Ibuuku lya Kubalilapo Ilya kwa Samwele 14:1-52
14 Bushiku bumo, Yonatani+ umwana wa kwa Shauli aebele umubomfi uwalemusendela ifyanso ati: “Natuleya twabukile kwi shilya ukuli inkambi ya bashilika ba baPelishiti.” Lelo taebeleko wishi.
2 Shauli aleikala ku mpela ya musumba wa Gibea+ mwi samba lya cimuti ca mapomegranate mu Migrone, kabili abantu abo ali nabo bali nalimo 600.+
3 (Kabili Ahiya umwana wa kwa Ahitubu,+ munyina Ikabode,+ umwana wa kwa Finehasi,+ umwana wa kwa Eli,+ shimapepo wa kwa Yehova mu Shilo,+ e walefwala efode.)+ Kabili abantu tabaishibe ukuti Yonatani alifuminepo.
4 Nomba apo Yonatani alefwaya ukuti apitile pa kuya kwi bumba lya baPelishiti pali ifimabwe ifyasuluka ku mbali shonse shibili. Icilibwe cimo balecita ati Bosese e lyo cimbi balecita ati Sene.
5 Icilibwe cimo icaiminine ngo luceshi cabelele ku kapinda ka ku kuso kabili calungatene na Mikmashi, e lyo cimbi cabelele ku kapinda ka ku kulyo kabili calungatene na Geba.+
6 E ico Yonatani aebele uwalemusendela ifyanso ati: “Natwabukile ku nkambi ya aba bantu abaPelishiti abashasembululwa.+ Nalimo Yehova kuti atwafwa, pantu Yehova nga alefwaya ukupususha abantu, kuti abomfya abantu abengi nangu abanono.”+
7 E lyo uwalemusendela ifyanso amwebele ati: “Citeni icili mu mutima wenu. Kabiyeni konse uko mulefwaya ukuya, kabili ine nalamukonka konse uko mwalaya.”
8 Lyena Yonatani amwebele ati: “Tuleyabukila kuli aba bantu, kabili twalayaleka batumone.
9 Nga bayatweba abati, ‘Iminineni shilili mpaka twise uko muli!’ ninshi twalayaiminina apo twalayaba, kabili tatwaye tufike kuli bena.
10 Lelo nga bayatweba abati, ‘Iseni mutulwishe!’ ninshi twalayabalwisha, pantu ici calayaba cishibilo+ ca kuti Yehova alayalenga tubacimfye.”
11 Lyena bonse babili balekele abali mu nkambi ya baPelishiti babamona. AbaPelishiti batile: “Moneni! AbaHebere balefuma mu filindi umo babeleme.”+
12 E ico abaPelishiti abali mu nkambi baebele Yonatani no walemusendela ifyanso abati: “Iseni kuno, kabili mwalacimona!”+ Ilyo line fye Yonatani aebele uwalemusendela ifyanso ati: “Nkonka, pantu Yehova alabapeela mu minwe ya bena Israele.”+
13 Kabili Yonatani aile alenina icilibwe icikalamba ku minwe na ku makasa, kabili uwalemusendela ifyanso alemukonka pa numa. Lyena Yonatani aile alekoma abaPelishiti e lyo uwalemusendela ifyanso alemukonka pa numa alebepaya.
14 Pa muku wa kubalilapo abo Yonatani no walemusendela ifyanso baipeye bali abaume nalimo 20 pa ncende* iyakulile mupepi na hafu ya hekita.
15 Lyena abaPelishiti abali mu nkambi balitiinine kabili abashilika balitutwime ku mwenso. Amabumba ya bashilika abaleya mu kupoka ifipe+ nayo yalitiinine. Isonde lyalitentele kabili Lesa alengele abaPelishiti baumfwa umwenso.
16 Abalelinda Shauli mu Gibea+ ya mu Benjamini balimwene ukuti icimfulunganya cali fye mpanga yonse+ mu nkambi ya balwani babo.
17 Shauli aebele abo ali nabo ati: “Pendeni abantu pa kuti twishibe uufuminepo.” Ilyo bapendele, basangile ukuti Yonatani no walemusendela ifyanso tabalipo.
