Ibuuku lya Kubalilapo Ilya kwa Samwele 17:1-58
17 Kabili abaPelishiti+ balonganike abashilika babo pa kuti balwe inkondo. Balongene pa Soko+ iya mu Yuda, kabili bapangile inkambi pa kati ka Soko na Aseka,+ mu Efese-damimu.+
2 Shauli na bashilika abena Israele balilongene, bapanga ne nkambi mu Mupokapoka wa Ela,*+ kabili bali-ipekenye pa kuti balwe inkondo na baPelishiti.
3 AbaPelishiti bali ku lubali lumo ulwa lupili, abena Israele nabo bali ku lubali lwa lupili lumbi kabili pa kati pali umupokapoka.
4 Lyena mu nkambi ya baPelishiti mwafumine umushilika uwalelwilako abaPelishiti, ishina lyakwe ali ni Galyati+ uwa ku Gati.+ Alepele ukucilako panono pa mikono 6.*
5 Afwele icisote ca mukuba, kabili afwele ica kucinga icifuba ica mamba ya tufyela. Ici ica kucinga icifuba ica mukuba+ cafinine amashekele 5,000.*
6 Afwele ifya kucinga imikonso ifya mukuba kabili abikile akalifumo+ ka mukuba pa mabeya yakwe.
7 Ica kwikatilako ice fumo lyakwe cali nga kamulando ka bakapikula ba nsalu,+ kabili icilimi ce fumo lyakwe ica cela cafinine amashekele 600;* kabili uwamusendele inkwela ali pa ntanshi yakwe.
8 Lyena aliminine e lyo abilikisha abashilika ba bena Israele+ ati: “Cinshi mwatantamina pa kuti mulwe inkondo? Ine ndi mushilika umuPelishiti. Imwe muli babomfi ba kwa Shauli. Saleni umuntu uwa kuti tulwe nankwe.
9 Nga ali na maka ya kulwa na ine kabili anjipaya, ninshi tuli no kuba ababomfi benu. Lelo nga ca kuti namucimfya kabili namwipaya, ninshi muli no kuba ababomfi besu, kabili mukalatubombela.”
10 Lyena uyu muPelishiti alandile ati: “Ine ndeseebanya abashilika ba kwa Israele+ lelo. Mpeeleni umwaume wa kuti indwe nankwe!”
11 Ilyo Shauli na bena Israele bonse baumfwile aya mashiwi umuPelishiti alandile, balitiinine nga nshi kabili balisakamikwe.
12 Nomba Davidi ali mwana wa kwa Yese umwina Efrata+ uwa ku Betelehemu+ ya mu Yuda. Yese+ akwete abana abaume 8,+ kabili ilyo Shauli ali imfumu, ninshi Yese alikota.
13 Abana abaume ba kwa Yese batatu abakalamba balikonkele Shauli ku nkondo.+ Abana bakwe abaume abaile ku nkondo bali ni Eliabu+ ibeli, Abinadabu+ cikonkebeli e lyo na Shama.+
14 Davidi e wali umwaice pali bonse,+ kabili abana batatu abalipo abakalamba sana balikonkele Shauli.
15 Davidi aleya mu kucema impaanga+ sha kwa wishi ku Betelehemu, kabili alebwelela kuli Shauli.
16 Pali iyi nshita, umuPelishiti aleisa lyonse ulucelo ne cungulo pa nshiku 40, kabili aleiminina pa cifulo cimo cine.
17 Lyena Yese aebele Davidi umwana wakwe ati: “Senda itepe lya ngano* ishasalulwa ne mikate iyi 10, utwalile bwangu bwangu bamunonko mu nkambi.
18 Kabili ifi 10 ifyakosa ifyo bapangila no mukaka utwalile umukalamba we bumba lya bashilika ilyo babamo; ukayemona na bamunonko nga bali umutende, kabili ukandetele ica kwishibilako ukuti bali umutende.”
19 Shauli na bakalamba ba kwa Davidi na bena Israele bonse bali mu Mupokapoka* wa Ela,+ balelwa na baPelishiti.+
20 E ico Davidi abuukile lucelocelo, kabili aebele umo ukuti alemucemenako impaanga; lyena alongele ifyo bamupeele, aya no kuya nge fyo Yese amwebele. Ilyo afikile ku nkambi, ninshi abashilika balefuma baleya uko balelwila inkondo kabili balewelesha ukuwelesha kwa kulwa inkondo.
