kulya aipwishe ati: “Inga shibo nani?” E co abantu balandila ukuti:* “Bushe Shauli na o ni kasesema?”+
13 Ilyo alekele ukusesema, aile ku cifulo ca kutuulilapo amalambo.
14 Pa numa munyina wa kwa Kishi, wishi wa kwa Shauli, aipwishe Shauli no mubomfi wakwe ati: “Mwaile kwi?” Na o amwaswike ati: “Twaile mu kufwaya impunda,+ lelo tatwashisangile. E ico twaile kuli Samwele.”
15 E lyo munyina wa kwa Kishi, wishi wa kwa Shauli amwipwishe ati: “Shi njeba, finshi Samwele amwebele?”
16 Shauli amwaswike ati: “Atwebele ati impunda shalimoneka.” Lelo tamwebele ifyo Samwele alandile ifyakumine ubufumu.
17 Lyena Samwele aitile abantu pa kuti bonse balongane pa cinso ca kwa Yehova pa Mispa+
18 kabili aebele abena Israele ati: “Ifi e fyo Yehova Lesa wa bena Israele alandile: ‘Nine nafumishe mwe bena Israele mu Egupti kabili nine namupokolwele ku bena Egupti+ na ku mabufumu yonse ayalemucusha.
19 Nomba imwe buno bushiku namukaana Lesa wenu+ uwamwafwile ilyo mwali na mafya na lintu mwalecula, kabili mwatile: “Ifwe tulefwaya fye mutupeele imfumu iya kuti iletuteka.” Nomba iminineni pa cinso ca kwa Yehova mu mikowa yenu kabili mu mabumba ya ndupwa shenu.’”*
20 E ico Samwele aebele aba mu mikowa yonse iya bena Israele ukuti bapalame,+ kabili umukowa wa kwa Benjamini e o basalile.+
21 Lyena aebele indupwa sha mu mukowa wa kwa Benjamini ukuti shipalame, kabili ulupwa lwa bena Matri elo basalile. Na mu kulekelesha Shauli umwana wa kwa Kishi e o basalile.+ Lelo ilyo baile mu kumufwaya, tabamusangile.
22 E ico baipwishe Yehova+ abati: “Bushe uyu muntu nafika kale kuno?” Na o Yehova atile: “Uyo abeleme mu fipe.”
23 E ico balibutukileko bayamusenda. Ilyo aishileiminina pa kati ka bantu, alicilile abantu bonse ica kuti balemufika fye mu mapeya.+
24 Samwele aebele abantu bonse ati: “Bushe mwamumona uo Yehova asalile,+ ukuti tapali uwalingana nankwe pa bantu bonse?” E lyo abantu bonse batendeke ukubilikisha abati: “Kalebalika mwe mfumu!”
25 Samwele aebele abantu ifyo bali no kulapeela imfumu+ kabili alifilembele mwi buuku, alibika na pa cinso ca kwa Yehova. Lyena Samwele aebele abantu bonse ukuti cila muntu abwelele ku ng’anda yakwe.
26 Shauli na o aile ku mwakwe ku Gibea, kabili Yehova alengele abashilika bamo baya nankwe.
27 Lelo abaume bamo ifinangwa balandile abati: “Bushe uyu ewingatupususha?”+ E ico balimusuulile, kabili tabamupeelepo umutuulo nangu umo.+ Lelo talandile nangu cimo.*
Amafutunoti
^ Mu ciHebere, “ubupyani bwakwe.”
^ Nelyo “e co kwabela insoselo ya kuti.”
^ Mu ciHebere, “mu mabumba ya bantu amakana.”
^ Mu ciHebere, “Kabili ali fye nga cibulu.”
