Ibuuku lya Bubili Ilya Ishamfumu 7:1-20
7 Nomba Elisha alandile ati, “Umfweni ifyo Yehova alanda. Yehova atila: ‘Mailo nga ino ine nshita abantu bakalashita galoni* imo iya buunga bwapeleka pe shekele* limo, kabili bakalashita amagaloni yabili aya barle pe shekele limo+ pa mpongolo* ya Samaria.’”
2 E lyo umo pa bakalamba ba bashilika uo imfumu yacetekele aebele umuntu wa kwa Lesa wa cine ati: “Nangu fye Yehova engesula ifipunda fya mu muulu, bushe ifi kuti fyacitika?”+ Na o amwebele ati: “Ukaimwena+ ilyo fikalacitika, lelo tawakalyeko.”+
3 Pa mpongolo ya musumba+ pali abaume 4 abalwele ifibashi, kabili balanshenye abati: “Bushe twakulaikala fye pano pene mpaka tukafwe?
4 Nga twatila, ‘Natwingile mu musumba,’ ilyo mu musumba muli icipowe,+ kuti twafwila mulya mwine. Nomba nga twatwalilila ukwikala pano, na lyo line tukafwa. E ico natuyeingila mu nkambi ya bena Siria. Nga tabayetwipaya, ninshi twalaba aba mweo, lelo nga balayatwipaya, ninshi ni fyo fine.”
5 Lyena baimine icungulo bushiku bayaingila mu nkambi ya bena Siria. Ilyo bafikile ku mbali ya nkambi ya bena Siria, bamwene ukuti mu nkambi tamwali nangu umo.
6 Pantu Yehova e walengele abena Siria abali mu nkambi bomfwe icongo ca maceleta ya nkondo, icongo ca bakabalwe ne congo ce bumba lya bashilika ilikalamba.+ E ico abena Siria balanshenye abati: “Moneni! imfumu ya bena Israele naitoobwela imfumu sha bena Hiti ne mfumu sha bena Egupti pa kuti bese batusanse!”
7 Ilyo line fye balifulumwike icungulo bushiku, basha na matenti yabo, bakabalwe babo ne mpunda shabo. Balifulumwike pa kuti bapusuke,* kabili mu nkambi tabasendelemo nangu cimo.
8 Ilyo balya aba fibashi bafikile ku mbali ya nkambi, baingile mwi tenti limo, batendeka ukulya no kunwa. Basendelemo silfere, golde ne fya kufwala bayafifisa. Lyena balibwelele baingila mwi tenti na limbi kabili basendelemo ifintu bayafifisa.
9 Basukile abene balalanshanya abati: “Ico tulecita taciweme. Buno bushiku bwa mbila nsuma! Nga twashingashinga mpaka mailo ulucelo, bakatukandilapo. Natuyeshimikila aba kwi sano* ificitike.”
10 E ico bailebilikisha bakalinda ba pa mpongolo ya musumba, kabili babebele abati: “Twaciyaingila mu nkambi ya bena Siria, lelo tatwacisangamo nangu umo kabili tatwacumfwamo ishiwi lya muntu. Mwaciba fye bakabalwe ne mpunda ifyo bakakile, kabili amatenti bayashile fye filya fine.”
11 Ilyo line bakalinda ba pa mpongolo babilikishe abali mu ng’anda ya mfumu ifyacitike.
12 Ilyo line imfumu yalimine ubushiku yaeba ababomfi ba iko aiti: “Lekeni imwebe ifyo abena Siria bacitile. Nabeshiba ukuti tuli ne nsala,+ e ico nabafuma mu nkambi belefisama mu mpanga, baleti, ‘Balefuma mu musumba kabili tulebekata abatuntulu, e lyo tuyeingila mu musumba wabo.’”+
13 Lyena umubomfi wa iko umo alandile ati: “Lekeni abaume bamo basende bakabalwe 5 abashalapo mu musumba. Moneni! Abo twalatuma nabo bene bakafwa nge fyo abena Israele bonse abalashala mu musumba bakafwa. Moneni! Nabo bene bali no kufwa nge fyo abena Israele abengi bafwa. Lekeni kanshi tubatume bayemona.”
14 E ico babuulile amaceleta yabili bakulikako na bakabalwe, kabili imfumu yabatumine ku nkambi ya bena Siria. Yabebele aiti: “Kabiyeni mumone.”
15 E ico balikonkele abena Siria ukuyafika fye na ku Yordani, kabili mu nshila monse mwali ifya kufwala ne fipe ifyo abena Siria balepoosa ilyo balefulumuka. Kabili abaume abo imfumu yatumine balibwelele bashimikila ne mfumu ifyo bamwene.
16 Lyena abantu balifumine bayasenda ne fipe ifyali mu nkambi ya bena Siria. E ico abantu batampile ukushita galoni imo iya buunga bwapeleka pe shekele limo, kabili amagaloni yabili aya barle batampile ukuyashita pe shekele limo, nga filya fine Yehova alandile.+
17 Imfumu yalisalile umo pa bakalamba ba bashilika uo yacetekele uwa kuti aleangalila abalebombela pa mpongolo. Lelo abantu balimunyantawile pa mpongolo ica kuti alifwile, nga filya fine umuntu wa kwa Lesa wa cine alandile ilyo imfumu yaile kuli ena.
18 Filya fine umuntu wa kwa Lesa wa cine alandile ati: “Mailo nga ino ine nshita abantu bakalashita amagaloni yabili aya barle pe shekele limo, kabili bakalashita galoni imo iya buunga bwapeleka pe shekele limo pa mpongolo ya Samaria,”+ e fyo caishileba.
19 Lelo ilyo ifi fishilacitika, umo pa bakalamba ba bashilika aebele umuntu wa kwa Lesa wa cine ati: “Nangu fye Yehova engesula ifipunda fya mu muulu, bushe ifi kuti fyacitika?” Na o Elisha amwebele ati: “Ukaimwena ilyo fikalacitika, lelo tawakalyeko.”
20 Ifi fine e fyamucitikile, pantu abantu balimunyantawile pa mpongolo, ica kuti alifwile.
Amafutunoti
^ Muli galoni imo mwaleingila ifingengila mu cipe ca malita ukucilako panono pali 7. Moneni Ifyebo Fyalundwako pa B14.
^ Ishekele lyalefina ukucilako panono pa magramu 11. Moneni Ifyebo Fyalundwako pa B14.
^ Nelyo “maliketi.”
^ Nelyo “bapusushe imyeo yabo.”
^ Mu ciHebere, “ku ng’anda ya mfumu.”
