Ibuuku lya Bubili Ilya Ishamfumu 25:1-30
25 Mu mwaka walenga 9 ukutula apo Sidekia atendekeele ukuteka, mu mweshi walenga 10, pa bushiku bwalenga 10 ubwa uyu mweshi, Nebukadnesari+ imfumu ya ku Babiloni aishile pamo na bashilika bakwe bonse mu kulwisha umusumba wa Yerusalemu.+ Alipangile inkambi pa kuti alwishe uyu umusumba kabili alikuulile ne cibumba ukushinguluka umusumba onse,+
2 kabili bashingile umusumba mpaka na mu mwaka walenga 11 ukutula apo Imfumu Sidekia yatendekeele ukuteka.
3 Pa bushiku bwalenga 9 ubwa mweshi walenga 4, icipowe calicililemo+ mu musumba, kabili abantu tabakwete ifya kulya.+
4 Abena Kaldi balitobele icibumba ca musumba,+ kabili abashilika bonse balifulumwike ubushiku. Bapitile pa mpongolo iyali pa kati ka fibumba fibili mupepi ne bala lya mfumu, ninshi abena Kaldi nabashinguluka umusumba; kabili imfumu yapitile mu nshila yalola ku Araba.+
5 Lelo abashilika abena Kaldi balikonkele imfumu, kabili baisangile mu ciswebebe ca mu Yeriko. Ilyo baisangile, abashilika ba iko bonse balibutwike.
6 Lyena abashilika abena Kaldi balikete imfumu,+ baitwala na ku mfumu ya Babiloni ku Ribla, kabili bali-ipingwile.
7 Baipeye abana ba kwa Sidekia ninshi alemonako; lyena Nebukadnesari atonkwele Sidekia amenso, amukaka amaceni ya mukuba e lyo amusenda ku Babiloni.+
8 Mu mweshi walenga 5, pa bushiku bwalenga 7 ubwa uyu mweshi, e kutila mu mwaka walenga 19 ukutula apo Nebukadnesari imfumu ya Babiloni atampiile ukuteka, e mo Nebusaradani+ umukalamba wa balelonda, umubomfi wa mfumu ya Babiloni, aishile ku Yerusalemu.+
9 Aocele ing’anda ya kwa Yehova,+ ing’anda ya mfumu*+ na mayanda yonse mu Yerusalemu.+ Aocele na mayanda ya bashimucindikwa+ yonse.
10 Kabili abashilika bonse abena Kaldi abali no mukalamba wa balelonda+ babongolwele ilinga lya Yerusalemu lyonse.
11 Nebusaradani umukalamba wa balelonda asendele abantu abashele mu musumba, abaitwele ku mfumu ya Babiloni na bantu bambi.+
12 Lelo umukalamba wa balelonda alishileko bamo abali abapiina sana pa kuti balelima imyangashi kabili balebomba mu mabala.+
13 Kabili abena Kaldi baliputawile inceshi sha mukuba+ ishali ku ng’anda ya kwa Yehova, baliputawile ne fya kusendelapo amenshi+ ne Cishiba ca mukuba+ ifyali mu ng’anda ya kwa Yehova, kabili umukuba uwali ku fyo baputawile baliusendele ku Babiloni.+
14 Basendele ne fya kukushilapo imito, amafosholo, utwa kushimishako inyali, amakapu ne fipe fyonse ifya mukuba ifyo balebomfya mwi tempele.
15 Umukalamba wa balelonda asendele ififutumwino ne mbale shafonka ifyo bapangiile na golde+ iisuma ne fyo bapangiile na silfere+ iisuma.
