Ibuuku lya Kubalilapo Ilya kwa Samwele 18:1-30
18 Ilyo Davidi apwishishe fye ukulanda na Shauli, Yonatani+ na Davidi baishileba ifibusa sana,* kabili Yonatani atampile ukutemwa Davidi nge fyo aitemenwe umwine.*+
2 Ukutula bulya bwine bushiku, Shauli atampile ukusunga Davidi, kabili tamusuminishe ukubwelela ku ng’anda ya kwa wishi.+
3 Kabili Yonatani na Davidi bapangene icipangano,+ pantu amutemenwe nge fyo aitemenwe umwine.*+
4 Yonatani afuulile ica kufwala cabula amaboko apeela Davidi, pamo ne fya kufwala fyakwe ifya bushilika, ulupanga lwakwe, ubuta bwakwe no mushipi wakwe.
5 Davidi atampile ukuya mu kulwa inkondo, kabili konse uko Shauli alemutuma ifintu fyale-enda bwino.*+ E ico Shauli amupeele umulimo wa kutungulula abashilika,+ kabili ifi fyalengele abantu bonse na babomfi ba kwa Shauli batemwe.
6 Nomba lyonse Davidi na bashilika bambi nga babwela mu kwipaya abaPelishiti, abanakashi balefuma mu misumba yonse iya mu Israele pa kuti bayesengela Imfumu Shauli. Balesekelela, baleimba,+ balecinda kabili balelisha utuoma+ ne filimba fya nsale shitatu.
7 Abanakashi abalesefya baleimba abati:
“Shauli aipaya abalwani 1,000,Davidi ena aipaya abalwani 10,000.”+
8 Ifi fyalengele Shauli akalipe nga nshi,+ kabili tatemenwe ulwimbo baleimba pantu atile: “Baleti Davidi aipaya abalwani 10,000, lelo ine baleti naipaya fye abalwani 1,000. Icashalako fye kumupeela ubufumu!”+
9 Ukufuma bulya bushiku, Shauli aletunganya Davidi ukuti alefwaya ukumufumya pa bufumu.
10 Ubushiku bwakonkelepo Lesa alekele umupashi wabipa waisa pali Shauli,+ kabili atampile ukucita kwati nafulungana* mu ng’anda, ninshi Davidi alelisha nsango+ nge fyo alecita inshiku shimbi. Shauli alikete ifumo,+
11 kabili pa miku ibili apoosele ifumo+ pa kuti alase Davidi pantu mu mutima wakwe aleti: “Nalapampamina Davidi ku cibumba!” Lelo Davidi aleleuka.
12 Lyena Shauli atendeke ukutiina Davidi pantu Yehova ali nankwe,+ lelo alilekele ukuba na Shauli.+
13 E ico Shauli aebele Davidi ukuti aleke ukumubombela kabili amusontele ukuba umukalamba wa bashilika 1,000, kabili aletungulula abashilika mu nkondo.+
14 Fyonse ifyo Davidi alecita fyale-enda bwino,*+ kabili Yehova ali nankwe.+
15 Kabili ilyo Shauli amwene ukuti ifyo Davidi alecita fyale-enda bwino, atampile ukumutiina.
16 Lelo abena Israele na bena Yuda bonse balitemenwe Davidi, pantu alebatungulula mu nkondo.
17 Pa numa Shauli aebele Davidi ati: “Mona Merabu+ umwana wandi umukalamba pa bana bandi bonse abanakashi. E o nkakupeela pa kuti akabe umukashi obe.+ Lelo ufwile ukutwalilila ukuba uwashipa pa kumombela kabili ulelwa inkondo sha kwa Yehova.”+ Pantu Shauli alelanda mu mutima ati: ‘Nshilefwaya ukwipaya Davidi, ndefwaya abaPelishiti e bo bakamwipaye.’+
18 E lyo Davidi aebele Shauli ati: “Nine nani kabili balupwa ba kwa tata ni bani mu Israele, pa kuti imbe shifyala wa mfumu?”+
19 Lelo ilyo inshita ya kuti bofye Merabu umwana wa kwa Shauli kuli Davidi yafikile, basangile ukuti balimufishe kale kuli Adriele+ umwina Meholati.
20 Nomba Mikali+ umwana mwanakashi wa kwa Shauli, alitemenwe Davidi, kabili kwali abaebele Shauli ifi. Ilyo Shauli aumfwile ifi alitemenwe.
21 E ico Shauli atile: “Pa kumubeleleka, nalamupeela umwana wandi umwanakashi pa kuti abaPelishiti bakamwipaye.”+ Lyena Shauli aebele Davidi umuku walenga bubili ati: “Walaba umupongoshi wandi lelo.”
22 Kabili Shauli aebele ababomfi bakwe ati: “Ebeni Davidi mu bumfisolo amuti, ‘Umfwa! Imfumu yalikutemwa sana, kabili ababomfi ba iko bonse nabo balikutemwa. Kanshi upa fye umwana wa mfumu.’”
23 Ilyo ababomfi ba kwa Shauli baebele Davidi aya mashiwi, Davidi abebele ati: “Bushe mulemona ukuti ne muntu yaweyawe kabili uwasuulwa,+ kuti naba shifyala wa mfumu?”
24 Lyena ababomfi ba kwa Shauli bailemweba abati: “Ifi ne fi e fyo Davidi alandile.”
25 E lyo Shauli abebele ati: “Ifi e fyo mufwile ukuyaeba Davidi, ‘Imfumu tailefwaya impango+ iyo, ico ilefwaya fye ni nkanda 100 isha ku mpela ya bwaume+ bwa baPelishiti, pa kuti imfumu ilandule abalwani ba iko.’” Ico Shauli acitiile ifi ni co alefwaya abaPelishiti e bo bepaye Davidi.
26 E ico ababomfi bakwe baile-eba Davidi aya mashiwi, kabili Davidi alitemenwe ukuba shifyala wa mfumu.+ Ilyo inshita ya kutwalilamo ifyo imfumu yalefwaya ishilapwa,
27 Davidi alimine na bashilika abo aletungulula kabili baileipaya abaume abaPelishiti 200. Kabili Davidi atwalile imfumu inkanda sha ku mpela ya bwaume bwabo shonse, pa kuti abe shifyala wa mfumu. E ico Shauli amupeele Mikali umwana wakwe pa kuti abe umukashi wakwe.+
28 Shauli alilwike ukuti Yehova ali na Davidi.+ Alilwike no kuti Mikali umwana wakwe alitemenwe Davidi.+
29 Ifi fyalengele Shauli acilemo ukutiina Davidi, kabili Shauli aishileba umulwani wa kwa Davidi inshiku shonse isho ali uwa mweo.+
30 Bacilolo ba baPelishiti baleya mu kulwa inkondo, nomba lyonse nga baya ku nkondo, Davidi alecimfya* ukucila ifyo ababomfi ba kwa Shauli+ bambi balecimfya; kabili abantu balimucindike nga nshi.+
Amafutunoti
^ Nelyo “nge fyo atemenwe umweo wakwe.”
^ Nelyo “umweo wa kwa Yonatani waikatene no mweo wa kwa Davidi.”
^ Nelyo “nge fyo atemenwe umweo wakwe.”
^ Nelyo “alebomba bwino.”
^ Nelyo “alecita kwati ni kasesema.”
^ Nelyo “alebomba bwino.”
^ Nelyo “alebomba bwino.”