Ibuuku lya Kubalilapo Ilya kwa Samwele 8:1-22
8 Ilyo Samwele akotele, asontele abana bakwe abaume ukuba bakapingula ba bena Israele.
2 Umwana wakwe ibeli ali ni Yoele, e lyo cikonkebeli ali ni Abiya;+ bali bakapingula mu Beere-sheba.
3 Lelo abana bakwe abaume tabali ne mibele iisuma nge yo shibo akwete; balitemenwe ubunonshi bwa mu bucenjeshi,+ balepoka amafisakanwa+ kabili balefyenga abantu+ pa kupingula imilandu.
4 Mu kupita kwa nshita abakalamba bonse aba mu Israele balilongene kabili baile kuli Samwele ku Rama.
5 Bailemweba abati: “Moneni! Imwe namukota, kabili abana benu tababa nge fyo mwaba. E ico tusonteleni imfumu iya kuti iletupingula nge fyo caba ku nko shimbi.”+
6 Lelo ilyo bamwebele abati: “Tupeni imfumu iya kuti iletupingula,” Samwele tatemenwe.* Lyena Samwele alipepele kuli Yehova,
7 kabili Yehova amwebele ati: “Bacitile fyonse ifyo balefwaya; pantu te iwe bakaana, lelo nine bakaana ukuba imfumu yabo.+
8 Ifi balecita e fyo bacita ukutula fye ilyo nabafumishe mu Egupti; balansha+ kabili balabombela balesa bambi,+ kabili ifi fine e fyo balecita na kuli iwe.
9 Nomba bacitile ifyo balefwaya. Lelo ubasoke; kabili ubebe ifyo imfumu iikabateka ikalafwaya ukuti baleicitila.”
10 E ico Samwele aebele abantu abalefwaya abasontele imfumu fyonse ifyo Yehova alandile.
11 Abebele ati: “Ifi e fyo imfumu iikalamuteka ikalacita:+ Ikalabuula abana benu abaume+ kabili bakalaba abashilika ba pa maceleta ya iko,+ bambi bakalaba abashilika ba pali bakabalwe+ ba iko, e lyo bambi bakalabutuka ku ntanshi ya maceleta ya iko.
12 Kabili ikaisontela bacilolo ba mabumba ya bantu 1,000+ na bacilolo ba mabumba ya bantu 50,+ kabili bamo bakalalimina+ imfumu, bakalaisombwela+ kabili bakalaipangila ifyanso fya nkondo e lyo bambi bakalaipangila ifipe fya pa maceleta.+
13 Ikalasenda abana benu abanakashi abakalaipangila amafuta,* abakalaipikila na bakalaipangila imikate.+
14 Ikalamupoka amabala, amabala ya myangashi na ya miolife+ ayawamisha, kabili ababomfi ba iko e bo ikalapeela aya amabala.
15 Pa fyo mukalasombola mu mabala yenu na pa myangashi yenu ikalabuulapo ifyalenga ikumi, kabili ikalapeela bacilolo ba iko aba kwi sano na babomfi ba iko.
16 Kabili ikalamupoka ababomfi benu abaume na babomfi benu abanakashi pa kuti bakaleibombela. Ikalamupoka ne ng’ombe ishawamisha ne mpunda, kabili ikalashibomfya.+
17 Pa mpaanga shenu na pa mbushi shenu+ ikalabuulapo ishalenga ikumi, kabili mukaba ababomfi ba iko.
18 Bushiku bumo mukalila pa mulandu wa mfumu iyo mwaisalila+ mwe bene, lelo Yehova takamwasuke.”
19 Lelo abantu balikeene ukumfwa ifyo Samwele abebele kabili balandile abati: “Awe, tulefwaya fye imfumu e yo iletuteka.
20 Lyena tukaba nge fyo inko shimbi shaba, kabili imfumu yesu ikalatupingula, ikalatutungulula kabili ikalatulwila inkondo.”
21 Ilyo Samwele aumfwile fyonse ifyo abantu balandile, aile-eba Yehova.
22 Yehova aebele Samwele ati: “Bacitile ifyo balefwaya, kabili ubasontele imfumu iya kuti ilebateka.”+ Lyena Samwele aebele abena Israele ati: “Cila muntu afwile ukubwelela ku musumba wakwe.”
Amafutunoti
^ Mu ciHebere, “calibipile mu menso ya kwa Samwele.”
^ Nelyo “abakalaipangila amafuta ayanunkila.”