16 Umukuba uo Solomone apangiile inceshi shibili, Icishiba ne fya kusendelapo amenshi ifya pa ng’anda ya kwa Yehova, walifulile ica kuti balifililwe uku-upima.+
17 Uluceshi lumo na lumo lwalepele imikono* 18,+ kabili ifyali nge mitondo ifyali pa muulu wa nceshi fyali ifya mukuba; kabili fyalepele imikono itatu, kabili utwa kufiyemfya uto babikileko, e lyo ne fyali nge fisabo fya mapomegranate ifyo babikileko bafipangiile no mukuba.+
18 Umukalamba wa balelonda asendele na Seraya+ shimapepo mukalamba, Sefania+ uwali inkonkani ya kwa shimapepo mukalamba na balelonda pa mwinshi+ batatu.
19 Kabili mu musumba asendelemo intungulushi ya kwi sano imo iyaleangalila abashilika, abaume 5 abali ifibusa fya mfumu abo asangile mu musumba, na kalemba wa mukalamba wa bashilika uwalelonganika abengaba abashilika mu calo. Asendele na baume 60 pa bantu yaweyawe abo asangile mu musumba.
20 Nebusaradani+ umukalamba wa balelonda alibasendele abatwala na ku Ribla+ ukwali imfumu ya ku Babiloni.
21 Imfumu ya ku Babiloni yalibepeye mu Ribla mu citungu ca Hamati.+ E fyo abaYuda babafumishe mu calo cabo+ babasenda pa kuti bayeba bankole.
22 Nebukadnesari imfumu ya ku Babiloni asontele Gedalia+ umwana wa kwa Ahikamu+ umwana wa kwa Shafani+ pa kuti aletungulula abantu abo ashile mu Yuda.+
23 Ilyo abakalamba bonse aba bashilika, pamo na bashilika babo baumfwile ukuti imfumu ya Babiloni yalisontele Gedalia ukuti aletungulula abashele mu Yuda, ilyo line baishile kuli Gedalia ku Mispa. Abaishile bali ni Ishmaele umwana wa kwa Netania, Yohanani umwana wa kwa Karea, Seraya umwana wa kwa Tanhumete umwina Netofa na Yaasania umwana wa kwa Maakati. Baishile pamo na bashilika babo.+
24 Gedalia alapile umulapo kuli bena na bashilika babo e lyo abeba ati: “Mwitiina ukuba ababomfi ba bena Kaldi. Akwikaleni muno mwine mu calo mulebombela imfumu ya Babiloni, ne fintu fikalamwendela bwino.”+
25 Nomba mu mweshi walenga 7, Ishmaele+ umwana wa kwa Netania umwana wa kwa Elishama uwali wa ku bufumu* aishile na baume 10, kabili baipeye Gedalia pamo na baYuda e lyo na bena Kaldi abo ali nabo ku Mispa.+
26 Lyena abantu bonse, ukutendekela pa munono ukufika ku mukalamba, kumo na bakalamba ba bashilika balimine baya ku Egupti,+ pantu baletiina abena Kaldi.+
27 Kabili mu mwaka walenga 37 ukutula apo basendeele Yehoyakini+ imfumu ya mu Yuda pa kuti ayeba nkole, mu mweshi walenga 12, pa bushiku bwalenga 27 ubwa uyu mweshi, mu mwaka Ebili-merodaki uwa ku Babiloni aishileba imfumu, e mo afumishe* Yehoyakini imfumu ya mu Yuda mu cifungo.+
28 Ali ne cikuuku kuli ena, kabili acindamike icipuna cakwe ica bufumu ukucila ifipuna fya bufumu ifya mfumu shimbi isho ali nasho mu Babiloni.
29 E ico Yehoyakini afuulile ifya kufwala fyakwe ifya mu cifungo, kabili lyonse alelya ne mfumu mpaka ubushiku afwile.
30 Cila bushiku imfumu yalemupeela ifya kulya ifyo alelya mpaka afwa.
Amafutunoti
^ Nelyo “isano.”
^ Umukono walelepa amasentimita ukucilako panono pali 44. Moneni Ifyebo Fyalundwako pa B14.
^ Mu ciHebere, “ulubuto lwa bufumu.”
^ Mu ciHebere, “aimishe umutwe wa kwa.”
