Ibuuku lya Bubili Ilya Imilandu 32:1-33
32 Ilyo Hisekia abombele iyi milimo yonse ne cishinka,+ Imfumu Sankeribu iya ku Asiria yaishile mu kusansa Yuda. Yashingile ne misumba yonse iya malinga pantu yalefwaisha ukubongolola ifibumba pa kuti ipoke iyi misumba.+
2 Ilyo Hisekia aishibe ukuti Sankeribu alishile kabili alefwaisha ukulwa inkondo na bena Yerusalemu,
3 kabili pa numa ya kwipushako bacilolo na bashilika bakwe, Hisekia asalilepo ukuti bacilike utumfukumfuku twa menshi utwali kunse ya musumba,+ e ico nabo balisumiine ukuti bacilike.
4 Abantu abengi balilongene kabili babombeele pamo ukucilika utumfukumfuku tonse no mulonga uwapitile mu calo, balelanda abati: “Tatulefwaya imfumu sha bena Asiria shikasange amenshi ayengi nga shaisa.”
5 Na kabili alibombeshe pa kuti akuule icibumba umo cabongolweke, akuulapo ne mpungu. Kabili kunse ya ici cibumba akuulileko icibumba na cimbi. Awemye na Milo*+ ya Musumba wa kwa Davidi umo yaonaike kabili alipangile ifyanso ifingi ne nkwela.
6 Lyena asontele abakalamba ba bashilika aba kuti baleangalila abantu kabili abebele ukuti balongane mu lubansa lwa pa mpongolo ya musumba, e lyo abakoselesha ati:
7 “Shipeni kabili koseni. Mwitiina imfumu ya ku Asiria+ na bantu abengi abo ili nabo pantu abali ku lubali lwesu bengi ukucila abo ili nabo.+
8 Yena ili na maka ya buntunse, lelo ifwe tuli na Yehova Lesa wesu uwalatwafwa kabili uwalatulwila inkondo.”+ Ifi Hisekia imfumu ya Yuda alandile fyalikoseleshe abantu.+
9 Ilyo Sankeribu imfumu ya ku Asiria ali mu Lakishi+ pamo na bashilika bakwe aba maka, atumine ababomfi bakwe ku Yerusalemu kuli Hisekia imfumu ya baYuda, na ku baYuda bonse abali mu Yerusalemu.+ Abatumine ukuyabeba ati:
10 “Sankeribu imfumu ya bena Asiria yalanda aiti, ‘Nani mucetekele pa kuti mutwalilile ukwikala mu Yerusalemu e lyo ninshi natushinga uyu musumba?+
11 Bushe Hisekia talemubepa fye pa kuti mufwe ku cipowe na ku cilaka ifi alemweba ati: “Yehova Lesa wesu ali no kutupokolola ku mfumu ya ku Asiria”?+
12 Bushe te uyu wine Hisekia uwabongolwele ififulo fya kupepelapo ifya kwa Lesa wenu+ ne fiipailo fyakwe+ e lyo aeba abaYuda na bena Yerusalemu ati: “Mulekontamina fye pa ciipailo cimo kabili e po mulefutumwina amalambo”?+
13 Bushe tamwaishiba ifyo ine ne fikolwe fyandi twacitile abantu bonse aba mu fyalo?+ Bushe balesa ba aba bantu balipokolwele ifyalo fyabo ilyo nafisanshile?+
14 Ni lesa nshi pali balesa ba aba bantu abo ifikolwe fyandi fyasanshile uwali na maka ya kupususha abantu bakwe kuli ine, ica kuti imwe muletetekela Lesa wenu ukuti akamupususha ilyo nkamusansa?+
15 Nomba mwileka Hisekia amubepe nelyo amubeleleke,+ mwimucetekela, pantu takwaba lesa nangu umo uwa nko nelyo uwa bufumu uwapusushapo abantu bakwe kuli ine na ku fikolwe fyandi. Kanshi na Lesa wenu takamupusushe ilyo nkamusansa!’”+
16 Ababomfi ba kwa Sankeribu batwalilile ukusaalula Yehova Lesa wa cine e lyo na Hisekia umubomfi wakwe.
17 Sankeribu alembele na makalata+ ya kusaalula Yehova Lesa wa bena Israele+ na ya kulanda ifyabipa pali ena, alembele ati: “Nga filya fine balesa ba bantu ba mu fyalo fimbi bashingapokolola abantu babo kuli ine,+ e fyo na Lesa wa kwa Hisekia ashakapokolole abantu bakwe ilyo nkabasansa.”
