Ibuuku lya Bubili Ilya Ishamfumu 6:1-33
6 Abana ba bakasesema+ baebele Elisha abati: “Moneni! Icifulo ico twikalamo na imwe calicepa sana.
2 Lekeni tuleya ku Yordani pa kuti tuyetema ifimuti fya kupangila umwa kuti tuleikala kulya kwine.” Na o abebele ati: “Kabiyeni.”
3 Umo pali bena amwipwishe ati: “Bushe tamwaye na fwe babomfi benu?” Na o atile: “Twalaya bonse.”
4 E ico aile nabo ku Yordani kabili ilyo bafikile, batendeke ukutema ifimuti.
5 Ilyo umuntu umo aletema icimuti, isembe lyasokokele mu menshi, e lyo apunda ati: “Iye mwe shikulu, lisembe lya kwashima!”
6 Umuntu wa kwa Lesa wa cine amwipwishe ati: “Ni pesa lyaciponena?” Na o amulangile apo lyaponene. Lyena aputwile umusambo, e lyo aupoosa apo isembe lyaponene kabili isembe lyatampile ukweleela.
7 E lyo Elisha amwebele ati: “Libuule.” E ico alitambike ukuboko kwakwe abuula ne sembe.
8 Nomba imfumu ya Siria yaile mu kulwa inkondo na bena Israele.+ Yalanshenye na babomfi ba iko aiti: “Natuyepangila inkambi pa ncende ya kuti na ya kuti.”
9 Lyena umuntu wa kwa Lesa wa cine+ atumiine imfumu ya bena Israele amashiwi ya kuti: “Mucenjele, tekwesha ukupita kuli ilya ncende, pantu e ko abena Siria balefwaya ukumusanshila.”
10 E ico imfumu ya bena Israele yatumine bamo ku ncende uko umuntu wa kwa Lesa wa cine ayebelepo. Elisha ali-isokele imiku fye iingi kabili tayaleyako.+
11 Ici calengele imfumu ya Siria ikalipe nga nshi.* E ico yaitile ababomfi ba iko e lyo yabeba aiti: “Munjebe! Nani pali ifwe uwaba ku lubali lwa mfumu ya bena Israele?”
12 Lyena umubomfi wa iko umo ayebele ati: “Tapali nangu umo, shikulu mwe mfumu! Ni Elisha kasesema wa mu Israele e weba imfumu ya mu Israele ifyo mulanda mu muputule wenu uwa kusendamamo.”+
13 Yabebele aiti: “Kafwayeni uko ali pa kuti ntume aba kuyamwikata.” Pa numa bayebele abati: “Ali ku musumba wa Dotani.”+
14 Ilyo line yatumineko ibumba lya bashilika ilikalamba abali na bakabalwe na maceleta ya nkondo; kabili baishile ubushiku, bashinguluka no yu musumba.
15 Ilyo umubomfi wa muntu wa kwa Lesa wa cine afumiine panse ulucelocelo, amwene ibumba lya bashilika ilikalamba nalishinguluka umusumba na bakabalwe na maceleta ya nkondo. Ilyo line umubomfi aebele Elisha ati: “Iye mwe shikulu! Twalacita shani?”
16 Lelo amwebele ati: “Witiina!+ Pantu abali ku lubali lwesu bengi ukucila abali ku lubali lwabo.”+
17 Lyena Elisha apepele ati: “Mwe Yehova, isuleni amenso yakwe pa kuti amone.”+ Ilyo line Yehova aiswile amenso ya mubomfi wa kwa Elisha, kabili amwene bakabalwe na maceleta ya nkondo aya mulilo+ nafishinguluka Elisha+ pamo no mubomfi wakwe wine mu citungu ca mpili monse.
18 Ilyo abena Siria batentemwike pa kuti basanse Elisha, apepele kuli Yehova ati: “Lekeni ulu luko lupofule.”+ E ico apofwishe ulu luko nga fintu Elisha apepele.
