Ibuuku lya Kubalilapo Ilya kwa Samwele 13:1-23
13 Shauli ali ne myaka . . .* ilyo atendeke ukuteka,+ kabili atekele abena Israele pa myaka ibili.
2 Shauli asalile abaume abena Israele 3,000. Abaume 2,000 bali na Shauli ku Mikmashi na mu citungu ca mpili ica Betele, e lyo abaume 1,000 bali na Yonatani+ ku Gibea+ iya ku Benjamini. Lyena abashelepo abebele ukuti cila muntu abwelelemo kwi tenti lyakwe.
3 Lyena Yonatani acimfishe abashilika mu nkambi ya baPelishiti+ iyali mu Geba,+ kabili abaPelishiti balyumfwile. Kabili Shauli aebele aba kulisha intandala+ mu calo conse, kabili batile: “Lekeni abaHebere bomfwe!”
4 Abena Israele bonse balyumfwile ilyashi lya kuti: “Shauli nacimfya abashilika mu nkambi ya baPelishiti, kabili nomba abaPelishiti nabapata abena Israele nga nshi.” E ico baitile abantu pa kuti bakonke Shauli ku Gilgali.+
5 AbaPelishiti nabo balilongene pa kuti balwe na bena Israele, kabili bakwete amaceleta ya nkondo 30,000 na bashilika ba pali bakabalwe 6,000 kabili bali na bashilika abengi nga nshi kwati mucanga wa ku lulamba lwa bemba.+ Lyena bailepanga inkambi mu Mikmashi ku kabanga ka Bete-abene.+
6 Ilyo abena Israele bamwene ukuti amano yapela pa mulandu wa bwafya ubukalamba ubo bakwete, abantu bafiseme mu ncengo,+ mu filindi, mu fimabwe, mu mimba na mu fishima.
7 AbaHebere bamo balyabwike fye na Yordani baya ku citungu ca Gadi ne ca Gileadi.+ Lelo Shauli ali mu Gilgali, kabili abantu bonse abo ali nabo baletutuma fye ku mwenso.
8 Shauli akonkenyepo fye ukulolela pa nshiku 7 isho Samwele alandile ukuti e shali no kupitapo pa kuti ese,* lelo Samwele tafikile ku Gilgali, kabili abantu batampile ukusalangana.
9 E ico Shauli atile: “Ndeteleni inama ya kutuula ilambo lya koca na malambo ya mutende.” Kabili atuulile ilambo lya koca.+
10 Nomba ilyo apwishishe fye ukutuula ilambo lya koca, Samwele alifikile. E ico Shauli alifumine pa kuti aye amusengele.*
11 Lyena Samwele amwipwishe ati: “Cinshi wacitila ifi?” Shauli ayaswike ati: “Ni co nacimona abantu batampa ukusalangana,+ e lyo na imwe tamwaishile pa bushiku mwali no kwishilapo, e lyo kabili abaPelishiti nabo nabalongana pa Mikmashi.+
12 E ico nacitontonkanya nati, ‘Nomba abaPelishiti balansansa kuno ku Gilgali, kabili nshilombele Yehova ukuti angafwe.’* E ico nacimona ukuti mfwile fye ukutuula ilambo lya koca.”
13 E lyo Samwele aebele Shauli ati: “Ifi wacita buwelewele. Taukonkele ifunde ilyo Yehova Lesa obe akupeele.+ Aulikonka, Yehova nga apampamika ubufumu bobe pali Israele umuyayaya.
14 Nomba ubufumu bobe tabwakabelelele.+ Yehova akafwaya umuntu uo umutima wakwe ukatemwa,+ kabili Yehova akalenga akabe intungulushi ya bantu bakwe,+ pantu iwe taukonkele ifunde ilyo Yehova akupeele.”+
15 Lyena Samwele alifumine ku Gilgali aya ku Gibea ya ku Benjamini, kabili Shauli apendele abantu, kabili abaume abo ashele nabo bali nalimo 600.+
16 Shauli no mwana wakwe Yonatani e lyo na bantu abo bashele nabo baikele mu Geba+ ya ku Benjamini. AbaPelishiti bena bapangile inkambi pa Mikmashi.+
17 Kabili amabumba yatatu aya baPelishiti yalefuma mu nkambi pa kuya mu kupokolola ifipe. Ibumba limo lyaleya ku musebo wa ku Ofra, ku calo ca Shuali;
18 ibumba limbi lyaleya ku musebo wa ku Bete-horone;+ e lyo ibumba lyalenga butatu lyaleya ku musebo wa ku mupaka uwalungatana no mupokapoka wa Seboimu, ukulola ku matololo.
19 Nomba mu calo ca Israele conse tamwali kafula wa fyela nangu umo, pantu abaPelishiti batile: “Tatulefwaya abaHebere balepanga impanga sha kulwilako na mafumo.”
20 E ico abena Israele bonse baleya ku baPelishiti nga balefwaya ukunoona amaplao, ifya kuliminako, amasembe nelyo ifikwakwa.
21 Balebalipilisha amagramu nalimo 8 aya silfere* pa kubanoonena amaplao, ifya kuliminako, ifya kutunkwilako ifya mpanda shitatu, amasembe, na pa koolola ifya kusonkwelako ing’ombe.
22 E ico lyonse nga balelwa inkondo, abantu bonse abaleba na Shauli na Yonatani+ tabalekwata impanga sha kulwilako na mafumo. Abalekwata fye ifyanso ni Shauli na Yonatani umwana wakwe.
23 Nomba ibumba lya bashilika abaPelishiti lyaile pa mupokapoka wa ku Mikmashi.+
Amafutunoti
^ Apa tapaba inamba ya myaka muli bamanyuskripiti ba ciHebere.
^ Nelyo “inshita iyo apimine.”
^ Mu ciHebere, “amupaale.”
^ Nelyo “nga nshinashishe icinso cakwe.”
^ Mu ciHebere, “pimu.” Ici cipimo ico balebomfya kale. Moneni Ifyebo Fyalundwako pa B14.
