Ibuuku lya Bubili Ilya Ishamfumu 5:1-27
5 Nomba Naamani uwali umukalamba wa bashilika ba mfumu ya ku Siria, ali muntu uwalumbuka kabili shikulu wakwe alimucindike pantu Yehova alipuswishe abena Siria ukupitila muli ena. Ali mushilika uwa maka nangu ca kuti ali ne fibashi.*
2 Bushiku bumo ilyo abena Siria basanshile abena Israele, basendele umukashana umunono umwina Israele mu kuyaba nkole, kabili uyu mukashana aileba umubomfi wa kwa muka Naamani.
3 Bushiku bumo uyu mukashana aebele nakulu ati: “Shikulu nga aya kuli kasesema+ wa ku Samaria, kuti amuposha ifibashi.”+
4 E ico umuntu umo* aile-eba imfumu ifyo umukashana uwafumine ku Israele alandile.”
5 Lyena imfumu ya ku Siria yamwebele aiti: “Kabiye ili line! Nalatumina imfumu ya Israele kalata.” E ico asendele amatalanti* ya silfere 10, indalama sha golde 6,000 ne fya kufwala 10.
6 Atwalile imfumu ya Israele kalata iyakwete amashiwi ya kuti: “Natuma Naamani umubomfi wandi pamo ne yo kalata pa kuti umuposhe ifibashi.”
7 Ilyo imfumu ya Israele yabelengele fye kalata, yalepwile ifya kufwala fya iko, e lyo yatila: “Bushe ndi Lesa, uwingalenga umuntu afwa nelyo aba no mweo?+ Pantu uyu muntu, atuma uyu mwaume kuli ine kabili alenjeba ati imuposhe ifibashi! Mwaimwena ukuti alefwaya fye ukuumana na ine.”
8 Nomba ilyo Elisha umuntu wa kwa Lesa wa cine aumfwile ukuti imfumu ya Israele yalilepwile ifya kufwala fya iko, ilyo line atumiine imfumu amashiwi ya kuti: “Cinshi mwalepwilile ifya kufwala fyenu? Lekeni ese kuli ine pa kuti eshibe ukuti mu Israele mwaliba kasesema.”+
9 E ico Naamani aile na bakabalwe bakwe na maceleta yakwe aya nkondo, kabili aileiminina pa mwinshi wa ng’anda ya kwa Elisha.
10 Lelo Elisha atumine fye inkombe iyailemweba aiti: “Kabiye, usambe imiku 7+ mu Yordani.+ Lyena inkanda yobe yalapola kabili walasanguluka.”
11 Nomba Naamani ena alikalipe, atampa no kuya ninshi aleilishanya ati: “Moneni, ine nacilati, ‘Alafuma ese eminine pano e lyo alilile kwi shina lya kwa Yehova Lesa wakwe, uku ninshi alepisha ukuboko kwakwe pa fibashi pa kuti fipole.’
12 Bushe umumana wa Abana no wa Paripari iya ku Damaseke,+ tayawama ukucila imimana yonse iya mu Israele? Bushe nga nasambamo te kuti mpole?” E fyo apilibwike, aya ne cipyu.
13 Nomba ababomfi bakwe balipaleme e lyo bamweba abati: “Tata, nga ca kuti kasesema acimweba ukuti mucite icintu icikalamba, bushe nga tamwacicita ico cintu? Lelo amwebele fye ati, ‘Sambeni pa kuti musanguluke.’”
14 E lyo aileitumpika mu Yordani imiku 7 nge fyo umuntu wa kwa Lesa wa cine amwebele.+ Lyena inkanda yakwe yalipolele, yaba fye kwati ya mwaice.+ E fyo asangulwike.+
15 Pa numa abweleele ku muntu wa kwa Lesa wa cine,+ pamo na bonse abo ali nabo, kabili aileiminina pa ntanshi yakwe no kumweba ati: “Nomba naishiba ukuti takwaba Lesa kumbi pano isonde kano mu Israele.+ E ico pokeni ubupe ubu ubo ne mubomfi wenu ndetele.”
