Ibuuku lya Bubili Ilya Ishamfumu 11:1-21
11 Nomba ilyo Atalia+ nyina wa kwa Ahasia amwene ukuti umwana wakwe alifwile,+ aliimine pa kuti epaye abana ba mfumu bonse.*+
2 Lelo Yehosheba umwana mwanakashi wa Mfumu Yehoramu, nkashi ya kwa Ahasia, afumishe Yehoashi+ umwana wa kwa Ahasia pa bana ba mfumu abo bali no kwipaya. Ailemufisa mu muputule wa kulaalamo uwa mu kati sana pamo no walemonsha. Balimufishile ica kuti Atalia tamumwene, e ico tabamwipeye.
3 Afiseme pa myaka 6 mu ng’anda ya kwa Yehova pamo no walemonsha, ninshi Atalia aleteka icalo.
4 Mu mwaka walenga 7, Yehoyada atumine abakuyaita abakalamba ba balinshi abena Kari abali mu mabumba ya bashilika 100 na bakalamba ba balelonda kwi sano+ abali mu mabumba ya bashilika 100 pa kuti bese ku ng’anda ya kwa Yehova. Apangene nabo icipangano kabili alengele balape mu ng’anda ya kwa Yehova ukuti baali no kusunga ici icipangano. Lyena abalangile umwana wa mfumu.+
5 Abebele ati: “Ifi e fyo mukacite: Mukakanikane mu mabumba yatatu. Ibumba lya kubalilapo likese mu kulinda ing’anda ya mfumu*+ pe Sabata,
6 ibumba lyalenga bubili likabe pa Mpongolo ya Mufula, e lyo ibumba lyalenga butatu likabe pa mpongolo ku numa ya po abalonda kwi sano beminina. Mukalelekanina ukulonda ing’anda.
7 Amabumba yenu yabili ayashilingile ukubomba pe Sabata, yafwile ukulonda ing’anda ya kwa Yehova pa kuti yacingilila imfumu.
8 Mufwile ukushinguluka imfumu, ninshi cila muntu naikata ifyanso. Onse uukafwaya ukupula apali abashilika mukamwipaye. Mukaleba ne mfumu konse uko ikalaba.”*
9 Abakalamba ba mabumba ya bashilika 100+ bacitile filya fine fye Yehoyada shimapepo abebele. E ico cila muntu asendele abantu bakwe abali no kubomba pe Sabata, pamo na bashali no kubomba pe Sabata, kabili baishile kuli Yehoyada shimapepo.+
10 Lyena shimapepo apeele abakalamba ba mabumba ya bashilika 100 amafumo ne nkwela ishabulungana ifyali fya Mfumu Davidi, ifyali mu ng’anda ya kwa Yehova.
11 Kabili abalelonda kwi sano+ baileiminina apo cila muntu alingile ukubombela ninshi bali ne fyanso mu minwe. Baiminine ukufuma ku kulyo kwa ng’anda ukufika ku kuso kwa ng’anda, mupepi ne ciipailo+ kabili mupepi ne ng’anda, nabashinguluka imfumu.
12 Lyena Yehoyada afumishe umwana wa mfumu,+ amubika ne cisote ca bufumu* ne Buuku lya Mafunde Ikumi* pa mutwe,+ kabili bamwitulwilile amafuta pa mutwe, bamubika na pa bufumu. E lyo batendeke ukutoota, balelanda no kuti: “Kalebalika mwe mfumu!”+
13 Ilyo Atalia aumfwile icongo ca bantu abalebutuka, ilyo line aishile ku bantu abali pa ng’anda ya kwa Yehova.+
14 Lyena amwene imfumu nayiminina pa luceshi ukulingana no lutambi.+ Abakalamba na balelisha amapenga+ bali pamo ne mfumu, kabili abantu bonse aba mu calo balesekelela ninshi balelisha na mapenga. Ilyo line Atalia alepwile ifya kufwala fyakwe e lyo apunda ati: “Nabampondokela! Nabampondokela!”
15 Lelo Yehoyada shimapepo aebele abakalamba ba mabumba ya bashilika 100,+ abaleangalila abashilika ati: “Mufumyeni pa bashilika, kabili onse uwalamukonka mumwipaye ku lupanga!” Pantu shimapepo atile: “Mwimwipaila mu ng’anda ya kwa Yehova.”
16 E ico balikete Atalia, kabili ilyo afikile apo bakabalwe bengilila mu ng’anda ya mfumu,*+ balimwipeye.
17 Lyena Yehoyada alengele imfumu na bantu+ bapangana icipangano na Yehova ica kuti bali no kutwalilila ukuba abantu ba kwa Yehova. Na kabili alengele imfumu yapangana icipangano na bantu.+
18 Pa numa abantu bonse mu calo baishile ku ng’anda* ya kwa Baali no kubongolola ifiipailo fyakwe,+ batobawile ne fimpashanya fyakwe fyonse,+ kabili baipaile Matani shimapepo wa kwa Baali+ pa ntanshi ya fiipailo.
Lyena shimapepo Yehoyada asontele abakwangalila ing’anda ya kwa Yehova.+
19 Na kabili, asendele abakalamba ba balinshi abena Kari abali mu mabumba ya bashilika 100+ na bakalamba ba balelonda kwi sano+ abali mu mabumba ya bashilika 100, e lyo na bantu bonse mu calo pa kuti bashindike imfumu nga yafuma mu ng’anda ya kwa Yehova. Pa kuya ku ng’anda ya mfumu* bapitile inshila ya ku mpongolo ya balelonda kwi sano. Lyena aikele pa cipuna ca bufumu.+
20 E ico abantu bonse mu calo balesekelela, kabili mu musumba tamwali ifimfulunganya pantu balipeye Atalia ku lupanga pa ng’anda ya mfumu.
21 Yehoashi+ ali ne myaka 7 ilyo bamubikile pa bufumu.+
Amafutunoti
^ Mu ciHebere, “imbuto sha bufumu shonse.”
^ Nelyo “isano.”
^ Mu ciHebere, “ilyo yafuma na lintu yaingila.”
^ Nelyo kuti yapilibula no kuti icimfungwa umwali Amafunde ya kwa Lesa.
^ Nelyo “icilongwe.”
^ Nelyo “mwi sano.”
^ Nelyo “itempele.”
^ Nelyo “isano.”
