Ibuuku lya Kubalilapo Ilya kwa Samwele 29:1-11
-
AbaPelishiti tabacetekele Davidi (1-11)
29 AbaPelishiti+ balongenye abashilika babo bonse pa Afeke, e lyo abena Israele bena bapangile inkambi mupepi na kamfukumfuku mu Yesreele.+
2 Kabili bakateka ba baPelishiti balepita na mabumba ya bashilika 100, na mabumba ya bashilika 1,000. Davidi na baume bakwe balebakonka pa numa ninshi bali na Akishi.+
3 Lelo bacilolo ba baPelishiti baipwishe Akishi abati: “Cinshi aba abaHebere balecita kuno?” Akishi abaswike ati: “Uyu ni Davidi umubomfi wa kwa Shauli Imfumu ya Israele, uwaikala na ine pa mwaka umo no kucilapo.+ Nshasangamo ubwafya nangu bumo muli ena ukutula apo aishila kuli ine ukushinta na lelo.”
4 Lelo bacilolo ba baPelishiti balimufuliilwe, kabili bamwebele abati: “Tamfya uyu muntu.+ Leka abwelele ku cifulo wamupeela. Wileka atukonke ku nkondo, pantu kuti ayatwalukila mu nkondo.+ Bushe kuli cimbi ico engacita pa kulenga shikulu wakwe amutemwa ukucila pa kumutwalila imitwe ya baume besu?
5 Bushe uyu te Davidi uo baleimbapo uku ninshi balecinda, abati:
‘Shauli aipaya abalwani 1,000,Davidi ena aipaya abalwani 10,000’?”+
6 E ico Akishi+ aitile Davidi kabili amwebele ati: “Na pali Yehova, uli mulungami, kabili nintemwa ifi ukonkele abashilika bandi+ ku nkondo, pantu nshasangamo ubwafya nangu bumo muli iwe ukufuma fye pa bushiku waishile kuli ine ukufika na lelo.+ Nomba bakateka tabakucetekeele.+
7 E ico bwelelamo kabili wende umutende, kabili wicita nangu cimo icingakalifya bakateka ba baPelishiti.”
8 Lelo Davidi aipwishe Akishi ati: “Cinshi nalufyanya, kabili bwafya nshi mwasanga muli ine ne mubomfi wenu ukutula pa bushiku naishile kuli imwe ukushinta na lelo? Cinshi ico nshaile na imwe mu kulwisha abalwani benu shikulu mwe mfumu?”
9 Akishi ayaswike Davidi ati: “Ine nalishiba ukuti uli muntu umusuma, kwati fye ni malaika wa kwa Lesa.+ Lelo bacilolo ba baPelishiti e balandile abati, ‘Mwimuleka atukonke ku nkondo.’
10 Nomba mukabuuke lucelocelo pamo na babomfi ba kwa sokulu abo waishile nabo. Mukeme ulucelocelo nga kwabuuta fye.”
11 E ico Davidi abuukile lucelocelo pamo na baume bakwe pa kuti babwelelemo ku calo ca baPelishiti, lelo abaPelishiti bena baile ku Yesreele.+
