Ibuuku lya Kubalilapo Ilya kwa Samwele 4:1-22
4 Kabili Samwele ale-eba abena Israele fyonse ifyo Lesa alemweba.
Lyena abena Israele baile mu kulwa na baPelishiti; bapangile inkambi pa Ebenesere, lelo abaPelishiti bapangile inkambi pa Afeke.
2 AbaPelishiti balilongene pa kuti balwe na bena Israele, kabili inkondo yabipiile abena Israele ica kuti balibacimfishe. AbaPelishiti baipeye abaume abena Israele nalimo 4,000 uko balelwila inkondo.
3 Ilyo abantu babwelele ku nkambi, abakalamba ba bena Israele batile: “Cinshi lelo Yehova alekela abaPelishiti+ batucimfya?* Natuye ku Shilo+ tuyesenda icipao ca cipangano ica kwa Yehova, pa kuti cibe kuno, citupusushe ku balwani besu.”
4 E ico abantu batumine abaume ku Shilo abakuyasenda icipao ca cipangano ica kwa Yehova wa mabumba uwaikala pa muulu* wa bakerubi.+ Abana ba kwa Eli babili, Hofini na Finehasi,+ nabo bali pa baile mu kusenda icipao ca cipangano ica kwa Lesa wa cine.
5 Ilyo icipao ca cipangano ica kwa Yehova cafikile fye mu nkambi, abena Israele bonse baliweleshe nga nshi ica kuti isonde lyalitentele.
6 Ilyo abaPelishiti baumfwile uku kuwelesha, batile: “Cinshi abaHebere balewelesesha ifi mu nkambi?” Basukile baishiba ukuti ni co baliletele Icipao ca kwa Yehova mu nkambi.
7 AbaPelishiti balitiinine, pantu batile: “Lesa naisa mu nkambi!”+ E ico batile: “Catubipila pantu ica musango yu tacatala acicitikapo!
8 Catubipila! Nani akatupususha kuli uyu Lesa wa maka? Uyu e Lesa uwaipaile abena Egupti abengi nga nshi mu matololo.+
9 Shipeni mwe baPelishiti kabili mube nga baume, pa kuti mwikabombela abaHebere nga fintu bena bamubombela.+ Beni nga baume kabili kabiyeni mu kulwa!”
10 E ico abaPelishiti balilwile na bena Israele kabili abena Israele balibacimfishe,+ ica kuti cila muntu abutukiile kwi tenti lyakwe. Abashilika abena Israele abo baipeye bali abengi icine cine, ica kuti balifikile 30,000.
11 Balisendele ne Cipao ca kwa Lesa, kabili abana ba kwa Eli babili, Hofini na Finehasi balibepeye.+
12 Pali bulya bwine bushiku kwali umwina Benjamini umo uwabutwike uko balelwila inkondo. Afikile ku Shilo ninshi ifya kufwala fyakwe nafilepauka kabili pa mutwe wakwe pali iloba.+
13 Ilyo uyu mwaume afikile, ninshi Eli naikala pa cipuna mu mbali ya musebo alelolela, pantu alisakamene sana pa Cipao ca kwa Lesa wa cine.+ Uyu mwaume aingile mu musumba pa kuti ashimike ifyacitike, kabili abali mu musumba bonse batendeke ukuloosha.
14 Ilyo Eli aumfwile imisowa, aipwishe ati: “Cinshi abantu baleloosesha?” Uyu mwaume alyangufyenye ukuyaeba Eli ifyacitike.
15 (Nomba Eli ali ne myaka 98, kabili talemona.)+
16 Lyena uyu mwaume aebele Eli ati: “Ine mfumine uko balelwila inkondo! Lelo line e lyo nacifulumuka uko balelwila inkondo.” E lyo Eli amwipwishe ati: “Cinshi cicitike mwana wandi?”
17 E ico uwaletele ilyashi atile: “Abena Israele nabafulumuka abaPelishiti pantu nababacimfya+ kabili abantu abengi nabafwa. Na kabili abana benu babili, Hofini na Finehasi, nabafwa,+ ne Cipao ca kwa Lesa wa cine nabacisenda.”+
18 Ilyo uyu muntu alumbwile Icipao ca kwa Lesa wa cine, Eli awile ubuseneme pa cipuna mupepi ne mpongolo, kabili umukoshi walifunike no kufwa afwa, pantu ali mukote kabili ali uwaina. Eli ali kapingula wa bena Israele pa myaka 40.
19 Muka Finehasi, nafyala wa kwa Eli ali ne fumo kabili ali mupepi no kupaapa. Ilyo aumfwile ukuti nabasenda Icipao ca kwa Lesa wa cine no kuti shifyala no mulume wakwe balifwile, alikonteme kabili mu kupumikisha ifumo lyalibuukile, afyala no mwana.
20 Ilyo alefwa, abanakashi abalemupaapisha bamwebele abati: “Wisakamana pantu naufyala umwana umwaume.” Nomba ta-aswike kabili tabikileko amano.
21 Lelo ainike umwana ati Ikabode*+ pantu atile: “Nabafumya ubukata mu Israele.”+ Aloseshe mu kuti Icipao ca kwa Lesa wa cine balicisendele kabili shifyala no mulume wakwe balifwile.+
22 Atile: “Nabafumya ubukata mu Israele, pantu Icipao ca kwa Lesa wa cine nabacisenda.”+
Amafutunoti
^ Mu ciHebere, “Cinshi Yehova atucimfisha?”
^ Nelyo kuti lyapilibula no kuti, “pa kati ka.”
^ Ilyalola mu kuti “Ubukata Buli Kwisa?”
