Ibuuku lya Kubalilapo Ilya kwa Samwele 24:1-22
24 Ilyo Shauli abwelele fye uko aile mu kufulumuna abaPelishiti, bamwebele abati: “Davidi ali mu matololo ya En-gedi.”+
2 E ico Shauli asendele abaume 3,000 abo asalile mu bena Israele bonse, kabili baile mu kufwaya Davidi na baume abo ali nabo mu fimabwe umwikala ifibushimabwe.
3 Shauli afikile ku macinka ya mpaanga aya mabwe ayali mu nshila, ukwali ulucengo. Shauli aingile mu lucengo pa kuti ayafwilishe,* ninshi Davidi na baume abo ali nabo nabekala mu kati sana ka ulu lwine ulucengo.+
4 Abaume abo Davidi ali nabo bamwebele abati: “Buno e bushiku Yehova alemweba ati, ‘Mona! Napeela umulwani obe mu minwe yobe,+ kabili umucite fyonse ifyo ulefwaya.’” E ico Davidi aliimine panono panono ayaputula icipimfya ku mpela ya ca kufwala ca kwa Shauli icabula amaboko.
5 Nomba pa numa umutima* wa kwa Davidi watampile ukumucusha+ pantu aliputwile icipimfya ku mpela ya ca kufwala ca kwa Shauli icabula amaboko.
6 Davidi aebele abaume abo ali nabo ati: “Ukulingana ne fyo Yehova amona ifintu, te kuti ncite icintu ca musango uyu kuli shikulu, uo Yehova asuba. Te kuti imusanse pantu Yehova alimusuba.”+
7 E ico ilyo Davidi alandile ifi, abaume abo ali nabo balyumfwile* kabili tabasuminishe ukusansa Shauli. Shauli alifumine mu lucengo aya no kuya.
8 Lyena Davidi afumine mu lucengo e lyo abilikisha Shauli ati: “Shikulu mwe mfumu!”+ Ilyo Shauli aloleshe ku numa, Davidi awile ubukupeme.
9 Davidi aebele Shauli ati: “Cinshi mumfwila abantu abatila, ‘Moneni! Davidi afwaya ukumusansa’?+
10 Buno bushiku namuimwena ifyo Yehova acimupeela mu minwe yandi mu lucengo. Lelo ilyo umo acinjeba ukuti imwipaye,+ nacimumfwila uluse kabili nacimweba nati, ‘Te kuti nsanse shikulu wandi pantu Yehova alimusuba.’+
11 Kabili mwe tata moneni icipimfya ca ku mpela ya ca kufwala cenu icabula amaboko ici njikete, pantu ilyo naciciputula ku mpela ya ca kufwala cenu icabula amaboko nshacimwipaya. Nomba mwamona ukuti nshapanga ukumusansa nelyo ukumupondokela, kabili nshamubembukila,+ nangu ca kuti munkonkaisha fye pa kuti mukanjipaye.*+
12 Yehova natupingule imwe na ine,+ kabili shi Yehova amukande pa fyo mwancita,+ lelo ine nshakamusanse.+
13 Nga filya fine ipinda lya kale lilanda, ‘Ababifi e bacita ifyabipa,’ lelo ine nshakamusanse.
14 Cinshi ico imfumu ya Israele ilempepekela? Bushe pali ifyo ndi? Naba fye nge mbwa iyafwa, kabili naba fye ngo lupantila.+
15 Yehova nabe kapingula, kabili akatupingula imwe na ine, akamona kabili akandubulwilako,+ akampingwilako kabili akampususha kuli imwe.”
16 Ilyo Davidi apwishishe ukweba Shauli aya amashiwi, Shauli atile: “Bushe lishiwi lyobe ndeumfwa, we mwana wandi Davidi?”+ Kabili Shauli alilile umusowa.
17 Aebele Davidi ati: “Uli mulungami ukuncila, pantu iwe ulancitila ifisuma, lelo ine nkucitila ifyabipa.+
18 Cine cine lelo wananga ubusuma pantu taunjipeye nangu ca kuti Yehova acimpeela mu minwe yobe.+
19 Pantu nani engasanga umulwani wakwe e lyo amuleka fye aya umutende? Yehova akakulambula+ pa fyo wancitila lelo.
20 Nomba umfwa! Nalishiba ukuti cine cine ukaba imfumu,+ kabili ukateka abena Israele pa nshita iitali.
21 Nomba lapa kuli ine mwi shina lya kwa Yehova+ ukuti tawakalofye abakatuntuka muli ine* kabili tawakalofye ishina lyandi mu ng’anda ya kwa tata.”+
22 E ico Davidi alilapile kuli Shauli, kabili Shauli aile ku mwakwe.+ Lelo Davidi na baume abo ali nabo balile uko balefisama.+
Amafutunoti
^ Mu ciHebere, “afimbe amakasa yakwe.”
^ Nelyo “kampingu ya kwa Davidi yatampile.”
^ Nelyo kuti lyapilibula no kuti, “balisalangene.”
^ Nelyo “ukwipaya umweo wandi.”
^ Mu ciHebere, “ulubuto lwandi.”