Ibuuku lya Bubili Ilya Ishamfumu 13:1-25
13 Mu mwaka walenga 23 ukutula apo Yehoashi+ umwana wa kwa Ahasia+ abelele imfumu mu Yuda, e mo Yehoahasi umwana wa kwa Yehu+ atendeke ukuteka abena Israele mu Samaria kabili atekele imyaka 17.
2 Alecita ifyabipa mu menso ya kwa Yehova, kabili talekele ukucita imembu isho Yeroboamu umwana wa kwa Nebati alengele abena Israele balecita.+ Atwalilile fye ukucita imembu.
3 E ico Yehova alifuliilwe+ sana abena Israele+ ica kuti alengele Hasaele imfumu+ ya Siria na Ben-hadadi+ umwana wakwe, balebacusha pa myaka iingi.
4 Mu kupita kwa nshita, Yehoahasi apaapeete* Yehova pa kuti ababelele uluse, kabili Yehova alyumfwile ifyo apaapeete, pantu alimwene ifyo imfumu ya Siria yalecusha abena Israele.+
5 E ico Yehova apeele abena Israele umupusushi,+ uwabapuswishe ku bena Siria abalebacusha, kabili abena Israele batampile ukwikala umutende mu mayanda yabo nge fyo baleikala kale.
6 (Lelo tabalekele ukucita imembu isho aba mu ng’anda ya kwa Yeroboamu balecita kabili isho alengele abena Israele balecita.+ Balitwalilile ukucita ishi imembu, kabili balilekele icimuti ca kupepelapo*+ catwalilila ukuba mu Samaria.)
7 Yehoahasi ashele fye na bashilika 50 abalenina pali bakabalwe, amaceleta 10 na bashilika bambi 10,000, pantu abashilika bambi imfumu ya Siria yalibepeye,+ yabashonaula baba fye kwati lukungu uluba apo balepumina ingano.+
8 Amalyashi yambi aya kwa Yehoahasi, fyonse ifyo acitile ne milimo yonse iyo abombele, bushe tabafilemba mwi buuku lya malyashi ya mfumu sha mu Israele?
9 Lyena Yehoahasi alifwile nge fyafwile ifikolwe fyakwe, kabili bamushiikile mu Samaria.+ Yehoashi umwana wakwe e wamupyene pa bufumu.
10 Mu mwaka walenga 37 ukutula apo Yehoashi abelele imfumu mu Yuda, e mo Yehoashi+ umwana wa kwa Yehoahasi atendeke ukuteka abena Israele mu Samaria, kabili atekele imyaka 16.
11 Alecita ifyabipa mu menso ya kwa Yehova. Alecita imembu shonse isho Yeroboamu umwana wa kwa Nebati alengele abena Israele balecita.+ Atwalilile fye ukucita isho imembu.
12 Amalyashi yambi aya kwa Yehoashi, fyonse ifyo acitile, imilimo yonse iyo abombele ne fyo alwile na Amasia imfumu ya Yuda,+ bushe tabafilemba mwi buuku lya malyashi ya mfumu sha mu Israele?
13 Lyena Yehoashi alifwile nge fyafwile ifikolwe fyakwe, kabili Yeroboamu*+ e wamupyene pa bufumu. Yehoashi bamushiikile mu Samaria uko bashiikile imfumu sha mu Israele.+
14 Nomba ilyo Elisha+ alwele ubulwele ubwasukile bwamwipaya, Yehoashi imfumu ya mu Israele aile kuli ena, alalilila pa cinso cakwe, e lyo alelanda ati: “Tata, tata! Moneni iceleta lya kwa Israele na baume bakwe abanina pali bakabalwe!”+
15 Lyena Elisha amwebele ati: “Buula ubuta ne mifwi.” E ico abuulile ubuta ne mifwi.
16 E lyo aebele imfumu ya Israele ati: “Ikata ubuta.” E ico yalikete ubuta, kabili Elisha abikile iminwe yakwe pa minwe ya mfumu.
17 Lyena aebele imfumu ati: “Isula iwindo ilyabela ku kabanga.” E ico yaliswile. E lyo Elisha ayebele ati: “Lasa!” Na yo yalilashile. Kabili atile: “Mufwi wa kucimfya* uwa kwa Yehova, umufwi wa kucimfya* Siria! Ukacimfya Siria ku Afeke+ mpaka ukamupwishishishe.”
18 Na kabili aebele imfumu ya Israele ati: “Buula imifwi,” kabili yalibuulile. Lyena ayebele ati: “Lasa panshi.” E ico yalashile panshi imiku itatu, yaleka no kuleka.
19 E lyo umuntu wa kwa Lesa wa cine afuliilwe imfumu, kabili ayebele ati: “Wacilinga ukulasa panshi imiku 5 nelyo 6! Aucite fi nga walicimfishe Siria mpaka wamupwishishisha, nomba ukamucimfya fye imiku itatu.”+
20 Pa numa Elisha alifwile kabili balimushiikile. Lyonse pa kutendeka kwa mwaka* kwaleba ifipondo+ fya bena Moabu ifyalebelamina abantu ifyaleisa mu Israele.
21 Ilyo abaume bamo baleshiika umuntu, bamwene ifipondo ifyalebelamina abantu. E ico ilyo line bapoosele uyo muntu mu nshiishi ya kwa Elisha, babutuka no kubutuka. Ilyo icitumbi cakumishe ku mafupa ya kwa Elisha, uwafwile alibuukile,+ aiminina no kwiminina.
22 Nomba Hasaele imfumu+ ya Siria alecusha abena Israele+ inshiku shonse isho Yehoahasi aleteka.
23 Lelo Yehova alibalangulukileko kabili alibabelele uluse+ pa mulandu wa cipangano ico apangene na Abrahamu,+ Isaki+ na Yakobo.+ Talefwaya abonaule, kabili tabalekelesha* ukushinta na lelo.
24 Ilyo Hasaele imfumu ya ku Siria afwile, umwana wakwe Ben-hadadi e wamupyene pa bufumu.
25 Lyena Yehoashi umwana wa kwa Yehoahasi apokolwele Ben-hadadi umwana wa kwa Hasaele imisumba iyo apokele Yehoahasi wishi ilyo alwile nankwe inkondo. Yehoashi amucimfishe imiku itatu,+ kabili alimupokolwele ne misumba ya mu Israele.
Amafutunoti
^ Nelyo “anashishe icinso ca kwa.”
^ E kutila, Yeroboamu wa Cibili.
^ Nelyo “uwa kupususha.”
^ Nelyo “uwa kumupususha ku bena Siria.”
^ Nalimo pa mwela, mu Israele ici iciputulwa ca mwaka caletendeka mu March nelyo mu April.
^ Mu ciHebere, “tabafumya ku cinso cakwe.”