16 Lelo Elisha amwebele ati: “Na pali Yehova uo mombela,* nshapoke ubu ubupe.”+ Alimupatikiishe ukuti apoke, lelo alikaaninine fye.
17 Naamani asukile alanda ati: “Kanshi ne mubomfi wenu mpeeleniko iloba ilya muli cino calo ilyo imfalashi shibili shingasenda, pantu ne mubomfi wenu nshakatale ntuulilapo balesa bambi umutuulo wa koca nangu ilambo. Nkalatuulila fye Yehova.
18 Lelo icintu cimo ico ne mubomfi wenu ndelomba ukuti Yehova engalambelelapo uluse ni ci: Shikulu nga aingila mu ng’anda* ya kwa Rimone mu kumukontamina, ashintilila pa kuboko kwandi. E ico na ine ndakontama mu ng’anda ya kwa Rimone. Yehova engalabelela ne mubomfi wenu uluse nga nakontama mu ng’anda ya kwa Rimone.”
19 Elisha amwebele ati: “Kabiye umutende.” Ilyo afumine pali ena, afikako na patali,
20 Gehasi+ umubomfi wa kwa Elisha umuntu wa kwa Lesa wa cine+ atontonkenye ati: “Moneni, shikulu aleka fye Naamani umwina Siria+ aya ukwabula ukupokako nangu cimo pa fyo acileta. Na pali Yehova, ndemukonka ulubilo njepokako fimo.”
21 E ico Gehasi akonkele Naamani ulubilo. Ilyo Naamani amwene umuntu alemukonka ulubilo, alikile mwi celeta lyakwe pa kuti aye akumane nankwe. Ilyo akumene nankwe amwipwishe ati: “Bushe uko wafuma kuli umutende?”
22 Na o amwaswike ati: “Kwa mutende. Shikulu antuma ati, ‘Mona! Nomba line fye napokelela abalumendo babili pa bana ba bakasesema abafumine ku citungu ca mpili ica Efraimu. Bapeeleko italanti limo ilya silfere ne fya kufwala fibili.’”+
23 E lyo Naamani alamucincisha ati:+ “Buulapo amatalanti yabili.” Ilyo abulile amatalanti yabili aya silfere ayafungiile mu mifuko ibili. Asendelepo ne fya kufwala fibili, e lyo Naamani aeba ababomfi bakwe babili ukuti bamusendeleko.
24 Ilyo afikile ku Ofele, alibapokele afibika na mu ng’anda kabili alekele abaume baya. Ilyo baile,
25 alingile no kwiminina mupepi na shikulu wakwe. E lyo Elisha amwipwishe ati: “Wafuma kwi, Gehasi?” Na o ayaswike ati: “Ne mubomfi wenu nshaciya nangu kumo.”+
26 Lyena Elisha amwipwishe ati: “Bushe umutima wandi tawaciba na iwe ilyo ulya mwaume acikila mwi celeta lyakwe pa kuti akukumanye? Bushe ino e nshita ya kupoka silfere nangu ifya kufwala nelyo amabala ya miolife nangu amabala ya myangashi, nelyo impaanga nangu ing’ombe nelyo ababomfi abaume nangu ababomfi abanakashi?+
27 E ico ifibashi fya kwa Naamani+ fikalambatila iwe na bakatuntuka muli iwe umuyayaya.” Ilyo line afumine apali Elisha ninshi nabuuta na tuutu ku fibashi.+
Amafutunoti
^ Nelyo “alilwele ubulwele bwa pa nkanda.”
^ Nalimo uyu muntu ali ni Naamani.
^ Italanti lyalefina amakilogramu ukucilako panono pali 34. Moneni Ifyebo Fyalundwako pa B14.
^ Mu ciHebere, “uo njiminina pa ntanshi yakwe.”
^ Nelyo “itempele.”