Ibuuku lya Bubili Ilya Ishamfumu 3:1-27
3 Yehoramu+ umwana wa kwa Ahabu, atendeke ukuteka abena Israele mu Samaria mu mwaka walenga 18 ukutula apo Yehoshafati imfumu ya mu Yuda atendekeele ukuteka, kabili Yehoramu atekele imyaka 12.
2 Alecita ifyabipa mu menso ya kwa Yehova, lelo tafyafulile nge fyo wishi nelyo nyina bacitile, pantu alitobawile icilibwe ico wishi aimike ico balepepelapo Baali.+
3 Lelo atwalilile ukucita imembu isho Yeroboamu umwana wa kwa Nebati alengele abena Israele balecita.+ Talekele ukucita isho imembu.
4 Nomba Mesha imfumu ya Moabu aleteka impaanga, kabili aletuulila imfumu ya Israele utwana twa mpaanga 100,000 ne mpaanga ishilume 100,000 isho bashalebeya amasako.
5 Ilyo fye Ahabu afwile,+ imfumu ya Moabu yapondokele imfumu ya Israele.+
6 E ico pali ilya nshita Imfumu Yehoramu yafumine ku Samaria kabili yalonganike abashilika abena Israele bonse.
7 Kabili yatumine aba kuyaeba Yehoshafati imfumu ya kwa Yuda ati: “Imfumu ya Moabu naimpondokela. Bushe kuti twaya bonse ku Moabu mu kulwa?” Na o ayaswike ati: “Tukaya.+ Ine cimo cine na iwe. Abantu bandi cimo cine na bantu bobe. Bakabalwe bandi cimo cine na bakabalwe bobe.”+
8 Lyena aipwishe ati: “Ni nshila nshi tukapita?” Na o ayaswike ati: “Tukapita iya ku matololo ya Edomu.”
9 Lyena imfumu ya Israele, imfumu ya Yuda ne mfumu ya Edomu+ balimine baya. Pa numa ya kwenda inshiku 7, tabakwete amenshi ya kuti abashilika banwe, na ya kuti ifitekwa ifyo basendele finwe.
10 Imfumu ya Israele yalandile aiti: “Yangu ifyo cabipa! Yehova etile ifwe fwe mfumu shitatu pa kuti abena Moabu batucimfye!”
11 E lyo Yehoshafati atile: “Bushe kuno takwaba kasesema wa kwa Yehova uwingatwipushishako kuli Yehova?”+ E ico umo pa babomfi ba mfumu ya bena Israele ayaswike ati: “E ko aba, Elisha+ umwana wa kwa Shafati, uwalesambikisha Eliya.”*+
12 Lyena Yehoshafati atile: “Yehova alandila muli ena.” E ico imfumu ya Israele, Yehoshafati ne mfumu ya Edomu baile kuli ena.
13 Elisha aebele imfumu ya Israele ati: “Cinshi waishila kuli ine?+ Kepushe bakasesema ba kwa wiso na bakasesema ba kwa noko.”+ Lelo imfumu ya Israele yamwebele aiti: “Awe wintamfya, pantu Yehova naita fwe mfumu shitatu pa kuti abena Moabu batucimfye.”
14 E lyo Elisha atile: “Na pali Yehova wa mabumba uo mombela,* nkaanacindika Yehoshafati imfumu+ ya Yuda, nga nshikuloleshe nelyo nga nshikubikileko na mano.+
15 Nomba ndeteleni kalisha wa cilimba ca nsale.”*+ Ilyo kalisha wa cilimba ca nsale atendeke fye ukulisha, umupashi* wa kwa Yehova waishile pali Elisha.+
16 Lyena alandile ati, “Yehova atila: ‘Imbeni ifilindi muli uyu mupokapoka,
17 pantu Yehova atila: “Takwakabe umwela ne mfula; lelo muli uyu mupokapoka mukaba amenshi ayengi,+ kabili e mo mukanwa. Ifitekwa fyenu ne nama shenu shimbi na fyo e mo fikanwa.”’
18 Yehova te kuti cimukosele ukucita ifi,+ pantu na kuba akalenga mukacimfye na bena Moabu.+
19 Mufwile ukonaula imisumba yonse iya malinga+ ne misumba yonse iisuma. Mufwile ukutema ifimuti fyonse ifisuma, kabili mufwile ukucilika utumfukumfuku twa menshi tonse. Mulingile ukupoosa amabwe mu mpanga yonse iisuma pa kuti bekalimamo.”+
20 Kabili ulucelo, pa nshita ya kutuulilapo umutuulo wa ngano uwa lucelo,+ mu kupumikisha fye amenshi yatampile ukufumina ku Edomu, kabili mu mupokapoka mwaishileba amenshi ayengi.
21 Abena Moabu bonse balyumfwile ukuti imfumu shalile mu kulwa nabo. E ico balongenye abaume bonse abengalwa inkondo,* kabili baileiminina pa mupaka.
22 Ilyo babuukile lucelocelo, akasuba kasanike pa menshi, kabili abena Moabu abali kwi shilya bena balemona amenshi kwati nayakashika ngo mulopa.
23 E ico batile: “Mulopa uyu! Nangu cibe shani imfumu nashipayana ku lupanga. Kanshi mwe bena Moabu natuleya tusende ifipe!”+
24 Ilyo baingile mu nkambi ya bena Israele, abena Israele balimine batampa ukubepaya kabili baile baleipaya abena Moabu abafulumwike.+ Bakonkenyepo fye ukubepaya mpaka baingila mu Moabu.
25 Balyonawile imisumba kabili abashilika bonse balepoosa amabwe mu mpanga shonse ishisuma ica kuti mwali fye amabwe yeka yeka. Balicilike utumfukumfuku twa menshi tonse+ kabili balitemene ifimuti fyonse ifisuma.+ Bashileko fye ifibumba fya musumba wa Kiri-haresete+ kabili abashilika abalesukusa amabwe balishingulwike umusumba, baipaya na bantu abalimo.
26 Ilyo imfumu ya ku Moabu yamwene ukuti baicimfya, yasendele abaume 700 abalebomfya ulupanga pa kulwa pa kuti bapule pa kati ka bashilika bayefika ku mfumu ya Edomu;+ lelo balifililwe.
27 E ico yabuulile umwana wa iko umwaume ibeli uwali no kuipyana pa bufumu, yamutuula nge lambo lya koca+ pa cibumba. E lyo abashilika bafuliilwe sana abena Israele, ica kuti balilekele ukulwisha abalwani babo abena Moabu, babwelelamo na ku calo cabo.
Amafutunoti
^ Nelyo “uwali umubomfi wa kwa Eliya.”
^ Mu ciHebere, “uo njiminina pa ntanshi yakwe.”
^ Mu ciHebere, “ukuboko.”
^ Nelyo “kemba.”
^ Nelyo “abaikakile imishipi.”
