Ibuuku lya Bubili Ilya Ishamfumu 10:1-36
10 Nomba Ahabu+ akwete abana abaume 70 mu Samaria. E ico Yehu alembele amakalata e lyo ayatuma ku Samaria kuli bacilolo ba ku Yesreele, ku bakalamba+ na ku balesunga abana ba kwa Ahabu. Alembele ati:
2 “Ilyo mwalapokelela iyi kalata, ninshi muli na bana abaume aba kwa shikulwinwe, amaceleta ya nkondo, bakabalwe e lyo ne fyanso, kabili ninshi muli mu musumba we linga.
3 Pa bana ba kwa shikulwinwe, musalepo uwaba ne mibele iisuma pali bonse kabili uulingile,* mumubike pa cipuna ca bufumu ica kwa wishi. Lyena mulwile ing’anda ya kwa shikulwinwe.”
4 Lelo balitiinine sana, kabili balandile abati: “Moneni! Imfumu shibili nga tashamucimfishe,+ bushe ifwe ni fwe twingamucimfya?”
5 E ico uwaleangalila isano,* intungulushi ya musumba, abakalamba na balesunga abana ba mfumu batumiine Yehu amashiwi ya kuti: “Ifwe tuli babomfi benu, kabili tukacita fyonse ifyo mukatweba. Lelo tatwabike umuntu nangu umo pa bufumu. Mucite ico mulemona ukuti e ciweme.”
6 Lyena muli kalata yalenga bubili iyo abalembeele, abebele ati: “Nga muli ku lubali lwandi kabili nga mulefwaya ukulang’umfwila, muputule imitwe ya bana ba kwa shikulwinwe, kabili mailo nga ino ine nshita mukandetele imitwe ku Yesreele.”
Nomba abana ba mfumu abaume 70, bali na bashimucindikwa ba mu musumba abalebakusha.
7 Ilyo bapokelele fye kalata, babuulile abana ba mfumu abaume 70 babepaya,+ e lyo babika imitwe yabo mu miseke, bamutumina na ku Yesreele.
8 Lyena inkombe yaingile umwali Yehu, e lyo yamweba aiti: “Baleta imitwe ya bana ba mfumu abaume.” Na o atile: “Ituulikeni imiina ibili pa mpongolo ya musumba mpaka mailo ulucelo.”
9 Ilyo afumine ulucelo, aiminine pa ntanshi ya bantu bonse e lyo abeba ati: “Muli bakaele.* Kwena nalipangiile shikulu kabili nalimwipeye,+ nomba ni bani bepeye bonse aba?
10 E ico mwishibe ukuti fyonse ifyo Yehova alandile fikafikilishiwa.+ Yehova akafikilisha fyonse ifyo alandile pa ba mu ng’anda ya kwa Ahabu, kabili Yehova nacita ifyo alandile ukupitila mu mubomfi wakwe Eliya.”+
11 Kabili Yehu aipeye bonse aba mu ng’anda ya kwa Ahabu abashele mu Yesreele, kumo na bashimucindikwa bakwe bonse, abo aishibene nabo na bashimapepo bakwe,+ ica kuti takwali nangu umo uwapuswike.+
12 Lyena alimine aya ku Samaria. Ing’anda iyo bakacema balekakilamo impaanga* yali mu mbali ya nshila.
13 Kulya kwine e ko Yehu akumanishishe bamunyina ba kwa Ahasia imfumu+ ya Yuda, kabili abepwishe ati, “Nimwe bani?” Bamwaswike abati: “Nifwe bamunyina ba kwa Ahasia, kabili tuleya mu kumona nga ca kuti abana ba mfumu na bana ba kwa namfumu bali umutende.”
14 Ilyo line alandile ati: “Bekateni!” E ico balibekete kabili babepaile pa cishima ca pa ng’anda balekakilapo impaanga. Abo baipeye bali abaume 42, talekele nangu umo apusuka.+
15 Ilyo alefuma kulya, akumenye Yehonadabu+ umwana wa kwa Rekabu+ uwaleisa mu kumukumanya. Ilyo amuposeshe,* amwipwishe ati: “Bushe umutima obe wa cishinka* kuli ine, nge fyo umutima wandi waba uwa cishinka kuli iwe?”
Yehonadabu amwaswike ati: “E mukwai.”
E lyo amwebele ati: “Nga ca kuti e fyo umutima obe waba, ntambika ukuboko kobe.”
E ico alimutambike ukuboko, e lyo Yehu amutintila mwi celeta umo ali.
16 Lyena amwebele ati: “Natuleya bonse, umone ifyo nacincila mu kubombela Yehova.”*+ E ico Yehu aile nankwe mwi celeta lyakwe ilya nkondo.
