Ibuuku lya Bubili Ilya Ishamfumu 14:1-29
14 Mu mwaka walenga bubili ukutula apo Yehoashi+ umwana wa kwa Yehoahasi imfumu ya Israele abelele imfumu, e mo Amasia umwana wa kwa Yehoashi imfumu ya mu Yuda aishileba imfumu.
2 Ali ne myaka 25 ilyo atendeke ukuteka, kabili atekele imyaka 29 mu Yerusalemu. Nyina ali ni Yehoadini uwa mu Yerusalemu.+
3 Amasia alecita ifyalungama mu menso ya kwa Yehova, lelo tafyalingene ne fyo Davidi+ icikolwe cakwe acitile. Alicitile fyonse ifyo wishi Yehoashi acitile.+
4 Lelo ififulo fya kupepelapo fyena tabafyonawile,+ kabili abantu balitwalilile ukutuula amalambo pa fifulo fya kupepelapo kabili baleocelapo amalambo.+
5 Ilyo ubufumu bwakwe bwakosele fye, aipeye ababomfi bakwe abaipeye wishi imfumu.+
6 Lelo taipeye abana babo, nga filya fine ifunde lya kwa Yehova ilyalembwa mwi buuku lya Mafunde ya kwa Mose lilanda. Litila: “Bashibo tabafwile ukufwila pa lubembu lwa bana babo, kabili abana nabo tabalingile ukufwila pa lubembu lwa bashibo. Cila muntu afwile ukufwila pa lubembu lwakwe.”+
7 Aipeye abaume abena Edomu+ 10,000 mu Mupokapoka wa Mucele,+ kabili apokele umusumba wa Sela ilyo balelwa inkondo.+ Lyena bainike uyu musumba ukuti Yoketeele kabili e fyo bawita ukufika na lelo.
8 Lyena Amasia atumine abakuyaeba Yehoashi umwana wa kwa Yehoahasi umwishikulu wa kwa Yehu uwalipo imfumu ya Israele ati: “Isa, tulwe inkondo.”*+
9 Yehoashi imfumu ya Israele atumiine Amasia imfumu ya ku Yuda amashiwi ya kuti: “Icimenwa ca myunga ica mu Lebanone catumiine umukedari wa mu Lebanone amashiwi ya kuti, ‘Leka umwana obe umwanakashi abe umukashi wa mwana wandi umwaume.’ Lelo ilyo icinama ca mu mpanga ica mu Lebanone calepita, canyantawile icimenwa ca myunga.
10 Kwena, walicimfya Edomu,+ e co wabela ne cilumba. Akuitakisha pa lulumbi lobe, lelo uleikala fye mu ng’anda yobe.* Cinshi ulefwaila ukuiletelela, uletelele na baYuda?”
11 Lelo Amasia taumfwile.+
E ico Yehoashi imfumu ya bena Israele ailelwa inkondo na Amasia imfumu ya baYuda. Bailelwila ku musumba wa Bete-shemeshe,+ uwa mu Yuda.+
12 Abena Israele bacimfishe abaYuda, ica kuti cila muntu afulumukile ku mwakwe.*
13 Yehoashi imfumu ya Israele aikete Amasia imfumu ya baYuda umwana wa kwa Yehoashi umwana wa kwa Ahasia ku Bete-shemeshe. Lyena baile ku Yerusalemu e lyo batula icipunda mu cibumba ca Yerusalemu ukufuma pa Mpongolo ya kwa Efraimu+ ukufika pa Mpongolo ya pa Kona,+ kabili cali imikono 400.*
14 Asendele golde yonse na silfere yonse ne fipe fyonse ifyo asangile mu ng’anda ya kwa Yehova na mu cipao ca ng’anda ya mfumu* kumo na bantu abo baikete. Lyena abwelele ku Samaria.
15 Amalyashi yambi aya kwa Yehoashi, ifyo acitile, imilimo iyo abombele ne fyo alwile na Amasia imfumu ya Yuda, bushe tabafilemba mwi buuku lya malyashi ya mfumu sha mu Israele?