21 Abashilika abena Israele na baPelishiti balitanteme pa kuti balungatane.
22 Ilyo line fye Davidi ashiile ifipe ku walesunga ifipe, abutukiila no kwali abashilika. Ilyo afikile, atampile ukwipusha nga ca kuti bamunyina bali umutende.+
23 Ilyo alelanda nabo, umushilika uwalelwilako abaPelishiti alifumine, ishina lyakwe ali ni Galyati+ umuPelishiti wa ku Gati. Afumine mu bashilika abaPelishiti abatanteme kabili atampile ukulanda amashiwi yamo yene ayo alelanda lyonse,+ kabili Davidi alyumfwile.
24 Ilyo abaume abena Israele bonse bamwene uyu muntu, balifulumwike kabili balitiinine nga nshi.+
25 Abaume abena Israele balelanda abati: “Bushe namumona uyu muntu uuleisa? Esa mu kuseebanya abena Israele.+ Imfumu ikapeela umuntu uukamwipaya ifyuma ifingi, ikamupeela umwana wa iko umwanakashi+ kabili aba mu ng’anda ya kwa wishi tabakalepeela imfumu umutuulo kabili tabakalebombela imfumu ya bena Israele.”
26 Davidi aipwishe abaume abaiminine mupepi ati: “Cinshi bakacitila umuntu uukepaya ulya muPelishiti pa kuti umuseebanya ukafume pa bena Israele? Cinshi uyu umuPelishiti uushasembululwa ali pa kuti aleseebanya abashilika ba kwa Lesa wa mweo?”+
27 Lyena bamwebele amashiwi yamo yene, abati: “Ifi e fyo bakacitila umuntu uukamwipaya.”
28 Ilyo Eliabu+ umukalamba wakwe aumfwile alelanda na baume, alifuliilwe Davidi kabili amwebele ati: “Cinshi wishiile kuno? Kabili nani ushiliile impaanga shilya ishinono fye mu matololo?+ Nalishiba bwino ukuti ulaituntumba kabili nalishiba ne fyabipa ifyo upanga ukucita; wishile fye mu kutamba inkondo.”
29 E lyo Davidi atile: “Inga cinshi nalufyanya? Ndeipusha fye!”
30 E ico apilibukile kuli umbi e lyo aipusha icipusho cimo cine,+ kabili abantu bamwaswike nge fyo bamwaswike pa kubala.+
31 Kwali abaumfwile ifyo Davidi alandile kabili baile-eba Shauli. E ico Shauli atumine aba kuyaita Davidi.
32 Davidi aebele Shauli ati: “Mwileka umutima wa muntu nangu umo utompoke. Umubomfi wenu alayalwa no yu umuPelishiti.”+
33 Lelo Shauli aebele Davidi ati: “Te kuti uye mu kulwa no yu umuPelishiti pantu uli mwaice,+ ena mushilika* ukutula fye ku bwaice.”
34 Lyena Davidi aebele Shauli ati: “Bushiku bumo ilyo ne mubomfi wenu nalecema impaanga sha kwa tata kwaishile inkalamo.+ Ubushiku bumbi kwaishile bere, kabili fyonse fibili fyalisendele impaanga mu mukuni.
35 Nalifikonkele kabili nalifyumine, nafipokolola ne mpaanga. Ilyo fyanjimiine, nalifiikete pa mukoshi* e lyo nafyuma panshi. E fyo nafipeye.
36 Ne mubomfi wenu naipeye inkalamo na bere, kabili uyu umuPelishiti ushasembululwa alafwa nge fyafwile cimo pali ifi, pantu naseebanya abashilika ba kwa Lesa wa mweo.”+
37 Lyena Davidi alandile ati: “Yehova uwampuswishe ku maala ya nkalamo na ku maala ya kwa bere, e ulempususha na kuli uyu umuPelishiti.”+ E lyo Shauli aebele Davidi ati: “Kabiye kabili Yehova abe na iwe.”
38 Nomba Shauli afwikile Davidi ifya kufwala fyakwe. Amufwikile icisote ca mukuba, e lyo ne ca kucinga icifuba ica cela.
39 Lyena Davidi akakiile ulupanga lwakwe ku fya kufwala kabili aeseshe ukwenda, lelo alifililwe pantu tafibeleshe. Davidi aebele Shauli ati: “Nafilwa ukwenda, pantu ifi ifya kufwala nshafibelesha.” E ico Davidi alififuulile.
40 E lyo asendele inkonto yakwe, kabili atolele amabwe 5 ayatelela mu kamana, ayabika na mu kacola kakwe aka bukacema, kabili aikete icisukushilo cakwe.+ Lyena aile alepalama ku muPelishiti.
