Ibuuku lya Bubili Ilya Ishamfumu 22:1-20
22 Yoshia+ ali ne myaka 8 ilyo aishileba imfumu, kabili atekele mu Yerusalemu+ imyaka 31. Nyina ali ni Yedida umwana wa kwa Adaya uwa ku Bosekati.+
2 Yoshia alecita ifyalungama mu menso ya kwa Yehova kabili alecita fyonse ifyo Davidi icikolwe cakwe+ acitile, kabili alitwalilile ukuba ne cumfwila.
3 Mu mwaka walenga 18 ukutula apo Imfumu Yoshia yatendekeele ukuteka, iyi mfumu yatumine Shafani uwali kalemba umwana wa kwa Asalia umwana wa kwa Meshulamu ku ng’anda ya kwa Yehova.+ Yamwebele aiti:
4 “Kabiye kuli Hilkia+ shimapepo mukalamba, kabili umwebe alonganike indalama shonse isho abantu baleleta mu ng’anda ya kwa Yehova,+ isho abalonda pa mwinshi bapoka ku bantu.+
5 Lyena bapeele abo basonta ukula-angalila umulimo mu ng’anda ya kwa Yehova, pa kuti nabo bakalipile ababomba umulimo wa kuwamya ifyaonaika* ku ng’anda ya kwa Yehova,+
6 e kutila abacenjela mu fya kupangapanga, abaishiba ukukuula e lyo na baishiba ifya kukuulila na mabwe. Muli ishi indalama bakashitemo ne mbao na mabwe ayaputulwa pa kuti bakawamye ifyaonaika ku ng’anda.+
7 Lelo tamulingile ukubepusha ifyo bakabomfya indalama isho mukabapeela, pantu ba cishinka.”+
8 Pa numa Hilkia shimapepo mukalamba aebele Shafani kalemba+ ati: “Ninsanga ibuuku lya Mafunde+ mu ng’anda ya kwa Yehova.” E ico Hilkia apeele Shafani ibuuku, kabili atendeke ukulibelenga.+
9 Lyena Shafani kalemba aile ku mfumu, e lyo ayeba ati: “Ababomfi benu nababuula indalama shonse isho basangile mu ng’anda, kabili nabapeela abo basonta ukwangalila umulimo mu ng’anda ya kwa Yehova.”+
10 Na kabili Shafani kalemba aebele imfumu ati: “Kuli ibuuku+ ilyo Hilkia shimapepo ampeele.” Lyena Shafani atendeke ukubelengela imfumu.
11 Ilyo imfumu yaumfwile fye amashiwi ayali mwi buuku lya Mafunde, yalepwile ifya kufwala fya iko.+
12 Lyena imfumu yaebele Hilkia shimapepo, Ahikamu+ umwana wa kwa Shafani, Akbore umwana wa kwa Mikaya, Shafani kalemba na Asaya umubomfi wa mfumu, aiti:
13 “Kabiyeni kanjipushisheniko kuli Yehova, mwipushisheko na bantu e lyo na baYuda bonse pa mashiwi yali muli ili buuku basangile, pantu Yehova natufulilwa nga nshi+ pa mulandu wa kuti ifikolwe fyesu tafyakonkele amashiwi ayaba muli ili buuku, kabili tafyalecita na fyonse ifyo tufwile ukulacita ifyaba muli ili ibuuku.”
14 E ico Hilkia shimapepo, Ahikamu, Akbore, Shafani na Asaya baile kuli Hulda kasesema mwanakashi.+ Hulda ali mukashi wa kwa Shalumu umwana wa kwa Tikba umwana wa kwa Hahasi, uwaleangalila umo balesungila ifya kufwala. Hulda aleikala mu citungu icipya ica musumba wa Yerusalemu, kabili bailelanda nankwe.+
15 Hulda abebele ati: “Yehova Lesa wa kwa Israele atila, ‘Muye-eba umuntu uumutumine kuli ine amuti:
16 “Yehova atila, ‘Nkaleta ubucushi pali cino cifulo na pa bekalamo, kabili fyonse ifyo imfumu ya Yuda ibelengele+ mwi buuku fikacitika.
17 Pa mulandu wa kuti balinsha kabili baleocela balesa bambi+ amalambo pa kuti bankalifye muli fyonse ifyo balecita,+ ubukali bwandi ububilima ngo mulilo bukesa pali cino cifulo kabili tabwakapwe.’”+
18 Lelo muye-eba imfumu ya Yuda iimutumine mu kwipusha kuli Yehova amuti, “Ifi e fyo Yehova Lesa wa kwa Israele alanda ifikumine amashiwi ayo umfwile,
19 ‘Apo walinashishe umutima obe kabili wali-icefeshe+ pa cinso ca kwa Yehova ilyo waumfwile ifyo nalandile pali cino cifulo na pa bekalamo ukuti bakaba ica kutiinya kabili icitiipu, kabili walilepwile ne fya kufwala fyobe+ watendeka no kulila pa cinso candi, na ine ning’umfwa ipepo lyobe, e fyo Yehova alanda.
20 E mulandu wine ukafwila nge fyafwa ifikolwe fyobe, kabili bakakushiika mu mutende kabili tawakabeko ilyo nkaleta ubucushi bonse pali cino cifulo.’”’” Lyena baishile-eba imfumu ifyo alandile.
Amafutunoti
^ Nelyo “ukucilika imilale.”
