Ibuuku lya Bubili Ilya Ishamfumu 19:1-37
19 Ilyo fye Imfumu Hisekia yaumfwile aya amashiwi, yalepwile ifya kufwala fya iko yafwala ne nsamu, e lyo yayaingila mu ng’anda ya kwa Yehova.+
2 Lyena yatumine Eliakimu uwaleangalila aba mu ng’anda ya mfumu,* Shebna kalemba na bashimapepo abakalamba kuli Esaya kasesema,+ umwana wa kwa Amose, ninshi nabafwala insamu.
3 Bamwebele abati: “Hisekia atila, ‘Buno bushiku bwa bulanda, bwa kwebaulwa* kabili bwa kuseebana; pantu tuli ngo mwanakashi uuli mu kupaapa, nomba takwete amaka ya kupaapa.+
4 Nalimo Yehova Lesa obe kuti aumfwa amashiwi yonse aya kwa Rabsake,* uo shikulu wakwe imfumu ya Asiria atumine mu kusaalula Lesa wa mweo,+ kabili akamukanda pa mashiwi ayo Yehova Lesa obe omfwile. E ico pepelako+ abashalapo abapuswike.’”
5 E ico ababomfi ba mfumu Hisekia baile kuli Esaya,+
6 kabili Esaya abebele ati: “Muye-eba shikulwinwe amuti, ‘Yehova atila: “Witiina+ pa mulandu wa fyo umfwile ifyo ababomfi ba mfumu ya ku Asiria bacilanda pa kunsaalula.+
7 Mona, nalalenga itontonkanye pali fimo* kabili ikomfwa ilyashi, lyena ikabwelela ku calo ca iko. Kulya kwine e ko nkalenga bakaipaile ku lupanga.”’”+
8 Ilyo Rabsake aumfwile ukuti imfumu ya Asiria yalifumine ku Lakishi,+ alibwelelemo ukwali imfumu kabili aileisanga ilelwa na Libna.+
9 Nomba imfumu yaumfwile balelanda pali Tirhaka imfumu ya ku Etiopia abati: “Naisa mu kukulwisha.” E ico na kabili yatumine bamo+ kuli Hisekia. Yabebele ati:
10 “Muye-eba Hisekia imfumu ya Yuda amuti, ‘Wileka Lesa obe uo wacetekela akubepe ati: “Imfumu ya Asiria+ tayakacimfye Yerusalemu.”
11 Mona! Walyumfwa ifyo imfumu sha Asiria shaonawile ifyalo fyonse.+ Bushe iwe niwe ukapusuka?
12 Bushe tulesa twa nko isho ifikolwe fyandi fyaonawile twalishipuswishe? Bushe Gosani, Harani,+ Resefe na bena Edene abaali mu Telasari baba kwi?
13 Bushe imfumu ya Hamati, iya Aripadi ne mfumu ya misumba ya Sefarivaimu ne ya Hena ne ya Iba shaba kwi?’”+
14 Hisekia apokele amakalata ku nkombe e lyo ayabelenga. Lyena aile ku ng’anda ya kwa Yehova kabili ailefungulwila aya amakalata pa cinso ca kwa Yehova.+
15 Kabili Hisekia apepele+ kuli Yehova ati: “Mwe Yehova Lesa wa kwa Israele, mwe baikala pa cipuna ca bufumu pa muulu* wa bakerubi,+ imwe nimwe Lesa wa cine mweka mu mabufumu yonse aya pano isonde.+ Nimwe mwabumbile imyulu ne sonde.
16 Mwe Yehova kutikeni pa kuti mumfwe!+ Mwe Yehova isuleni amenso yenu+ pa kuti mumone! Umfweni amashiwi ayo Sankeribu atumine pa kumuseebanya mwe Lesa wa mweo.
17 Mwe Yehova, kwena ca cine, imfumu sha Asiria shalyonaula inko ne fyalo fya shiko.+
18 Kabili shalyoca na tulesa twa shiko pantu tatwali tulesa twa cine,+ lelo abantu e batupangile+ ukubomfya ifimuti na mabwe. E co shatonawiliile.
19 E ico nomba, mwe Yehova Lesa wesu, tupususheni kuli ena, pa kuti amabufumu yonse aya pano isonde yeshibe ukuti imwe, mwe Yehova nimwe Lesa mweka.”+
20 Lyena Esaya umwana wa kwa Amose atumiine Hisekia amashiwi ya kuti: “Yehova Lesa wa kwa Israele atila, ‘Ning’umfwa ipepo ilyo upepele+ pali Sankeribu imfumu ya Asiria.+
21 Aya e mashiwi ayo Yehova alanda pali ena:
“Nacisungu wa mu Sione akusuula, akupumya.