41 UmuPelishiti atampile ukupalama kuli Davidi, kabili uwalemusendela inkwela ali pa ntanshi yakwe.
42 Ilyo umuPelishiti amwene Davidi, alimusuulile pantu ali mwaice uwakashikila kabili alemoneka bwino.+
43 E ico umuPelishiti aebele Davidi ati: “Bushe ndi mbwa+ iya kwishila ne nkonto?” Awe umuPelishiti alapiishe Davidi mwi shina lya balesa bakwe.
44 UmuPelishiti aebele Davidi ati: “Fika, nalapeela ifyuni fya mu lwelele ne finama fya mu mpanga umubili obe.”
45 Davidi aebele umuPelishiti ati: “Iwe uleisa kuli ine no lupanga ne fumo na kalifumo,+ lelo ine ndeisa kuli iwe mwi shina lya kwa Yehova wa mabumba,+ Lesa wa bashilika ba bena Israele, uo waseebanya.+
46 Buno bwine bushiku Yehova alekupeela mu minwe yandi,+ ndekwipaya nkuputuleko no mutwe; kabili buno bushiku ndepeela ifyuni fya mu lwelele ne finama fya mu mpanga ifitumbi fya bashilika ba baPelishiti; kabili abantu bonse pano isonde balaishiba ukuti mu Israele mwaliba Lesa wa cine.+
47 Kabili bonse abalongene pano* balaishiba ukuti Yehova tapusushisha+ ku lupanga nangu kwi fumo, pantu inkondo ya kwa Yehova,+ kabili alapeela imwe bonse mu minwe yesu.”+
48 Lyena umuPelishiti aile alepalama kuli Davidi, lelo Davidi alyangufyenye ukubutukila ukwali abalwani pa kuti aye alwe no muPelishiti.
49 Davidi abulile ilibwe mu kacola e lyo alisukushila ku cisukushilo. Atobele umuPelishiti pa mpumi kabili ilibwe lyalingiile pa mpumi, umuPelishiti awa no bukupeme.+
50 E fyo Davidi acimfishe umuPelishiti. Amwipaile ku cisukushilo ne libwe nangu ca kuti takwete ulupanga.+
51 Davidi atwalilile ukubutuka, ayaiminina na pa muPelishiti. Lyena asomwene ulupanga lwa muPelishiti+ mu cikwama ca luko amuputulako no mutwe pa kuti amwipailile. Ilyo abaPelishiti bamwene ukuti impalume yabo yafwa, balifulumwike.+
52 E lyo abena Israele na bena Yuda batendeke ukuwelesha, kabili bakonkele abaPelishiti ukufuma ku mupokapoka+ ukufika ku mpongolo ya Ekrone.+ Ifitumbi fya baPelishiti fyali fye mu nshila ukufuma ku Shaarimu,+ ukufika ku Gati, ukuyafika fye na ku Ekrone.
53 Ilyo abena Israele babwelele mu kukonka abaPelishiti, basendele ifipe fyonse ifya mu nkambi sha baPelishiti.
54 Lyena Davidi asendele umutwe wa muPelishiti kabili autwele ku Yerusalemu, lelo ifyanso fya muPelishiti fyena afibikile mwi tenti lyakwe.+
55 Ilyo Shauli amwene Davidi aleya mu kulwa no muPelishiti, aipwishe Abnere+ umukalamba wa bashilika ati: “Abnere, bushe ulya mulumendo mwana wa kwa nani?”+ Abnere ayaswike ati: “Mwe mfumu, ndelapa, na pali imwe bene,* nshishibe!”
56 Imfumu yamwebele aiti: “Fwailisha, pa kuti twishibe wishi wa uyu mulumendo.”
57 E ico ilyo Davidi abwelele fye mu kwipaya umuPelishiti, Abnere amutwele kuli Shauli, ninshi nasenda no mutwe wa muPelishiti+ mu minwe yakwe.
58 Nomba Shauli amwipwishe ati: “Mulumendo, uli mwana wa kwa nani?” Davidi na o ayaswike ati: “Ndi mwana wa mubomfi wenu Yese+ umwina Betelehemu.”+
Amafutunoti
^ Nelyo “Impanga Iyabatama.”
^ Alepele mupepi na mamita yatatu. Moneni Ifyebo Fyalundwako pa B14.
^ Nalimo amakilogramu 57. Moneni Ifyebo Fyalundwako pa B14.
^ Mupepi na makilogramu 7. Moneni Ifyebo Fyalundwako pa B14.
^ Nelyo “barle.”
^ Nelyo “Impanga Iyabatama.”
^ Nelyo “umwaume wa nkondo.”
^ Nelyo “mu mubango.” Mu ciHebere, “ku mwefu.”
^ Mu ciHebere, “ulukuta lonse ulu lwalaishiba.”
^ Nelyo “ndelapa, na pa mweo wenu.”
