Ibuuku lya Kubalilapo Ilya kwa Samwele 11:1-15
11 Lyena Nahashi umwina Amone+ ailepanga inkambi pa kuti alwishe abena Yabeshe+ mu Gileadi. Abaume bonse aba mu Yabeshe baebele Nahashi abati: “Pangana na ifwe icipangano pa kuti tulekubombela.”
2 Nahashi umwina Amone abebele ati: “Nalapangana na imwe icipangano nga ca kuti cila muntu asumina ukumutonkola ilinso lya ku kulyo. Nkacita ifi pa kuti nseebanye abena Israele bonse.”
3 Abakalamba ba ku Yabeshe bamwebele abati: “Tuloleleko inshiku 7, pa kuti tutume inkombe mu calo ca Israele conse. Lyena nga takwakabe uwa kutupususha, tukacimba kuli iwe.”
4 Mu kupita kwa nshita, inkombe shafikile ku Gibea+ ukwaleikala Shauli kabili shaebele abantu ifyo abena Yabeshe balandile, lyena abantu bonse batampile ukulila imisowa.
5 Lelo Shauli alefuma mu mpanga ninshi alekonka umukuni pa numa, kabili aipwishe bamo ati: “Cinshi cacitikila abantu? Cinshi balelila?” E ico bamushimikile ifyo abena Yabeshe balandile.
6 Umupashi wa kwa Lesa waishile pali Shauli+ ilyo aumfwile ifyo bamushimikile, kabili alikalipe nga nshi.
7 E ico abuulile ing’ombe ishilume shibili ashiputaula fipimfya fipimfya, apeela ne nkombe pa kuti shitwale mu fitungu fyonse ifya mu Israele. Inkombe shaile-eba abantu ashiti: “Ifi e fyo bakacita ing’ombe sha muntu uushakonke Shauli na Samwele!” Kabili Yehova alengele abantu baba no mwenso ica kuti bonse baimiine fye capamo.*
8 Lyena apendele abantu mu Beseke, kabili abaume abena Israele bali 300,000, e lyo abaume abena Yuda bali 30,000.
9 Kabili baebele inkombe ishaishile abati: “Mufwile ukuyaeba abena Yabeshe mu Gileadi amuti, ‘Mailo tukamupususha ilyo akasuba kakafika pa kati.’” E ico inkombe shalile, shayaeba abena Yabeshe aya amashiwi. Ilyo baumfwile balisekelele sana.
10 E ico abena Yabeshe baebele Nahashi abati: “Mailo tukacimba kuli imwe, mukatucite conse ico mulefwaya.”+
11 Ubushiku bwakonkelepo Shauli ayakenye abantu mu mabumba yatatu, kabili baingile mu nkambi ya balwani babo mu bulinde bwa lucelo* kabili baipeye abena Amone+ mpaka akasuba kafika pa kati. Abapuswike balisalangene ica kuti takwali abalefulumuka babili babili.
12 Lyena abantu baebele Samwele abati: “Ni bani baleti, ‘Bushe Shauli e wingaba imfumu yesu?’+ Baleteni tubepaye.”
13 Lelo Shauli atile: “Tapali uo tufwile ukwipaya pali buno bushiku,+ pantu buno bushiku Yehova napususha abena Israele.”
14 Pa numa Samwele aebele abantu ati: “Natuleya ku Gilgali,+ pa kuti tuyebilisha na kabili ukuti Shauli ni mfumu.”+
15 E ico abantu bonse baile ku Gilgali, kabili babikile Shauli pa bufumu pa cinso ca kwa Yehova. Lyena batuulile Yehova+ amalambo ya mutende pa cinso cakwe, kabili Shauli na baume bonse abena Israele balisekelele nga nshi.+
Amafutunoti
^ Mu ciHebere, “ngo muntu umo.”
^ E kutila, ku ma 2 koloko ya bushiku ukufika 6 koloko ya lucelo.