Ibuuku lya Kubalilapo Ilya kwa Samwele 2:1-36
2 Lyena Hana apepele ati:
“Umutima wandi ulasekelela nga natontonkanya pali Yehova;+Yehova e wimya ulusengo* lwandi.
Na-asamuna akanwa pa kwasuka abalwani bandi,Pantu ndasekelela pa fyo mupususha.
2 Takwaba uwa mushilo nga Yehova,Takwaba umbi kano fye imwe,+Kabili takwaba icilibwe icaba nga Lesa wesu.+
3 Lekeni ukulanda amashiwi ya kuitutumuna;Mwileka mu tunwa twenu mufume amashiwi ya matutumuko,Pantu Yehova, ni Lesa uwaishiba fyonse,+Kabili e wishiba fyonse ifyo abantu bacita nampo nga fisuma nelyo fibi.
4 Amata ya baume ba maka ayakontaula,Lelo abanaka* abapeela amaka.+
5 Abalya bwino, nomba bafwile ukuya mu kubombela ifya kulya,Lelo aba nsala tabali ne nsala na kabili.+
Uushikwata abana, afyala abana abaume 7,+Lelo uwakwete abana abaume abengi ashala fye eka.
6 Yehova alikwata amaka ya kwipaya na maka ya kupususha;*Alikwata amaka ya kutwala ku Nshiishi,* na maka ya kubuusha.+
7 Yehova alikwata amaka ya kulenga umuntu aba umupiina na ya kulenga aba umukankaala;+Kuti awisha umuntu, kabili kuti amwimya.+
8 Alemya abashacindama mu lukungu;Alemya umupiina pa mwina wa mito,*+Pa kuti bekale pamo na bakankaala,Abateka pa cipuna ca bukata.
Inceshi ishatungilila+ isonde sha kwa Yehova,Kabili epo abika icalo.
9 Atungulula amakasa ya baba ne cishinka,+Lelo ababifi, akabonawila mu mfifi,+Pantu umuntu tacimfisha ku maka yakwe.+
10 Yehova akashonaula abamulwisha;*+Akababulukutila ukufuma mu muulu.+
Yehova akapingula isonde lyonse,+Akapeela imfumu yakwe amaka,+Kabili akemya ulusengo* lwa wasubwa wakwe.”+
11 Lyena Elkana aile ku ng’anda ku mwakwe ku Rama, lelo Samwele ashele alebombela Yehova,+ kabili shimapepo Eli e walemutungulula.
12 Nomba abana baume+ ba kwa Eli balecita ifyabipa; balisuulile Yehova.
13 Ifi e fyo balecita ilyo inama iyo abantu+ balingile ukupeela bashimapepo ilepya: Lyonse umuntu nga alepeela ilambo, umubomfi wa kwa shimapepo aleisa ne ca kutunkwilako ica mpanda shitatu,
14 kabili aletunkula ica kutunkwilako mu nongo iikalamba, mu mpoto iyakwata ifya kwikatilako fibili, mu mpoto iikalamba nelyo mu mpoto iyakwata ica kwikatilako cimo. Lyena umunofu uo ica kutunkwilako calasamo, e o shimapepo alebuula. Ifi fine e fyo balecita abena Israele bonse abaleya ku Shilo.
15 Na kabili ilyo bashilaoca amafuta pa kuti yafutumune icushi,+ umubomfi wa kwa shimapepo aleisa ku ulepeela ilambo no kumweba ati: “Mpeela inama ya koca iya kwa shimapepo. Shimapepo tasumine ukupoka iyaipikwa, kano iibishi.”
16 Nga ca kuti uulepeela ilambo amweba ati: “Leka batale boce amafuta pa kuti yafutumune icushi,+ e lyo ubuulepo umunofu uo ulefwaya,”* aleasuka ati: “Awe mpeela ili line; nga tawampeele nalapoka ku maka!”
17 E ico ulubembu lwa babomfi lwalikulile nga nshi mu menso ya kwa Yehova,+ pantu aba bantu balisuulile umutuulo wa kwa Yehova.
18 Nomba Samwele alebombela+ Yehova, kabili alefwala* efode ya nsalu+ nangu ca kuti ali umwaice.
19 Kabili cila mwaka nyina alemubilila ica kufwala icabula amaboko kabili alemutwalila nga aya no mulume wakwe mu kupeela ilambo lya pa mwaka.+
20 Lyena Eli apaalile Elkana no mukashi wakwe kabili aebele Elkana ati: “Shi Yehova akupeele umwana muli uyu mukashi obe uwa kupyana pa mwana uo mwa-ashimisha Yehova.”+ Pa numa balibwelelemo ku mwabo.