19 Nomba Elisha abebele ati: “Te kuno mufwile ukupita, kabili te kuli uno musumba. Nkonkeni, imutwale ku muntu uo mulefwaya.” Lelo abatwele ku Samaria.+
20 Ilyo bafikile mu Samaria, Elisha apepele ati: “Mwe Yehova, isuleni amenso ya aba bantu pa kuti bamone.” E ico Yehova aliswile amenso yabo, kabili bamwene ukuti bali mu Samaria.
21 Ilyo imfumu ya Israele yabamwene, yaipwishe Elisha aiti: “Tata, bushe mbepaye, bushe mbepaye?”
22 Lelo ayaswike imfumu ati: “Tamufwile ukubepaya. Bushe kuti mwaipaya abantu abo mwaikata pa kuti bayeba bankole ukubomfya ulupanga lwenu no buta bwenu? Bapeeleni umukate balye, mubapeele na menshi banwe+ e lyo babwelelemo kuli shikulwibo.”
23 E ico abapekanishishe umutebeto uukalamba kabili baliliile no kunwa. Lyena alibalekele babwelelamo kuli shikulwibo. Kabili ifipondo fya bena Siria+ ifyalebelamina abantu tafyatalile afiisa na kabili mu calo ca bena Israele.
24 Pa numa Ben-hadadi imfumu ya Siria alonganike abashilika bonse kabili baileshinga Samaria.+
25 E ico mu Samaria mwaponene icipowe icikalamba,+ kabili abena Siria bashingile Samaria mpaka abantu balashita umutwe wa mpunda+ pa ndalama sha silfere 80, ne ndupi shibili* isha matotoli ya nkunda pa ndalama sha silfere 5.
26 Ilyo imfumu ya bena Israele yalepita pa cibumba ca musumba, umwanakashi umo aibilikishe ati: “Iseni mungafwe, shikulu mwe mfumu!”
27 Imfumu yamwaswike aiti: “Nga ca kuti Yehova takwafwile, inga ine kuti nafumya kwi ifya kukupeela? Bushe kuti nafifumya pa ca kupuminapo ingano? Nelyo ku ca kukaminamo imyangashi nangu ica kukaminamo amafuta?”
28 Imfumu yamwipwishe aiti: “Bwafya nshi ukwete?” Na o ayaswike ati: “Uyu mwanakashi anjebele ati, ‘Leta umwana obe tumulye lelo, e lyo mailo tukalye umwana wandi.’+
29 E ico twalipike umwana wandi twamulya.+ Nomba ubushiku bwakonkelepo namwebele nati, ‘Leta umwana obe tumulye.’ Lelo alimufishile.”
30 Ilyo imfumu yaumfwile fye ifyo uyu mwanakashi alandile, yalepwile ifya kufwala fya iko.+ Ilyo yapitile pa muulu wa cibumba ca musumba, abantu balimwene ukuti yafwele insamu mu kati.
31 Lyena yalandile aiti: “E ico Lesa ankande sana, nga ca kuti lelo nshaputule Elisha umwana wa kwa Shafati umutwe!”+
32 Ilyo Elisha aikele mu ng’anda yakwe pamo na bakalamba, imfumu yatumine umuntu uwaitangilile. Nomba ilyo uyo muntu ashilafika, Elisha aebele abakalamba ati: “Bushe namumona uo uyu mwana wa kwa kepaya+ atumine ukwisa mu kumputula umutwe? Mubikeko sana amano pa kuti uo atumine nga afika fye, mwise mwisaleko iciibi mucikatilile no kucikatilila. Bushe tamuleumfwa inshindo sha kwa shikulu wakwe pa numa yakwe?”
33 Ilyo acili alelanda nabo, uo atumine alifikile kuli ena, kabili imfumu nayo yalishile e lyo yalanda aiti: “Yehova e ulengele ukuti tukwate amafya yonse aya. Bushe mfwile ukutwalilila ukulolela Yehova?”
Amafutunoti
^ Mu ciHebere, “calikalifye umutima wa mfumu.”
^ Indupi 8 e shaleingila muli kabu imo. Moneni Ifyebo Fyalundwako pa B14.