Ibuuku lya Kubalilapo Ilya kwa Samwele 20:1-42
-
Yonatani ali uwa cishinka kuli Davidi (1-42)
20 Lyena Davidi alifulumwike ku Nayote mu Rama. Ilyo aishile kuli Yonatani amwebele ati: “Cinshi nacita?+ Cinshi nalufyanya, kabili lubembu nshi nabembukila bawiso pa kuti balefwaya ukunjipaya?”*
2 E lyo Yonatani amwebele ati: “Ico te kuti cicitike!+ Tabakakwipaye. Umfwa! Batata te kuti bacite nangu cimo nampo nga cikalamba nelyo nga cinono ukwabula ukunjebako. Mulandu nshi batata bengamfishila icintu ca musango yu? Ici tacakacitike.”
3 Lelo Davidi alilapile na kabili ati: “Nangu cibe shani, bawiso balishiba ukuti walintemwa,+ e ico kuti batila, ‘Mwileka Yonatani eshibe ifyo ndepanga ukucita pantu kuti akalipa.’ Lelo ndelapa, na pali Yehova kabili na pali iwe wine,* ndi fye mupepi no kufwa!”+
4 Lyena Yonatani aebele Davidi ati: “Conse ico walanjeba* nalakucitila.”
5 Davidi aebele Yonatani ati: “Mailo umweshi+ ukamoneka, kabili mfwile ukwikala ne mfumu pa kuti nkaliile pamo nayo. Nomba natucite ifi: Leka njefisama mu mpanga mpaka ubushiku bwalenga shitatu icungulo.
6 Bawiso nga bamona ukuti nshilipo, ukabebe auti, ‘Davidi alilombele ulusa pa kuti aye bwangu bwangu ku Betelehemu+ ku musumba wa ku mwabo, pantu alefwaya ukuyaba pamo no lupwa lwakwe pa kutuula ilambo lya lupwa ilya pa mwaka.’+
7 Nga bakatila, ‘Cili fye bwino,’ ninshi ne mubomfi obe napusuka. Lelo nga bakakalipa, ninshi ukeshibe fye ukuti balafwaisha ukuncita icabipa.
8 Langa ne mubomfi obe+ ukutemwa ukushipwa, pantu naupangana na ine icipangano+ pa cinso ca kwa Yehova. Lelo nga nalilufyanya,+ njipaya iwe wine. Cinshi wingantwalila kuli bawiso?”
9 Yonatani amwebele ati: “Te kuti ncite ifi! Nga naishiba ukuti batata balefwaya ukukucita icabipa, bushe kuti nakaana ukukweba?”+
10 Lyena Davidi aebele Yonatani ati: “Nani akanjeba nga ca kuti bawiso bakaasuka bukali bukali nelyo iyo?”
11 Yonatani aebele Davidi ati: “Natuleya mu mpanga.” E ico bonse babili baile mu mpanga.
12 Yonatani aebele Davidi ati: “Yehova Lesa wa kwa Israele abe kambone nga ca kuti mailo ino ine nshita nelyo bulya bushiku nshakatempe batata. Nga ca kuti bacili nabakutemwa nkakutumina amashiwi pa kuti ukeshibe.
13 Lelo nga ca kuti batata balefwaya ukukucita icabipa, Yehova akankande sana nga nshakakwebe pa kuti ukafulumuke ukaye umutende. Shi Yehova engaba na iwe+ nge fyo ali na batata.+
14 Kabili ukanange ukutemwa ukushipwa ukwa kwa Yehova ilyo ncili no mweo na lintu nkafwa.+
15 Wikaleka ukulanga aba mu ng’anda yandi+ ukutemwa ukushipwa na lintu Yehova akalofya abalwani ba kwa Davidi bonse pano isonde.”
16 E ico Yonatani apangene icipangano na ba mu ng’anda ya kwa Davidi. Atile, “Pali ici cipangano Yehova akakandilapo abalwani ba kwa Davidi.”
17 E lyo Yonatani aebele Davidi ukuti alape na kabili pa mulandu wa kuti alimutemenwe, pantu Yonatani atemenwe Davidi nge fyo aitemenwe umwine.*+
18 Lyena Yonatani amwebele ati: “Mailo umweshi ukamoneka,+ kabili bakamona ukuti taulipo, pantu apo wikala tapakabe umuntu.
19 Pa bushiku bwalenga shitatu e lyo bakeshiba sana ukuti taulipo, kabili ufwile ukwisa ku ncende uko waishilefisama bulya bushiku,* kabili ukeseikala mupepi ne li libwe.
20 Nkapoosa imifwi itatu mupepi ne li ilibwe, nkaipoosa kwati ndelasa cimo.
21 Nga natuma umubomfi wandi, nkamweba nati, ‘Kabiye kasende imifwi.’ Nga naeba umubomfi wandi nati, ‘Mona! Imifwi ili uku ku lubali lobe, toola,’ lyena kuti wabwela, pantu ndelapa na pali Yehova ukuti ninshi ifintu fili fye bwino kabili ninshi takuli ica kutiina.