18 Shauli nomba aebele Ahiya+ ati: “Palamika Icipao ca kwa Lesa wa cine!” (Pantu pali ilya nshita* abena Israele e bakwete Icipao ca kwa Lesa wa cine.)
19 Kabili ilyo Shauli alelanda na shimapepo, icimfulunganya icali mu nkambi ya baPelishiti calekulilako fye. Lyena Shauli aebele shimapepo ati: “Leka ifyo ulecita.”
20 E ico Shauli na bantu bonse abo ali nabo balilongene, baya na mu kulwa inkondo. Basangile abaPelishiti nabepayana ku lupanga, kabili mu nkambi mwali icimfulunganya icikalamba nga nshi.
21 Na kabili abaHebere abali ku lubali lwa baPelishiti kabili abaishile nabo mu nkambi, baishileya ku bena Israele abo Shauli na Yonatani baletungulula.
22 Ilyo abaume bonse abena Israele abafiseme+ mu citungu ca mpili ica kwa Efraimu baumfwile ukuti abaPelishiti nabafulumuka, nabo batampile ukupepeka abaPelishiti.
23 E ico baile baleipaya fye abaPelishiti mpaka ku Bete-abene.+ Pali bulya bushiku+ Yehova alipuswishe abena Israele.
24 Nomba bulya bushiku abaume abena Israele balinakile nga nshi, pantu Shauli alengele balapa umulapo wa kuti: “Abe uwatiipwa onse uulelya ifya kulya* ilyo icungulo tacilafika kabili ilyo nshilalandula abalwani bandi!” E ico takwali umuntu nangu umo uwalilepo ifya kulya.+
25 Kabili ilyo abantu bonse baishile mu mutengo, basangile ubuci pa mushili.
26 Ilyo abantu bafikile mu mutengo, bamwene uluto lwa buci luletona, lelo tapali uwaliilepo ubuci pantu baletiina umulapo.
27 Lelo Yonatani taumfwileko ilyo wishi alengele abantu balapa umulapo.+ E ico atambike inkonto no kuingisha mu cipepe ca buci. Ilyo aliile ubuci, pa menso palicelebwike.
28 E lyo umo amwebele ati: “Wiso nalenga abantu balapa ukuti, ‘Abe uwatiipwa onse uulelya ifya kulya lelo!’+ E cilengele abantu banake sana.”
29 Lelo Yonatani alandile ati: “Tata nalenga abantu mu calo bacula. Moneni ifyo pa menso pacelebuka pa mulandu wa kuti ninsonda ubu buci ubunono.
30 Kanshi abaleka abantu balyapo+ ifyo tupokolwele ku balwani besu, nga natwipaya abaPelishiti abengi.”
31 Pali bulya bushiku baile baleipaya abaPelishiti ukufuma ku Mikmashi ukufika ku Ayalone,+ kabili abantu balinakile icine cine.
32 E ico abantu basampile bufunushi bufunushi ifyo bapokele kabili basendele impaanga, ing’ombe na bana ba ng’ombe kabili bashiipaile palya pene, e lyo bashiliila kumo no mulopa.+
33 E ico baebele Shauli abati: “Moneni! Abantu balebembukila Yehova pantu balelya inama kumo no mulopa.”+ Na o atile: “Ifyo mwacita fyalanga ukuti tamuli na cishinka. Endesheni nkunkulushisheni ilibwe ilikalamba.”
34 Lyena Shauli abebele ati: “Kabiyeni mu bantu muyebeba amuti, ‘Cila muntu afwile ukuleta ing’ombe iilume ne mpaanga, kabili mwise mushipaile kuno e lyo mushilye. Mwiliila inama kumo no mulopa+ pa kuti mwibembukila Yehova.’” E ico cila muntu atwele ing’ombe iilume ubushiku kabili bashipaile pe libwe ilikalamba.
