Ibuuku lya Kubalilapo Ilya kwa Samwele 9:1-27
-
Samwele amonana na Shauli (1-27)
9 Kwali umwaume umwina Benjamini,+ ishina lyakwe ali ni Kishi,+ umwana wa kwa Abiele, umwana wa kwa Serore, umwana wa kwa Bekorati, umwana wa kwa Afia, kabili ali mukankaala nga nshi.
2 Alikwete umwana umwaume ishina lyakwe ali ni Shauli.+ Shauli ali mulumendo umusuma, kabili mu Israele tamwali umwaume uwamucilile ubusuma, kabili ali umutali ukucila abantu bonse ica kuti balemufika fye mu mapeya.
3 Ilyo impunda* sha kwa Kishi, wishi wa kwa Shauli shalubile, Kishi aebele umwana wakwe Shauli ati: “Sendapo umubomfi muye mu kufwaya impunda.”
4 Bapitile mu citungu ca mpili ica kwa Efraimu na mu calo ca Shalisha, lelo tabashisangile. Bapitile mu calo ca Shaalimu, namo mwine tabashisangile. Baendawike mu calo conse ica bena Benjamini, lelo teshakumoneka nakalya.
5 Ilyo bafikile ku calo ca Sufi, Shauli aebele umubomfi wakwe uo ali nankwe ati: “Natubwelelemo, pantu tata kuti atampa ukusakamana pali ifwe ukucila ukusakamana pa mpunda.”+
6 Lelo umubomfi wakwe amwebele ati: “Muli uno musumba mwaliba umuntu wa kwa Lesa uo abantu bacindika. Fyonse ifyo alanda filacitika.+ Natuleya kuli ena. Nalimo kuti atweba uko twingasanga impunda.”
7 E lyo Shauli aebele umubomfi wakwe ati: “Nga twaya kuli ena, finshi twalamutwalila? Tatukwete umukate mu mifuko; tatukwete nangu cimo ica kutwalila umuntu wa kwa Lesa wa cine. Bushe kuli ifyo twingamutwalila?”
8 Umubomfi ayaswike Shauli na kabili ati: “Ninkwata akandalama akanono aka silfere.* Nalayapeela umuntu wa kwa Lesa wa cine, pa kuti atwebe uko twingayasanga impunda.”
9 (Kale mu Israele umuntu pa kuya mu kwipusha Lesa fimo alelanda ati: “Tiyeni ku wiluka ifimonwa.”+ Pantu abo twita ukuti bakasesema, kale twalebeta ukuti abeluka ifimonwa.)
10 Lyena Shauli aebele umubomfi wakwe ati: “Walanda bwino. Natuleya.” E ico baile mu musumba umwali umuntu wa kwa Lesa wa cine.
11 Ilyo baleninika pa kuya mu musumba, bakumenye abakashana abaleya mu kutapa amenshi. E ico babepwishe abati: “Bushe uwiluka ifimonwa+ e mo ali mu musumba?”
12 Babaswike abati: “E mo ali. Na kuba uyo aleya pa ntanshi yenu. Endesheni, pantu naisa mu musumba pa mulandu wa kuti buno bushiku abantu baletuula ilambo+ pa cifulo ca kutuulilapo amalambo.+
13 Nga mwaingila fye mu musumba mwalamusanga ninshi talaya mu kulya pa cifulo ca kutuulilapo amalambo. Abantu tabalye mpaka afike, pantu e upaala ilambo. Nga apaala ilambo, abo betile kuti batampa ukulya. E ico kabiyeni ili line mwalamusanga.”
14 E ico balile ku musumba. Ilyo bafikile mu musumba, bamwene Samwele aleisa mu kubakumanya pa kuti aye nabo pa cifulo ca kutuulilapo amalambo.
15 Ubushiku bwafumineko, Yehova aebele* Samwele ati:
16 “Mailo nga ino ine nshita nkakutumina umuntu uukafuma ku calo ca kwa Benjamini.+ Ufwile ukumusuba pa kuti akabe intungulushi ya bantu bandi abena Israele,+ kabili uyo muntu akapususha abantu bandi ku baPelishiti. Pantu nimona ifyo abantu bandi balecululuka, kabili ning’umfwa ifyo balelilishika.”+
17 Ilyo Samwele amwene Shauli, Yehova amwebele ati: “E uyu nakwebelepo ukuti e ukalateka abantu bandi.”+
18 Lyena Shauli apalamine kuli Samwele pa mpongolo kabili amwebele ati: “Shi njebeni, ni kwisa kwaba ing’anda ya wiluka ifimonwa?”
19 Samwele ayaswike Shauli ati: “Nine wine njiluka ifimonwa. Tangileniko ku cifulo ca kutuulilapo amalambo, mwalalya na ine lelo.+ Mukaya mailo ulucelo, kabili nalakweba fyonse ifyo ulefwaya ukwishiba.*
20 Lelo wisakamana pa mpunda ishalubile inshiku shitatu ishapitapo,+ pantu nashimoneka. Bushe ifisuma fyonse ifya mu Israele fya bani? Bushe te fyobe na ba mu ng’anda ya kwa wiso bonse?”+
21 E lyo Shauli amwaswike ati: “Bushe nshili mwina Benjamini uwa mu mukowa uwacepesha pa mikowa ya bena Israele,+ kabili bushe ulupwa lwandi te lwacepesha mu ndupwa shonse isha mu mukowa wa kwa Benjamini? Nomba cinshi mwanjebela aya mashiwi?”
22 Lyena Samwele asendele Shauli no mubomfi wakwe abengisha mu ng’anda ya kuliilamo, kabili abatekele apacindamishe ukucila apo abaume bonse abo baitile abali nalimo 30 baikele.
23 E lyo Samwele aebele uwaleipika ati: “Leta icipimfya ca nama ico nakupeele, kabili ico nakwebele nati, ‘Sunga.’”
24 E ico uwaleipika abuulile ukulu kwa nama akuteka na pali Shauli. Kabili Samwele amwebele ati: “Uku ukulu kwa nama bateka apa niwe twasungiile. Lya, pantu niwe basungiile pa kuti ulye buno bushiku. Pantu nalibebele ukuti, ‘ninjita abeni.’” E ico pali bulya bushiku Shauli aliliile pamo na Samwele.
25 Lyena bafumine pa cifulo ca kutuulilapo amalambo+ baya mu musumba, kabili Samwele akonkenyepo fye ukulanda na Shauli pa mutenge wa ng’anda.
26 Babuukile ku macaca, kabili Samwele aitile Shauli uwaleele pa mutenge, e lyo amweba ati: “Ipekanye pa kuti muleya.” E ico Shauli ali-ipekenye kabili ena na Samwele bafumiine panse.
27 Ilyo baletentemuka kunse ya musumba, Samwele aebele Shauli ati: “Eba umubomfi+ obe atangileko,” e ico alitangileko. “Lelo iwe iminina pa kuti nkwebe ifyo Lesa alandile.”
Amafutunoti
^ Mu ciHebere, “impunda ishikota.”
^ Mu ciHebere, “hafu ya hafu ye shekele lya silfere. Ishekele lyalefina ukucilako panono pa magramu 11. Moneni Ifyebo Fyalundwako pa B14.
^ Mu ciHebere, “afimbwile pa kutwi kwa kwa.”
^ Mu ciHebere, “fyonse ifili mu mutima obe.”