Umwana mwanakashi wa mu Yerusalemu apukunya umutwe pali iwe.
22 Nani uo waseebanya no kupontela?+
Nani uo wasanswila ishiwi+Kabili uo wapunamikila amenso?
Uwa Mushilo wa kwa Israele e o wacitila ifi!+
23 Nauseebanya Yehova+ ukupitila mu nkombe shobe+ kabili utile,‘Nkanina pa muulu wa mpiliNa maceleta yandi ayengi aya nkondo,Ku ncende sha mu Lebanone ishaba ukutali sana.
Nkatema ifimuti fya uko ifya mikedari iitali, ne mikupri ya uko iyawamisha.
Nkengila umwa kutuushisha mwa uko umwaba ukwalepesha, mu mutengo uusuma.
24 Nkemba ifishima kabili nkanwa amenshi ya ku calo cimbi;Nkakamya imilonga* yonse iya mu Egupti ku makasa yandi.’
25 Bushe tawaumfwa? Ukutula fye na ku kale e fyo mfwaya ukucita.+
Ukufuma ku nshiku sha ku kale nalipanga.+
Nomba nalacicita.+
Ukalenga imisumba ya malinga ayakosa ikabe ifitantaala.+
26 Abekalamo tabakakwate aba kubafwa;Bakatiina nga nshi kabili bakaseebana.
Bakaba nge fimenwa fya mu mpanga kabili nge cani iciteku,+Bakaba nge cani ca pa mutenge icapya ku mwela wakaba uwa ku kabanga.
27 Lelo nalishiba bwino bwino ifyo ucita nga waikala, ifyo ucita nga wafuma ne fyo ucita nga wabwela,+Kabili nalishiba ifyo uba nga naumfulilwa,+
28 Pantu nalishiba ukuti ulamfulilwa+ kabili nalyumfwa ifyo ubuluma.+
E ico nkakoba ica kulobelako candi+ mu myona yobe kabili nkabika umukobelo wandi mu milomo yobe,Kabili nkalenga ukabwelele mu nshila iyo waishilemo.”+
29 “‘Kabili ifi e fyo ukeshibilako:* Uno mwaka mukalalya ifikaimenena fye;* kabili mu mwaka walenga bubili mukalalya ifikapuuka ku fikaimenena fye;+ lelo mu mwaka walenga butatu mukabyala imbuto, kabili mukasombola. Mukalima ne myangashi kabili mukalya ifisabo fya iko.+
30 Aba mu ng’anda ya kwa Yuda abakapusuka, abakashalapo,+ bakalimba imishila kabili bakatwala ifisabo.
31 Pantu abakashalapo bakafuma mu Yerusalemu, kabili abakapusuka bakafuma mu Lupili lwa Sione. Yehova akacita ifi pantu alicincila.+
32 “‘E ico Yehova alanda pa mfumu ya Asiria ati:+
“Tayakengile muli uno musumba+Tayakalasemo umufwiTayakesemo ne nkwelaKabili tayakakuule ica kuninapo pa kusansa umusumba.+
33 Mu nshila umo yapitile pa kwisa, e mo ikapita na pa kubwelelamo;Tayakese muli uno musumba,” e fyo Yehova alanda.
34 Nkacingilila uno musumba+ kabili nkaupususha pa mulandu we shina lyandi+Na pa mulandu wa kwa Davidi+ umubomfi wandi.”’”
35 Mu nshita ya bushiku pali bulya bwine bushiku, malaika wa kwa Yehova aileipaya abaume 185,000 mu nkambi ya bena Asiria.+ Ilyo abantu babuukile lucelocelo, bamwene ifitumbi+ fili fye mpanga yonse.
36 E ico Sankeribu imfumu ya Asiria alimine abwelelamo ku Ninebe,+ kabili kulya kwine e ko aileikala.+
37 Nomba ilyo afukeme alepepa mu ng’anda* ya kwa Nisroke lesa wakwe, Adrameleke na Sharesere, abana bakwe, balimwipeye ku lupanga,+ kabili bafulumukile ku calo ca Ararati.+ Lyena Esari-hadone+ umwana wakwe alimupyene pa bufumu.
Amafutunoti
^ Nelyo “isano.”
^ Nelyo “bwa kutukwa.”
^ Ifi e fyo baleita umukalamba wa balepeela imfumu ifya kunwa.
^ Mu ciHebere, “nkabika umupashi muli yena.”
^ Nelyo kuti yapilibula no kuti, “pa kati.”
^ Nelyo “imifoolo iyafuma mu mumana wa Naelo.”
^ Nelyo “ifikamena ku mbuto ishikapona.”
^ E kutila, Hisekia.
^ Nelyo “mwi tempele.”
