Ibuuku lya Kubalilapo Ilya kwa Samwele 26:1-25
26 Mu kupita kwa nshita, abena Sifi+ baile kuli Shauli ku Gibea+ kabili bamwebele abati: “Davidi afiseme mu lupili lwa Hakila, ulwaloshanya na Yeshimone.”*+
2 E ico Shauli na bashilika 3,000 abo basalile mu Israele balimine baya mu kufwaya Davidi mu matololo ya Sifi.+
3 Shauli apangile inkambi mu lupili lwa Hakila, ulwaloshanya na Yeshimone, mupepi ne nshila. Pali iyi nshita Davidi aleikala mu matololo, kabili aishileishiba ukuti Shauli alile mu kumufwaya mu matololo.
4 E ico Davidi atumine inengu isha kuyamona nga cine cine Shauli alile mu matololo.
5 Pa numa Davidi aile uko Shauli apangile inkambi kabili Davidi alimwene apaleele Shauli na Abnere+ umukalamba wa bashilika, umwana wa kwa Nere. Shauli aleele pa kati ka nkambi kabili abashilika bakwe bali mu mbali.
6 Lyena Davidi aipwishe Ahimeleke umwina Hiti+ na Abishai+ umwana wa kwa Seruya,+ munyina wa kwa Yoabu ati: “Nani nalatentemukila nankwe mu nkambi umuli Shauli?” Abishai ayaswike ati: “Nalaya na imwe.”
7 E ico Davidi na Abishai baile ku bashilika ubushiku, kabili basangile Shauli nalaala pa kati ka nkambi, nashimpa ne fumo lyakwe panshi ku mitwe. Abnere na bashilika baleele mu mbali, nabashinguluka Shauli.
8 E lyo Abishai aebele Davidi ati: “Buno bushiku Lesa apeela umulwani wenu mu minwe yenu.+ Nomba shi lekeni imulase ifumo lifike na panshi. Nalamulasa fye umuku umo, nshamulase imiku ibili.”
9 Lelo Davidi aebele Abishai ati: “Wimwipaya iyo, pantu nani engatwalilila ukuba uwa kaele+ nga ca kuti aipaya uo Yehova asuba?”+
10 Na kabili Davidi alandile ati: “Na pali Yehova, Yehova umwine akamwipaya,+ nelyo bushiku bumo+ akafwa nga filya abantu bonse bafwa, nangu akaya ku nkondo e lyo bakamwipaye.+
11 Ukulingana ne fyo Yehova amona ifintu, te kuti njipaye uo Yehova asuba!+ Nomba buula fye ifumo ilyo ku mitwe na kamutondo ka menshi, tuleya.”
12 E ico Davidi asendele ifumo na kamutondo ka menshi ku mitwe ya kwa Shauli, baya no kuya. Takwali uwabamwene+ nelyo uwaishibe nangu uwabuukile, pantu bonse bali mu tulo, pa mulandu wa kuti Yehova alibalaalike utulo utwine twine.
13 Lyena Davidi aile ku lubali lumbi no kwiminina pa muulu wa lupili akatalamukila.
14 Davidi abilikishe abashilika na Abnere+ umwana wa kwa Nere ati: “Abnere bushe uleumfwa?” Abnere amwaswike ati: “Niwe nani we ulepumfyanya imfumu?”
15 Davidi aebele Abnere ati: “Bushe tauli mwaume wa maka? Kabili nani uwaba nga iwe mu Israele? Cinshi ico ushilindiile sokulu imfumu? Pantu umushilika umo acisa mu nkambi mu kwipaya sokulu imfumu.+
16 Ico mucitile taciweme. Na pali Yehova, mufwile ukufwa, pantu tamulindile shikulwinwe uo Yehova asuba.+ Nomba lolesheni! Bushe ifumo na kamutondo ka menshi+ ifyaciba ku mitwe ya mfumu fili kwi?”
17 Lyena Shauli aishibe ishiwi lya kwa Davidi e lyo amweba ati: “Bushe niwe Davidi mwana wandi+ ndeumfwa?” Davidi ayaswike ati: “Nine, mwe shikulu imfumu.”
18 Na kabili atile: “Mulandu nshi shikulu akonkaishisha umubomfi wakwe?+ Cinshi nalufyanya, kabili mulandu nshi nakwata?+
19 Shikulu mwe mfumu umfweni ifyo ne mubomfi wenu nalalanda: Nga ca kuti ni Yehova amweba ukuti mulenkonkaisha, lekeni apokelele* umutuulo wandi uwa ngano. Lelo nga bantu,+ Yehova nabakande, pantu nabantamfya lelo pa kuti niba pamo na bantu ba kwa Yehova,*+ baleti, ‘Kabiye, kabombele balesa bambi!’
20 Nomba mwileka umulopa wandi witikile panshi ukutali ne cinso ca kwa Yehova, pantu imfumu ya Israele yaliya mu kufwaya ulupantila,+ kwati ilelunga inkwale mu mpili.”
21 E lyo Shauli atile: “Nimembuka.+ Bwela mwana wandi Davidi, pantu nshakakucite icabipa na kabili, pantu buno bushiku wacimona umweo wandi ukuti walicindama.+ Cine cine, ifyo nacita fya bupumbu kabili nalilufyanya sana.”
22 Davidi alandile ati: “Ifumo lya mfumu ili, tumeni umo pa balumendo ese asende.
23 Yehova akalambula umuntu umo umo pa bulungami bwakwe+ na pa fyo aba uwa cishinka, pantu lelo Yehova acimupeela mu minwe yandi, nomba nshacilafwaya ukumusansa pantu Yehova alimusuba.+
24 Ifyo nacicindika umweo wenu buno bushiku, e fyo no mweo wandi ube uwacindama mu menso ya kwa Yehova, kabili shi engampususha mu macushi yonse.”+
25 Shauli aebele Davidi ati: “Lesa engakupaala mwana wandi Davidi. Nangu cibe shani ukacita ifintu ifingi kabili fyonse ifyo ukalacita fikalaenda bwino.”+ Lyena Davidi alile, kabili Shauli abweleele ku mwakwe.+
Amafutunoti
^ Nelyo kuti lyapilibula no kuti, “iciswebebe; amatololo.”
^ Mu ciHebere, “ubupyani bwa kwa Yehova.”
^ Mu ciHebere, “anunshe.”