Ibuuku lya Bubili Ilya Ishamfumu 12:1-21
12 Mu mwaka walenga 7 ukutula apo Yehu atendekeele ukuteka,+ e mo Yehoashi+ aishileba imfumu, kabili atekele imyaka 40 mu Yerusalemu. Nyina ali ni Sibia uwa ku Beere-sheba.+
2 Yehoashi alitwalilile ukucita ifisuma mu menso ya kwa Yehova inshiku shonse isho Yehoyada shimapepo alemusambilisha.
3 Lelo ififulo fya kupepelapo+ fyena tabafyonawile, kabili abantu balitwalilile ukutuula amalambo pa fifulo fya kupepelapo kabili baleocelapo amalambo.
4 Yehoashi aebele bashimapepo ati: “Buuleni indalama shonse isho abantu baleta pa ng’anda ya kwa Yehova isha mutuulo wa mushilo,+ indalama isho cila muntu* alingile ukutuula,+ indalama isho bashimapepo bapima ukuti umuntu uwalapa umulapo e sho alingile ukutuula, ne ndalama shonse isho umuntu apanga mu mutima ukuti e sho akaleta ku ng’anda ya kwa Yehova.+
5 Bashimapepo abene e bakalapoka ku bantu babo abakalatuula* kabili bakaleshibomfya mu kuwamya ing’anda, ponse apo yaonaika.”*+
6 Nomba na lintu umwaka walenga 23 ukutula apo Yehoashi abelele imfumu wafikile, bashimapepo bali tabalawamya ifyaonaike ku ng’anda.+
7 E ico Imfumu Yehoashi yaitile shimapepo Yehoyada+ na bashimapepo bambi kabili yabepwishe aiti: “Cinshi ico mushilawamisha ifyaonaika ku ng’anda? E ico muleke ukupoka indalama isho abantu batuula, kano nga mukashibomfya mu kuwamya ifyaonaika ku ng’anda.”+
8 Bashimapepo balisumine ukuti bali no kuleka ukulapoka indalama ku bantu, kabili balisumine no kuti tabali no kuwamya ifyaonaike ku ng’anda.
9 Lyena Yehoyada shimapepo abuulile icipao+ atula ne cipunda pa nkupiko, e lyo acibika mupepi ne ciipailo ku kulyo kwa muntu uuleingila mu ng’anda ya kwa Yehova. Muli ici icipao e mo bashimapepo abalebombela pa mwinshi balebika indalama shonse isho abantu baleleta ku ng’anda ya kwa Yehova.+
10 Nga bamona ukuti indalama shafula sana mu cipao, kalemba wa mfumu na shimapepo mukalamba baleisa mu kusenda* no kupenda indalama isho abantu baleleta mu ng’anda ya kwa Yehova.+
11 Nga bapenda indalama, balepeela abaleangalila umulimo pa ng’anda ya kwa Yehova. Nabo balelipila bakabasa na bakakuula abalebombela pa ng’anda ya kwa Yehova,+
12 na baishibe ifya kukuulila na mabwe na baleputula amabwe. Balishitilemo ne mbao na mabwe ayaputulwa, ifya kubomfya pa kuwamya ifyaonaike ku ng’anda ya kwa Yehova. Kabili balishitilemo na fimbi ifyalefwaikwa pa kuwamya ifyaonaike ku ng’anda.
13 Lelo pa kupanga ifya kubikamo amenshi ifya silfere, utwa kushimishako inyali, imbale shafonka, amapenga,+ nelyo icipe conse ica golde nangu ica silfere ifya kubomfya pa ng’anda ya kwa Yehova, tababomfeshe indalama isho abantu baletele ku ng’anda ya kwa Yehova.+
14 Balelipila fye abalebomba umulimo, kabili e sho balebomfya pa kuwamya ifyaonaike ku ng’anda ya kwa Yehova.
15 Tabale-eba abaleangalila umulimo ukuti balondolole ifyo balebomfya indalama isho balelipila abalebomba umulimo, pantu bali ne cishinka.+
16 Lelo indalama sha mituulo ya pa mulandu+ ne ndalama sha mituulo ya pa membu, shena tabaleshitwala ku ng’anda ya kwa Yehova, shali sha bashimapepo.+
17 Pali ilya ine nshita Hasaele+ imfumu ya Siria aile mu kulwisha umusumba wa Gati+ kabili aliupokele. Pa numa aile mu kulwisha Yerusalemu.+
18 E ico Yehoashi imfumu ya Yuda abuulile imituulo ya mushilo yonse iyo Yehoshafati, Yehoramu na Ahasia abali fikolwe fyakwe kabili abali imfumu sha Yuda bapaatwilile Lesa e lyo ne mituulo yakwe iya mushilo na golde yonse iyali mu cipao ca mu ng’anda ya kwa Yehova na mu cipao ca mu ng’anda ya mfumu.* Lyena afitumine kuli Hasaele imfumu ya Siria.+ E ico yalilekele ukulwisha Yerusalemu.
19 Amalyashi yambi aya kwa Yehoashi na fyonse ifyo acitile, bushe tabafilemba mwi buuku lya malyashi ya mfumu sha mu Yuda?
20 Lelo ababomfi bakwe nabo balimupondokele+ kabili bamwipaile mu ng’anda iyali apalundumana,*+ mu nshila iyaya ku Sila.
21 Yosakari umwana wa kwa Shimeati na Yehosabadi umwana wa kwa Shomere abali ababomfi bakwe, e bamwipeye.+ Bamushiikile uko bashiikile ifikolwe fyakwe mu Musumba wa kwa Davidi, kabili Amasia umwana wakwe e wamupyene pa bufumu.+
Amafutunoti
^ Nelyo “umweo.”
^ Nelyo “abo baishibana nabo.”
^ Nelyo “apaba imilale.”
^ Nelyo “baleshibika mu mifuko.” Mu ciHebere, “baleshikaka.”
^ Nelyo “isano.”
^ Nelyo “Beti-milo.”