21 Yehova alibukishe Hana kabili alengele afyala+ abana abaume batatu na bana abanakashi babili. Kabili umwaice Samwele alekulila pa cinso ca kwa Yehova.+
22 Nomba Eli alikotele sana, lelo alyumfwile fyonse ifyo abana bakwe abaume balecita+ ku bena Israele bonse ne fyo balelaala na banakashi abalebombela pa mwinshi we tenti lya kukumaninamo na Lesa.+
23 Alebeba ati: “Cinshi mucitila ifintu fya musango uyu? Pantu ifyo abantu bonse balelanda pali imwe tafiweme.
24 Awe bana bandi, ilyashi ndeumfwa ilyo abantu ba kwa Yehova balesalanganya, taliweme.
25 Umuntu nga abembukila umuntu munankwe, umuntu umbi kuti amupaapaatilako* kuli Yehova pa kuti amwafwe; lelo umuntu nga abembukila Yehova,+ nani engamupepelako?” Lelo tabaleumfwa ifyo shibo alebeba pantu Yehova alefwaya ukubepaya.+
26 Pali ilya nshita umwaice Samwele alekula iciimo, kabili Yehova alemutemenwako na bantu nabo balemutemenwako.+
27 Kwali umuntu wa kwa Lesa uwaile kuli Eli no kumweba ati: “Ifi e fyo Yehova alanda: ‘Bushe nshaisokolwele ku ba mu ng’anda ya cikolwe cobe ilyo aba mu ng’anda ya kwa Farao+ babatekele ubusha mu Egupti?
28 Kabili nasalile icikolwe cobe pa mikowa yonse iya kwa Israele+ pa kuti abe shimapepo wandi kabili aleya pa ciipailo+ candi, pa kuti aletuula amalambo, aleoca ububani,* alesenda na efode pa cinso candi. Napeele na ba mu ng’anda ya cikolwe cobe imituulo yonse iya pa mulilo iyo abena Israele*+ batuula.
29 Cinshi musaalwila* amalambo yandi ne mituulo iyo nalanda ukuti muletuula mu ng’anda yandi iya mushilo?+ Cinshi ucindikila abana bobe ukucila ine? Cinshi mwainina? Bushe te pa mulandu wa kuti mulalya ifipande ifyawamisha ifya mituulo yonse iyo abantu bandi abena Israele batuula?+
30 “‘E co Yehova Lesa wa kwa Israele alandila ukuti: “Kwena nalilandile ukuti aba mu ng’anda yobe na ba mu ng’anda ya cikolwe cobe bakamombela umuyayaya.”+ Lelo nomba Yehova alanda ati: “Calaala capwa, tacakabe ifi pantu abancindika e bo nkacindika,+ lelo abansuula na ine nkabasuula.”
31 Mona! Inshiku shileisa ilyo nkapwisha amaka* yobe na maka ya ba mu ng’anda ya kwa wiso, pa kuti mu ng’anda yobe mwikaba umuntu uukafika ku bukote.+
32 Ilyo nkalacitila abena Israele ifisuma,+ ukamona umulwani mu ng’anda yandi iya mushilo, kabili mu ng’anda yobe tamwakatale amuba umukote.
33 Uukatuntuka muli iwe uo nkasuminisha ukutwalilila ukubombela pa ciipailo candi, akalenga amenso yobe yakonaike kabili akalenga ukabe no bulanda,* lelo aba mu ng’anda yobe abengi bakabepaya ku lupanga.+
34 Kabili pa kuti ushininkishe ukuti ifyo ndekweba fya cine, nkakulanga ici icishibilo: Abana bobe babili, Hofini na Finehasi bakafwa+ mu bushiku bumo bwine.
35 Lyena nkaisalila shimapepo wa cishinka.+ Akalacita ifyo umutima wandi ufwaya;* kabili nkamukuulila ing’anda iikatwalilila ukubako, kabili akabombela uwasubwa wandi inshiku shonse.
36 Bonse abakashalako pa ba mu ng’anda yobe bakesamubombela pa kuti bakwate indalama ishinono no mukate, kabili bakatila: “Shi mpeeniko umulimo wa bushimapepo pa kuti ndelyako akamokolwa ka mukate.”’”+
Amafutunoti
^ Nelyo “amaka.” Moneni Amashiwi ya mu Baibo ne fyo Yapilibula.
^ Nelyo “abaleipununa.”
^ Nelyo “amaka ya kubuusha.”
^ Nelyo “Sheol,” e kutila inshiishi ya bantu bonse. Moneni Amashiwi ya mu Baibo ne fyo Yapilibula.
^ Nelyo kuti yapilibula no kuti, “pa cishala.”
^ Nelyo kuti lyalola na mu kuti, “Abalwishanya na Yehova bakaba no mwenso.”
^ Nelyo “amaka.” Moneni Amashiwi ya mu Baibo ne fyo Yapilibula.
^ Nelyo “uo umweo obe ulefwaya.”
^ Mu ciHebere, “aleikaka.”
^ Nelyo kuti lyapilibula no kuti, “Lesa kuti amulubulwilako.”
^ Mu ciHebere, “abana abaume aba kwa Israele.”
^ Nelyo kuti lyapilibula no kuti, “alelenga icushi ca malambo cileya mu muulu.”
^ Mu ciHebere, “mupantila.”
^ Mu ciHebere, “ukuboko kobe.”
^ Nelyo “akalenga umweo obe ukanake sana.”
^ Nelyo “ifili mu mutima wandi ne fili mu mweo wandi.”