16 Lyena Yehoashi alifwile nge fyafwile ifikolwe fyakwe kabili bamushiikile mu Samaria+ uko bashiikile imfumu sha mu Israele. Umwana wakwe Yeroboamu*+ e wamupyene pa bufumu.
17 Ilyo Yehoashi+ umwana wa kwa Yehoahasi imfumu ya Israele afwile,+ Amasia+ umwana wa kwa Yehoahasi imfumu ya Yuda aikele imyaka 15.
18 Amalyashi yambi aya kwa Amasia, bushe tabayalemba mwi buuku lya malyashi ya mfumu sha mu Yuda?
19 Pa numa kwali abapangile ukwipaya Amasia+ mu Yerusalemu, nomba afulumukile ku Lakishi, lelo balitumine abaume abakumukonka ku Lakishi, kabili kulya kwine e ko bamwipaile.
20 E ico bamusendeele pali bakabalwe, bamubwesesha ku Yerusalemu e lyo bamushiika uko bashiikile ifikolwe fyakwe mu Musumba wa kwa Davidi.+
21 Lyena abantu bonse aba mu Yuda babuulile Asaria,*+ ninshi ali ne myaka 16,+ bamubika pa bufumu pa kuti apyane wishi Amasia.+
22 Ilyo imfumu* yafwile nge fyafwile ifikolwe fya iko,+ alipokolwele umusumba wa Elati+ pa kuti ube wa mu Yuda na kabili, e lyo aukuula cipya cipya.
23 Mu mwaka walenga 15 ukutula apo Amasia umwana wa kwa Yehoashi imfumu ya Yuda abelele imfumu, e mo Yeroboamu+ umwana wa kwa Yehoashi imfumu ya mu Israele aishileba imfumu mu Samaria kabili atekele imyaka 41.
24 Alecita ifyabipa mu menso ya kwa Yehova. Alecita imembu shonse isho Yeroboamu umwana wa kwa Nebati alengele abena Israele balecita.+
25 Alibweseshe umupaka wa Israele umo wapitile kale ukufuma ku Lebohamati*+ ukuyafika fye na kuli Bemba wa Araba,*+ nga fintu Yehova Lesa wa kwa Israele alandiile mu mubomfi wakwe Yona,+ kasesema wa ku Gati-hefere+ umwana wa kwa Amitai.
26 Pantu Yehova alimwene ukuti abena Israele balecula sana.+ Takwashele nangu umo uwa kubafwa, nangu fye mupiina nelyo uwanaka.
27 Lelo Yehova alilaile ukuti taali no kulofya ishina lya kwa Israele pano isonde.+ E ico alibomfeshe Yeroboamu umwana wa kwa Yehoashi+ pa kubapususha.
28 Amalyashi yambi aya kwa Yeroboamu, fyonse ifyo acitile, imilimo yonse iyo abombele, ifyo alwile ne fyo apokolwele Damaseke+ na Hamati+ pa kuti ibe imisumba ya Yuda na Israele na kabili, bushe tabafilemba mwi buuku lya malyashi ya mfumu sha mu Israele?
29 Lyena Yeroboamu alifwile nge fyafwile ifikolwe fyakwe, e kutila imfumu sha mu Israele. Umwana wakwe Sekaria+ e wamupyene pa bufumu.
Amafutunoti
^ Nelyo “tumonane icinso ne cinso.”
^ Nelyo “mwi sano.”
^ Mu ciHebere, “kwi tenti lyakwe.”
^ Nalimo amamita 178. Moneni Ifyebo Fyalundwako pa B14.
^ Nelyo “isano.”
^ E kutila, Yeroboamu wa Cibili.
^ Ilyalola mu kuti “Yehova Natwafwa.” Pali 2 Ishamfumu 15:13; 2 Imilandu 26:1-23; Esaya 6:1 na pali Sekaria 14:5, bamwita ati Usia.
^ E kutila, Amasia wishi.
^ Nelyo “apa kwingilila mu Hamati.”
^ E kutila, Bemba wa Mucele, nelyo Bemba Wafwa.