22 Lelo nga naeba umulumendo nati, ‘Mona! Imifwi ili ku ntanshi yobe,’ ninshi ukaye, pantu ninshi Yehova alefwaya ukuti uleya.
23 Yehova akatwalilila+ ukuba kambone wa cipangano ico iwe na ine twapangana.”+
24 E ico Davidi alifiseme mu mpanga. Ilyo umweshi wamoneke, imfumu yalikele apo yaleikala pa kuti ilye ifya kulya.+
25 Imfumu yaikele apo yaleikala lyonse mupepi ne cibumba. Yonatani aloshenye ne mfumu, e lyo Abnere+ aikele ku mbali ya kwa Shauli, lelo apaleikala Davidi tapali muntu.
26 Shauli talandile nangu cimo pali bulya bushiku, pantu aletontonkanya ati: ‘Pali icicitike icilengele ukuti abe uushasanguluka.+ Afwile nakowela.’
27 Ubushiku bwakonkele pa bushiku umweshi wamoneke, apaleikala Davidi tapaikele umuntu. Lyena Shauli aebele Yonatani umwana wakwe ati: “Mulandu nshi umwana wa kwa Yese+ ashishile mu kulya pali ishi nshiku shibili, lelo na mailo?”
28 Yonatani aebele Shauli ati: “Davidi alinombele ulusa pa kuti aye ku Betelehemu.+
29 Anjebele ati, ‘Shi leka ndeya ku musumba pantu ulupwa lwesu luletuula ilambo, kabili munyinane e wanjitile. E ico nga wansuminisha, leka ndeya mu kumona bamunyinane.’ E co ashishile mu kulya ne mfumu.”
30 E ico Shauli afuliilwe Yonatani kabili amwebele ati: “We mwana wa mwanakashi cipondoka we, bushe ulemona kwati nshaishiba ukuti ufwaya ukuba ku lubali lwa mwana wa kwa Yese? Ifi ucita fikalenga iwe na banoko mukaseebane.*
31 Inshita yonse iyo umwana wa kwa Yese akaba no mweo pano isonde, ubufumu bobe tabwakatwalilile.+ Nomba tuma abakuyamuleta, pantu afwile ukufwa.”+
32 Lelo Yonatani aebele Shauli wishi ati: “Mulandu nshi alefwila?+ Cinshi alufyenye?”
33 E lyo Shauli apoosele ifumo pa kuti amulase,+ e ico Yonatani alishibe ukuti wishi alefwaisha ukwipaya Davidi.+
34 Ilyo line fye Yonatani alimine pe tebulo ninshi nakalipa, kabili taliile ifya kulya pa bushiku bwalenga shibili ukutula apo umweshi wamonekeele, pantu ali no bulanda pa mulandu wa kwa Davidi,+ na pa mulandu wa kuti wishi alimuseebenye.
35 Ulucelo Yonatani aile mu mpanga nga fintu apangene na Davidi, kabili ali no mubomfi wakwe umulumendo.+
36 Kabili aebele umubomfi wakwe ati: “Butuka, katoole imifwi iyo ndepoosa.” Umubomfi wakwe alibutwike. Lyena apoosele umufwi ica kuti wacilile umubomfi wakwe.
37 Ilyo umubomfi wakwe afikile apali umufwi uo Yonatani apoosele, Yonatani amubilikishe ati: “Imifwi ili ku ntanshi yobe.”
38 Kabili amubilikishe ati: “Endesha! Angufyanya! Wishingashinga!” E ico umubomfi wa kwa Yonatani atoolele imifwi e lyo abwelela kuli shikulu wakwe.
39 Umubomfi wakwe taishibe nangu cimo; Yonatani na Davidi e baishibe icalecitika.
40 Lyena Yonatani apeele umubomfi wakwe ifyanso fyakwe e lyo amweba ati: “Fibwekeshe ku musumba.”
41 Ilyo umubomfi wakwe aile, Davidi alisokolweke lwa mupepi fye apo abeleme ku kapinda ka ku kulyo. Lyena alifukeme e lyo afisha impumi panshi imiku itatu. Bali-itomwene kabili balililile. Lelo Davidi e walilile sana.
42 Yonatani aebele Davidi ati: “Kabiye umutende, apo bonse babili natulapa+ mwi shina lya kwa Yehova atuti, ‘Yehova abe kambone pali iwe na ine, na pa bana* bandi na bana* bobe umuyayaya.’”+
Lyena Davidi alile, kabili Yonatani alibwelelemo ku musumba.
Amafutunoti
^ Nelyo “ukwipaya umweo wandi.”
^ Nelyo “na pali umweo obe.”
^ Nelyo “ico umweo obe walanjeba.”
^ Nelyo “ngo mweo wakwe.”
^ Mu ciHebere, “ubushiku bwa kubombamo imilimo.”
^ Mu ciHebere, “uleseebanya ubwamba bwa kwa noko.”
^ Mu ciHebere, “lubuto lwandi.”
^ Mu ciHebere, “lubuto lobe.”
