Ibuuku lya Kubalilapo Ilya kwa Samwele 5:1-12
5 Ilyo abaPelishiti basendele Icipao+ ca kwa Lesa wa cine ku Ebenesere, bacitwele ku Ashdode.
2 AbaPelishiti babuulile Icipao ca kwa Lesa wa cine bacitwala na mu ng’anda* ya kwa lesa wabo Dagone, e lyo bacibika mupepi na Dagone.+
3 Ilyo abena Ashdode babuukile ulucelocelo ubushiku bwakonkelepo, bamwene Dagone nawa ubukupeme pa ntanshi ya Cipao ca kwa Yehova.+ E ico balimwimishe bamubwesesha na po balemuteka.+
4 Ilyo babuukile ulucelocelo ubushiku bwakonkelepo, basangile Dagone nawa ubukupeme pa ntanshi ya Cipao ca kwa Yehova. Basangile umutwe ne fisansa nafiputuka kabili fyali pa mwinshi we tempele. Dagone ashele fye icimubili ceka ceka.
5 E co bashimapepo ba kwa Dagone na bonse abengila mu ng’anda ya kwa Dagone bashinyantila pa mwinshi wa kwa Dagone mu Ashdode ukufika na lelo.
6 Yehova alikandile abena Ashdode na baleikala mu ncende shali mupepi, kabili alibalwalike ifipute.*+
7 Ilyo abena Ashdode bamwene ifyalecitika, batile: “Mwileka Icipao ca kwa Lesa wa bena Israele ciikale kuno, pantu natukanda icabipisha kumo na lesa wesu Dagone.”
8 E ico batumine aba kuyaita bakateka ba baPelishiti bonse kabili balongene pamo e lyo babepusha abati: “Cinshi twalacita ne Cipao ca kwa Lesa wa bena Israele?” Babaswike abati: “Ebeni aba kuti batwale Icipao ca kwa Lesa wa bena Israele ku musumba wa Gati.”+ E ico batwele Icipao ca kwa Lesa wa bena Israele ku Gati.
9 Ilyo bacitwele ku Gati, Yehova alikandile aba muli ulya musumba kabili balisakamene nga nshi. Akandile abantu bonse mu musumba, abaice na bakalamba, kabili bonse balilwele ifipute.+
10 E ico batwele Icipao ca kwa Lesa wa cine ku Ekrone.+ Nomba ilyo Icipao ca kwa Lesa wa cine cafikile fye ku Ekrone, abena Ekrone batendeke ukupunda abati: “Batuletela Icipao ca kwa Lesa wa bena Israele pa kuti batwipaile pamo na bantu besu!”+
11 Lyena batumine aba kuyaita bakateka ba baPelishiti bonse kabili ilyo balongene babebele abati: “Bwekeshenimo Icipao ca kwa Lesa wa bena Israele uko mwacifumishe pa kuti ifwe na bantu besu twifwa.” Pantu abantu bonse mu musumba baletiina ukufwa; Lesa wa cine alibakandile icine cine,+
12 kabili abashafwile balilwele ifipute. Abantu bonse mu musumba balililile ica kuti ne misowa yalyumfwikike na ku muulu.
