Ibuuku lya Kubalilapo Ilya kwa Samwele 30:1-31
30 Ilyo Davidi na baume ali nabo bafikile ku Siklagi+ pa bushiku bwalenga shitatu, basangile abena Amaleke+ balisansa incende ya ku kapinda ka ku kulyo* na Siklagi. Basangile umusumba wa Siklagi baliusansa kabili balioca.
2 Balisendele abanakashi+ na bonse abalimo, abaice na bakalamba. Tabaipeyepo nangu umo, lelo balisendele bonse, baya no kuya.
3 Ilyo Davidi na baume abo ali nabo bafikile mu musumba, basangile balioca, kabili abakashi babo, abana babo abaume na bana babo abanakashi, balibasendele mu kuba bankole.
4 E ico Davidi na baume abo ali nabo batampile ukulila imisowa mpaka amaka ya kulila yapwa.
5 Abakashi ba kwa Davidi babili, Ahinoamu umwina Yesreele na Abigaili uwafwililwe umulume wakwe Nabali umwina Karmele,+ nabo balibasendele mu kuba bankole.
6 Davidi ali no bulanda nga nshi pantu abaume abo ali nabo balelanda ukuti bali no kumupoola amabwe, pantu bonse balikalipe* sana pa mulandu wa kuti abana babo abaume na bana babo abanakashi balibasendele. Lelo Davidi alipepele kuli Yehova Lesa wakwe pa kuti amukoshe.+
7 Lyena Davidi aebele Abiatari+ shimapepo, umwana wa kwa Ahimeleke ati: “Leta efode kuno.”+ E ico Abiatari atwalile Davidi efode.
8 Davidi aipwishe Yehova+ ati: “Bushe nkonke ifi fipondo? Bushe ndeyafisanga?” Na o amwaswike ati: “Fikonke, pantu nangu cibe shani uleyafisanga, kabili uleyapokolola ifyo fisendele.”+
9 Ilyo line Davidi alimine pamo na baume 600+ abo ali nabo, kabili bailefika fye na ku Mupokapoka wa Besore, uko abaume bamo baileshala.
10 Davidi pamo na baume 400 batwalilile fye ukubakonka, lelo abaume 200 abanakile sana ica kuti bafilwa ukwabuka Umupokapoka wa Besore, balishele.+
11 Basangile umwaume umwina Egupti mu mpanga, kabili bamutwele kuli Davidi. Bamupeele ifya kulya na menshi ya kunwa,
12 e lyo ne ciputusha ca keke ya makunyu na makeke yabili aya myangashi yauma. Ilyo aliile amaka yalibwelele,* pantu taliilepo ifya kulya kabili tanwenepo amenshi pa nshiku shitatu akasuba no bushiku.
13 Nomba Davidi amwipwishe ati: “Uli mubomfi wa kwa nani, kabili ku mwenu ni kwi?” na o amwaswike ati: “Ndi mwina Egupti, kabili ndi musha wa mwina Amaleke, lelo shikulu alinshile pantu nalilwele inshiku shitatu ishapitapo.
14 Twasanshile incende ya ku kapinda ka ku kulyo* aka bena Kerete+ ne ncende ya kwa Yuda ne ncende ya ku kapinda ka ku kulyo* iya kwa Kalebu,+ kabili twalyocele no musumba wa Siklagi.”
15 E lyo Davidi amwipwishe ati: “Bushe kuti wantungulula kuli ifi ifipondo?” Na o amwaswike ati: “Kuti namutungulula nga ca kuti mwalapa kuli ine mwi shina lya kwa Lesa ukuti tamwakanjipaye, kabili tamwakambweseshe kuli shikulu.”
16 E ico alimutungulwile uko bali ninshi bali fye mpanga yonse, balelya, balenwa kabili balesefya pa mulandu wa kuti balisendele ifintu ifingi mu calo ca baPelishiti na mu calo ca kwa Yuda.
17 Lyena Davidi atampile ukubepaya ukufuma ku macaca ukufika icungulo; takwali nangu umo uwapuswike+ kano fye abaume 400 abafulumukiile pa ngamila.
18 Davidi alipokolwele fyonse ifyo abena Amaleke basendele,+ kabili alipuswishe na bakashi bakwe babili.
19 Takwali nangu cimo ico bashapokolwele. Balipokolwele+ abana babo abaume na bana babo abanakashi; Davidi alipokolwele fye fyonse ifyo basendele.
20 E ico Davidi asendele impaanga shonse ne ng’ombe shonse, isho abaume bakwe balekumba pa ntanshi ya fitekwa fyabo. Batile: “Ifi e fitekwa ifyo Davidi apokele.”
21 Lyena Davidi afikile ukwashele abaume 200 abanakile sana ica kuti balifililwe no kuya nankwe, kabili abashele mupepi no Mupokapoka wa Besore.+ Balimine pa kuti basengele Davidi na bantu abo ali nabo. Ilyo Davidi apaleme kuli aba abaume, abepwishe ifyo bali.
22 Lelo abaume bonse abali ne mitima iibi kabili ifinangwa abaile na Davidi balandile abati: “Apo tabaile na ifwe tatwabapeelepo ifyo tupokele, cila muntu alasenda fye umukashi wakwe na bana bakwe, baleya no kuya.”
23 Lelo Davidi abebele ati: “Tamufwile ukucita ifyo bamunyinane pa fintu Yehova atupeele. Alitucingilile kabili alitwafwile pa kuti tucimfye ifipondo ifyatusanshile.+
24 Nani engasumina ifi mulelanda? Ifyo twalapeela uwaile mu kulwa inkondo, e fyo twalapeela no washele alelinda ifipe.+ Bonse twalabapeela fimo fine.”+
25 Kabili ukutula bulya bwine bushiku ifyo Davidi alandile fyaishileba ifunde ilyo abena Israele bakonka ukushinta na lelo.
26 Ilyo Davidi abwelele ku Siklagi, atumiine abakalamba ba mu Yuda abali abanankwe fimo ifyo bapokele, kabili abatumiine amashiwi ya kuti: “Namutumina ubupe* pa fyo twapokele abalwani ba kwa Yehova.”
27 Atumiine abali mu Betele,+ mu Ramote ya mu Negebu,* mu Yatiri,+
28 mu Aroere, mu Shifmote, mu Eshtemoa,+
29 mu Rakali, mu misumba ya bena Yeraameele,+ mu misumba ya bena Keni,+
30 mu Horma,+ mu Borashani, mu Ataki,
31 mu Hebrone,+ na bali mu ncende shonse isho Davidi na baume bakwe baleyamo sana.
Amafutunoti
^ Nelyo “Negebu.”
^ Nelyo “imyeo ya bantu bonse yalikalipe.”
^ Mu ciHebere, “umupashi wakwe walibwelele muli ena.”
^ Nelyo “Negebu.”
^ Nelyo “Negebu.”
^ Mu ciHebere, “ipaalo.”
^ Nelyo “ku kapinda ka ku kulyo.”