17 Lyena afikile ku Samaria, kabili aipeye aba mu ng’anda ya kwa Ahabu bonse abashele mu Samaria, mpaka abalofya+ nga filya fine Yehova aebele Eliya.+
18 Kabili Yehu alongenye abantu bonse, e lyo abeba ati: “Ahabu alepepa Baali panono,+ lelo ine nkalamupepa sana.
19 E ico iteni bakasesema ba kwa Baali+ bonse, abantu bonse abamupepa, na bashimapepo bakwe bonse+ bese kuli ine. Mwileka nangu umo ashale, pantu ndefwaya ukutuulila Baali ilambo ilikalamba. Uushaise tulemwipaya.” Lelo ico Yehu acitiile ifi, ni co alefwaya ukwipaya abalepepa Baali.
20 Kabili Yehu abebele ati: “Bilisheni ukuti kukaba ukulongana ukwacindama ukwa kupepa Baali.” E ico balibilishe.
21 Pa numa Yehu atumine amashiwi mu Israele monse, kabili bonse abalepepa Baali balishile. Takwali nangu umo uwashele. Baingile mu ng’anda* ya kwa Baali,+ kabili ing’anda ya kwa Baali yaliswile ukufika fye na ku mpela.
22 E lyo aebele uwaleangalila umwa kusungila ifya kufwala ati: “Letela bonse abapepa Baali ifya kufwala.” E ico alibaleteele ifya kufwala.
23 Lyena Yehu na Yehonadabu+ umwana wa kwa Rekabu baingile mu ng’anda ya kwa Baali. E lyo Yehu aebele abalepepa Baali ati: “Shininkisheni ukuti muno tamuli abapepa Yehova, kano fye abapepa Baali.”
24 Lyena balingiile pa kuti batuule amalambo ne mituulo ya koca. Yehu abikile abaume 80 panse kabili abebele ati: “Nga ca kuti pa bantu abalaisa papusumuka umo, uwalamupusumuna e walafwilamo.”*
25 Ilyo Yehu apwishishe fye ukutuula ilambo lya koca, aebele abalelinda imfumu na bakalamba ba bashilika ati: “Ingileni, mubepaye! Mwileka nangu umo afume!”+ E ico balingiile kabili balibepeye ku lupanga e lyo balabapoosa panse. Bailefika fye na ku muputule wa mu kati sana* uwa ng’anda ya kwa Baali.
26 Lyena bafumishe ifimuti fya kupepelapo fyonse ifyo baimike+ ifyali mu ng’anda ya kwa Baali, bafyoca no kufyoca.+
27 Bawishishe ne co baimike ico balepepelapo Baali,+ kabili babongolwele ing’anda ya kwa Baali,+ baisangula ne cimbusu, nge fi fine yaba ukushinta na lelo.
28 E fyo Yehu alofeshe abalepepa Baali mu Israele.
29 Lelo Yehu alecita imembu isho Yeroboamu umwana wa kwa Nebati alengele abena Israele balecita. Alepepa abana ba ng’ombe aba golde abali ku Betele na ku Dani.+
30 E ico Yehova aebele Yehu ati: “Apo naucita ifisuma kabili naucita ifyalungama mu menso yandi, e kutila naucita fyonse ifyo umutima wandi walefwaya ukucita aba mu ng’anda ya kwa Ahabu,+ abana bobe bakekala pa cipuna ca bufumu mu Israele,+ ukufika fye na ku nkulo yalenga 4.”
31 Lelo Yehu tabikileko amano pa kuti alekonka Amafunde ya kwa Yehova Lesa wa kwa Israele no mutima wakwe onse.+ Alecita imembu isho Yeroboamu alengele abena Israele balecita.+
32 Muli shilya nshiku, Yehova alekele abalwani ba bena Israele balapoka abena Israele icalo panono panono. Hasaele alebasansa mu citungu ca Israele monse,+
33 ukufuma ku Yordani ukuya ku kabanga, icitungu ca Gileadi conse ica bena Gadi, abena Rubene na bena Manase,+ ukufuma ku Aroere, iyaba mupepi no Mupokapoka wa Arnone, ukuyafika ku Gileadi na Bashani.+
34 Amalyashi yambi aya kwa Yehu, fyonse ifyo acitile ne milimo yonse iyo abombele, bushe tabafilemba mu malyashi ya mfumu sha mu Israele?
35 Lyena Yehu alifwile nge fyafwile ifikolwe fyakwe, kabili bamushiikile mu Samaria. Umwana wakwe Yehoahasi+ e wamupyene pa bufumu.
36 Yehu atekele abena Israele mu Samaria pa myaka 28.
Amafutunoti
^ Nelyo “uwalungama.”
^ Mu ciHebere, “ing’anda.”
^ Nelyo “muli balungami.”
^ Nalimo ici cali cifulo apo bakacema balekakila impaanga pa kushibeya.
^ Nelyo “ilyo amupaalile.”
^ Mu ciHebere, “uwalungama.”
^ Nelyo “ifyo nshitekelesha abalwisha Yehova.
^ Nelyo “itempele.”
^ Nelyo “umweo wenu pa mweo wakwe.”
^ Mu ciHebere, “umusumba,” nalimo ici calemoneka kwati cikuulwa ca malinga.