18 Kabili balebilikisha abena Yerusalemu abali pa cibumba mu lulimi lwa baYuda pa kuti babatiinye kabili babasakamike pa kuti bapoke umusumba.+
19 Balesaalula Lesa wa mu Yerusalemu nga filya fine balesaalula tulesa twa bantu ba pano isonde uto abantu baapanga.
20 Lelo Imfumu Hisekia na kasesema Esaya+ umwana wa kwa Amose batwalilile fye ukupepa no kupaapaata Lesa ku muulu ukuti abafwe.+
21 Lyena Yehova atumine malaika uwaishileipaya abashilika bonse aba maka,+ intungulushi na bakalamba ba bashilika abali mu nkambi ya mfumu ya bena Asiria, ica kuti imfumu ya ku Asiria yabwelelemo ku calo ca iko ninshi naiseebana. Pa numa yaingile mu ng’anda* ya kwa lesa wa iko. Ilyo yali mulya abana ba iko bamo baishileyipaya ku lupanga.+
22 E fyo Yehova apuswishe Hisekia na baleikala mu Yerusalemu ku Mfumu Sankeribu iya ku Asiria e lyo na ku balwani babo bonse kabili alengele batuusha ku balwani babo bonse.
23 Kabili abantu abengi baleteele Yehova ubupe ku Yerusalemu kabili bapeele Hisekia imfumu ya Yuda+ ifintu ifisuma nga nshi, pa numa abantu ba mu fyalo fyonse balimucindike sana.
24 Muli shilya nshiku, Hisekia alilwele ica kuti ali fye mu kufwa kabili alipepele kuli Yehova+ na o alimwaswike, e lyo amupeela icishibilo.+
25 Lelo Hisekia tacitile ifyalangile ukuti alitashishe pa fisuma ifyo bamucitiile pantu aishileba ne cilumba, kabili ubukali bwa kwa Lesa bwaishile pali ena na pa baYuda na pa baleikala mu Yerusalemu.
26 Pa numa Hisekia ali-icefeshe kabili alilekele ukuba ne cilumba.+ Abena Yerusalemu nabo bali-icefeshe, kabili ubukali bwa kwa Yehova tabwaishile pali bena ilyo Hisekia ali no mweo.+
27 Hisekia aishilekwata ifyuma ifingi nga nshi kabili alicindeme.+ Akuulile na matala+ ya kusungilamo silfere, golde, amabwe yakosa umutengo, amafuta ya balsamu, inkwela e lyo ne fintu fimbi ifisuma.
28 Akuulile na matala ya ngano, na ya mwangashi uupya na ya mafuta, kabili apangile amatanga ya nama shalekanalekana na macinka ya mpaanga.
29 Hisekia ali-ikuulile ne misumba, alikwete ne fitekwa ifingi. Akwete impaanga, imbushi ne ng’ombe, pantu Lesa alilengele akwata ifintu ifingi.
30 Hisekia e wacilike intulo ya menshi+ ya ku Gihone+ kabili ayalwilile ku masamba ya Musumba wa kwa Davidi.+ Fyonse ifyo Hisekia alecita fyale-enda bwino.
31 Lelo ilyo abo batumine kuli bacilolo ba ku Babiloni baishile kuli Hisekia pa kuti bamwipushe pa cishibilo+ icacitike mu calo,+ Lesa wa cine alimulekele acita ifyo alefwaya pa kuti amweshe,+ amone fyonse ifyali mu mutima wakwe.+
32 Amalyashi yambi aya kwa Hisekia ne fyo alangile ukutemwa ukushipwa,+ balifilemba umo balemba icimonwa ca kwa kasesema Esaya+ umwana wa kwa Amose, mwi Buuku lya Mfumu sha baYuda ne sha bena Israele.+
33 Lyena Hisekia alifwile nge fyafwile ifikolwe fyakwe, kabili bamushiikile mu nshiishi iyali pa mutentemuko uwali pa kuya ku nshiishi uko bashiikile abana baume ba kwa Davidi;+ kabili abaYuda bonse na baleikala mu Yerusalemu balimucindike ilyo afwile. Manase umwana wakwe e wamupyene pa bufumu.
Amafutunoti
^ Nalimo ili lyali liloba ilyo baletulika mu mbali ye linga pa kuti bacingilile umusumba.
^ Nelyo “itempele.”
