Ibuuku lya Kubalilapo Ilya kwa Samwele 6:1-21
-
AbaPelishiti babwekeshamo Icipao ku bena Israele (1-21)
6 Icipao+ ca kwa Yehova cali mu calo ca baPelishiti pa myeshi 7.
2 Lyena abaPelishiti baitile bashimapepo babo na balebuka+ kabili babepwishe abati: “Twalacita shani ne Cipao ca kwa Yehova? Twebeni ifyo twalacita pa kuti tucibwekeshe uko cafumine.”
3 Babaswike abati: “Nga mwabwekeshamo icipao ca kwa Yehova Lesa wa bena Israele, mwicibwekeshamo ukwabula umutuulo. Tamufwile ukucibwekeshamo ukwabula umutuulo wa pa mulandu.+ Nga mwacita ifi e lyo mukapola, kabili mukeshiba ico ashalekela ukumukanda.”
4 E ico babepwishe abati: “Mutuulo nshi uwa pa mulandu uo tufwile ukumutwalila?” Nabo babaswike abati: “Mufwile ukumutwalila ifipute* 5 ifya golde ne mpuku 5 isha golde ukulingana ne mpendwa ya bakateka ba baPelishiti,+ pantu icikuko cikumine fye bonse, imwe na bakateka benu.
5 Mulingile ukupanga ifimpashanya fya fipute fyenu ne fimpashanya fya mpuku shenu+ ishileonaula icalo, kabili mufwile ukucindika Lesa wa bena Israele. Nalimo kuti acefyako ukumukanda, ukukanda balesa benu ne calo cenu.+
6 Tamufwile ukutalamika imitima yenu nge fyo abena Egupti na Farao batalamike imitima yabo.+ Ilyo abakandile+ e lyo balekele abena Israele baya.+
7 Pangeni iceleta kabili mubuule ing’ombe shibili ishili na bana, isho mushabikapo kwi koli. Lyena mukulike iceleta ku ng’ombe, lelo mufwile ukubwesesha abana ba shiko kwi cinka.
8 Mubuule Icipao ca kwa Yehova mucibike pe celeta, kabili mubike ifimpashanya fya golde ifya mutuulo wa pa mulandu ifyo mulemutwalila mu mbokoshi kabili mubike iyo imbokoshi mupepi ne cipao.+ Lyena mucitume
9 kabili mumone uko cileya. Nga caya mu musebo waya ku Bete-shemeshe+ uko cafumine, ninshi e waleta ici cikuko icikalamba pali ifwe. Lelo nga caya kumbi, ninshi twalaishiba ukuti te watukanda, icikuko caishile fye.”
10 E ico balicitile ifyo babebele. Babuulile ing’ombe shibili ishali na bana kabili bakakiile iceleta ku ng’ombe e lyo baisalila abana ba shiko mwi cinka.
11 Lyena babikile Icipao ca kwa Yehova pe celeta, babikilepo ne mbokoshi umwali ifimpashanya fya mpuku ifya golde ne fimpashanya fya fipute fyabo.
12 Kabili ing’ombe shaile fye mu musebo wa ku Bete-shemeshe.+ Shale-enda fye mu musebo umo wine, kabili shaleya shilelila; tashapaatukile ku kulyo nangu ku kuso. Ilyo shaleya bakateka ba baPelishiti baleshikonka pa numa mpaka bafika ku mupaka wa Bete-shemeshe.
13 Abena Bete-shemeshe baleseepa ingano mwi lungu. Ilyo bainwine amenso bamona ne Cipao, balisekelele nga nshi.
14 Iceleta lyafikile mu mpanga ya kwa Yoshua umwina Bete-shemeshe kabili e mo lyaiminine mupepi ne libwe ilikalamba. E ico balepawile ifimuti fye celeta, kabili batuulile Yehova isho ing’ombe+ umutuulo wa koca.
15 Abena Lebi+ baikishe Icipao ca kwa Yehova ne mbokoshi iyali mupepi naco umwali ifimpashanya fya golde, kabili bafitekele pe libwe ilikalamba. Abena Bete-shemeshe+ batuulile Yehova imituulo ya koca na malambo yambi pali bulya bushiku.
16 Ilyo bakateka 5 aba baPelishiti bamwene Icipao, balibwelelemo ku Ekrone bulya bwine bushiku.
17 Nomba ifi e fipute fya golde ifyo abaPelishiti batumine pa kuti fibe umutuulo wa kwa Yehova uwa pa mulandu:+ icipute ca bena Ashdode+ cimo, ica bena Gasa cimo, ica bena Ashkelone cimo, ica bena Gati+ cimo, ica bena Ekrone+ cimo.
18 Kabili impendwa ya mpuku sha golde isho batumine yalingene ne mpendwa ya misumba yonse iya baPelishiti iyo bakateka 5 baleteka, e kutila imisumba ya malinga ne mishi iishakwete amalinga.
Kabili ilibwe ilikalamba apo batekele Icipao ca kwa Yehova ni kambone mu mpanga ya kwa Yoshua umwina Bete-shemeshe ukushinta na lelo.
19 Lelo Lesa alipeye abaume abena Bete-shemeshe, pantu baletamba Icipao ca kwa Yehova. Aipeyepo abaume 50,070,* kabili abantu batendeke ukuloosha pantu Yehova alipeye abaume abengi nga nshi.+
20 E ico abaume abena Bete-shemeshe balandile abati: “Nani uwingeminina pa cinso ca kwa Yehova, uyu Lesa wa mushilo?+ Kuti cawama uyu Lesa afuma kuli ifwe aya kuli bambi!”+
21 E ico batumine aba kuyaeba abaleikala ku Kiriati-yearimu+ abati: “AbaPelishiti nababwesha Icipao ca kwa Yehova. Iseni mucisende.”+