35 Kabili Shauli akuuliile Yehova iciipailo.+ Ici e ciipailo ca kubalilapo ico akuuliile Yehova.
36 Pa numa Shauli atile: “Natuleya tuyesansa abaPelishiti kabili tuyebapoka ifintu mpaka buce. Tuleyaipaya fye bonse.” E lyo abantu bamwebele abati: “Citeni conse ico mulemona ukuti e ciweme.” E ico shimapepo atile: “Natubale twipushe Lesa wa cine kuno kwine.”+
37 Kabili Shauli aipwishe Lesa ati: “Bushe ndeya mu kulwisha abaPelishiti?+ Bushe muleyalenga abena Israele bacimfye abaPelishiti?” Lelo Lesa tamwaswike pali bulya bushiku.
38 E ico Shauli atile: “Iseni kuno imwe bonse mwe bakalamba ba bantu, kabili fwailisheni pa kuti mwishibe uucitile ulubembu lelo.
39 Na pali Yehova, uwacipususha Israele, uucitile ulu lubembu nangu fye nga ni Yonatani umwana wandi, afwile ukufwa.” Lelo takwali nangu umo uwamwaswike.
40 Lyena aebele abena Israele bonse ati: “Imwe mwalaba ku lubali lumo, e lyo ine na Yonatani umwana wandi twalaba ku lubali lumbi.” E lyo abantu bamwaswike abati: “Citeni conse ico mulemona ukuti e ciweme.”
41 Lyena Shauli apepele kuli Yehova ati: “Mwe Lesa wa kwa Israele, asukeni ukupitila muli Tumimu!”+ Lyena icipendwilo caponene pali Yonatani na Shauli, lelo abantu bali bakaele.
42 Nomba Shauli atile: “Penduleni+ pali ine no mwana wandi Yonatani.” Kabili icipendwilo caponene pali Yonatani.
43 Lyena Shauli aebele Yonatani ati: “Njeba, cinshi ucitile?” E ico Yonatani amwebele ati: “Nacilyapo fye utubuci utunono uto nacibulila ku mpela ya nkonto yandi.+ Ndi pano! Nabanjipaye!”
44 E lyo Shauli amwebele ati: “Shi Lesa akukande nga nshi, pantu nangu cibe shani, Yonatani+ ufwile ukufwa.”
45 Lelo abantu baebele Shauli abati: “Bushe mulefwaya Yonatani uulengele abena Israele bacimfye,*+ afwe? Ici tacacitike! Na pali Yehova, tapali umushishi wa ku mutwe wakwe nangu umo uwalaponena panshi, pantu Lesa e wacilenga ukuti acimfye buno bushiku.”+ E fyo abantu bapokolwele* Yonatani, kabili tafwile.
46 E ico Shauli alilekele ukukonka abaPelishiti, kabili abaPelishiti baile ku calo cabo.
47 Imfumu Shauli yalikwete amaka mu Israele kabili yalelwa na balwani baiko bonse abaishingulwike. Yalwishishe abena Moabu,+ abena Amone,+ abena Edomu,+ imfumu sha Soba+ na baPelishiti;+ kabili bonse abo yalelwa nabo yalebacimfya.
48 Yalelwa ukwabula umwenso ica kuti yalicimfishe abena Amaleke+ kabili yalipokolwele abena Israele ku balebapoka ifipe.
49 Abana ba kwa Shauli abaume bali ni Yonatani, Ishibi na Malkishua.+ Alikwete na bana abanakashi babili; umukalamba ali ni Merabu+ e lyo umwaice ali ni Mikali.+
50 Umukashi wa kwa Shauli ali ni Ahinoamu umwana wa kwa Ahimaasi. Umukalamba wa bashilika bakwe ali ni Abnere+ umwana wa kwa Nere, munyina wa kwa wishi wa kwa Shauli.
51 Kishi+ e wali wishi wa kwa Shauli, kabili Nere+ wishi wa kwa Abnere ali mwana wa kwa Abiele.
52 Ilyo Shauli+ ali mfumu, inkondo isho alelwa na baPelishiti shalekosa sana. Shauli nga amona umuntu uwakosa nelyo uwashipa, alemubika mwi bumba lya bashilika bakwe.+
Amafutunoti
^ E kutila, incende iyo ing’ombe shingalima mu bushiku bumo.
^ Mu ciHebere, “bulya bushiku.”
^ Mu ciHebere, “umukate.”
^ Mu ciHebere, “balubwile.”
^ Nelyo “bapusuke.”
