Ibuuku lya Kubalilapo Ilya kwa Samwele 23:1-29
23 Mu kupita kwa nshita, kwali abaileshimikila Davidi abati: “AbaPelishiti balelwa na bena Keila,+ kabili balepokolola ne fya kulya fyabo.”
2 E ico Davidi aipwishe Yehova+ ati: “Bushe njeipaya aba abaPelishiti?” Yehova amwaswike ati: “Kabiye kabepaye pa kuti upusushe abena Keila.”
3 Lelo abaume abo Davidi ali nabo bamwebele abati: “Moneni! Apo tuletiina ilyo tuli muno mu Yuda;+ ninshi cikacilapo nga twaya ku Keila mu kulwa na bashilika ba baPelishiti!”+
4 E ico Davidi alipwishe Yehova na kabili.+ Nomba Yehova amwaswike ati: “Ima; kabiye ku Keila pantu nalapeela abaPelishiti mu minwe yobe.”+
5 Lyena Davidi aile na baume abo ali nabo ku Keila kabili alwile na baPelishiti; alibapokele ifitekwa, kabili alipeye abantu abengi. E fyo Davidi apuswishe abena Keila.+
6 Nomba ilyo Abiatari+ umwana wa kwa Ahimeleke abutukiile kuli Davidi ku Keila, alisendele efode.
7 Kwali abaebele Shauli abati: “Davidi naisa ku Keila.” Lyena Shauli alandile ati: “Lesa namupeela* mu minwe yandi,+ pantu ifi engile mu musumba uwa malinga ne mipindo, naisalila umwine.”
8 E ico Shauli aitile abashilika bakwe bonse pa kuti bayeshinga Davidi na baume bakwe abali mu Keila.
9 Ilyo Davidi aishibe ukuti Shauli alepanga ukumusansa, aebele Abiatari shimapepo ati: “Palamika efode kuno.”+
10 Lyena Davidi alandile ati: “Mwe Yehova Lesa wa kwa Israele, ne mubomfi wenu ning’umfwa ukuti Shauli alefwaya ukwisaonaula umusumba wa Keila pa mulandu wandi.+
11 Bushe intungulushi* sha bena Keila shikampeela mu minwe yakwe? Bushe Shauli ali no kwisa nga fintu ne mubomfi wenu ng’umfwile? Mwe Yehova Lesa wa kwa Israele, shi njebeni.” E lyo Yehova amwebele ati: “Akesa.”
12 Davidi aipwishe ati: “Bushe intungulushi sha bena Keila shikapeela ine na baume abo ndi nabo mu minwe ya kwa Shauli?” Yehova amwaswike ati: “Bakamupeela mu minwe yakwe.”
13 Ilyo line fye Davidi na baume abo ali nabo abali nalimo 600,+ balifumine mu Keila balaendauka fye. Ilyo bamo baebele Shauli ukuti Davidi alifumine mu Keila, taileko.
14 Davidi aikele mu matololo mu ncende ishafisama, mu citungu ca mpili mu matololo ya Sifi.+ Shauli alemufwayafwaya fye inshiku shonse,+ lelo Yehova tapeele Davidi mu minwe yakwe.
15 Ilyo Davidi ali mu matololo ya Sifi mu Horesha, alishibe ukuti* Shauli alemufwaya pa kuti amwipaye.*
16 Nomba Yonatani umwana wa kwa Shauli aile ku Horesha ukwali Davidi kabili alimukoseleshe* pa kuti atetekele sana Yehova.+
17 Amwebele ati: “Wisakamana, pantu batata tabakakwikate; ukaba imfumu pali Israele,+ e lyo ine nkaba inkonkani yobe; kabili batata balishiba ifi.”+
18 Lyena bonse babili bapangene icipangano+ pa cinso ca kwa Yehova, kabili Davidi aikele mu Horesha, Yonatani ena alibwelelemo ku mwakwe.
19 Pa numa abena Sifi baile kuli Shauli ku Gibea+ kabili bamwebele abati: “Davidi abelama mupepi na ifwe+ ku ncende ishafisama mu Horesha,+ pa kapili ka Hakila,+ akabela ku kapinda ka ku kulyo* aka Yeshimone.*+
20 Lyonse ilyo mwe mfumu mukafwaya* ukwisa, mukese kabili tukesapeela Davidi mu minwe yenu mwe mfumu.”+
21 E lyo Shauli alandile ati: “Yehova engamupaala, pantu mwanangulukilako.
22 Shi kabiyeni, muyefwailisha uko abelama. Muyefwailisha na bamumwene pantu balinjeba ukuti alicenjela sana.
23 Muyefwailisha bwino monse umo abelama e lyo mukesenjeba ifyo mukayasanga. Lyena nkaya na imwe, kabili nga ca kuti aba muli cino cine calo, nkamufwayafwaya mu ndupwa* shonse isha kwa Yuda.”
24 E ico bashile Shauli batangilako ku Sifi,+ ninshi Davidi na baume abo ali nabo bali mu matololo ya Maone+ mu Araba+ ku kapinda ka ku kulyo aka Yeshimone.
25 Lyena Shauli na baume bakwe balile mu kumufwaya.+ Ilyo bamo baebele Davidi ukuti Shauli alemufwaya, ilyo line atentemukile ku cilibwe+ kabili aikele mu matololo ya Maone. Ilyo Shauli aumfwile ifi, akonkele Davidi mu matololo ya Maone.
26 Ilyo Shauli afikile ku lubali lumo ulwa lupili, Davidi na baume abo ali nabo bali ku lubali lumbi ulwa lupili. Davidi alyangufyenye pa kuti afulumuke+ Shauli, lelo Shauli na baume abo ali nabo balepalamina kuli Davidi na baume abo ali nabo pa kuti babekate.+
27 Lelo kwali uo batumine kuli Shauli uwailemweba ati: “Angufyanyeni ukubwela pantu abaPelishiti nabasansa icalo!”
28 Lyena Shauli alilekele ukukonka Davidi+ kabili aile mu kulwa na baPelishiti. E co bainikile ilya incende ukuti Icilibwe ca Malekano.
29 Lyena Davidi alifumineko aya na mu kwikala mu ncende ishafisama ku En-gedi.+
Amafutunoti
^ Mu ciHebere, “namushitisha mu minwe yandi.”
^ Nelyo kuti lyapilibula no kuti, “abaleikala mu Keila.”
^ Nelyo kuti yapilibula no kuti, “aletiina pantu.”
^ Nelyo “alefwaya ukwipaya umweo wakwe.”
^ Mu ciHebere, “alikoseshe ukuboko kwakwe.”
^ Mu ciHebere, “ku kulyo kwa.”
^ Nelyo kuti lyapilibula no kuti, “iciswebebe; amatololo.”
^ Nelyo “umweo wenu ukafwaya.”
^ Mu ciHebere, “mu mabumba ya bantu 1,000 aba mu Yuda.”