Ibuuku lya Bubili Ilya Ishamfumu 8:1-29
8 Elisha aebele umwanakashi uo abuushiishe umwana+ ati: “Iwe na ba mu ng’anda yobe kabiyeni ku calo cimbi uko mwingatemwa ukuyaikala, pantu Yehova nalanda ukuti akaleta icipowe,+ kabili cikapona mu calo pa myaka 7.”
2 E ico uyu mwanakashi alicitile ifyo umuntu wa kwa Lesa wa cine amwebele. Ena na ba mu ng’anda yakwe baileikala mu calo ca baPelishiti+ pa myaka 7.
3 Ilyo imyaka 7 yapwile, uyu mwanakashi alifumine ku calo ca baPelishiti abwelelamo ku mwabo, kabili ailepaapaata imfumu ukuti bamubweseshe ing’anda yakwe ne bala lyakwe.
4 Nomba imfumu yalelanda na Gehasi umubomfi wa muntu wa kwa Lesa wa cine aiti: “Nshimikilako ifipesha amano fyonse ifyo Elisha acita.”+
5 Ilyo aleshimikila imfumu ifyo Elisha abuushishe uwafwile,+ umwanakashi uo Elisha abuushiishe umwana, alishile ku mfumu mu kuipaapaata pa kuti bamubweseshe ing’anda yakwe ne bala lyakwe.+ Ilyo line Gehasi aebele imfumu ati: “Shikulu mwe mfumu, uyu e mwanakashi uo Elisha abuushiishe umwana kabili uyu e mwana wakwe uo abuushishe.”
6 E lyo imfumu yaebele uyu mwanakashi ukuti aishimikile ifyacitike kabili ali-ishimikiile. Lyena imfumu yaebele umo pa balebombela kwi sano aiti: “Mubwesesheni ifintu fyakwe fyonse ne fisabo fyonse ifya mwi bala lyakwe ukutula apo afumiine muno calo ukufika na lelo.”
7 Elisha aile ku Damaseke+ ilyo Ben-hadadi+ imfumu ya ku Siria alwele. E ico kwali abaebele imfumu abati: “Umuntu wa kwa Lesa wa cine+ naisa.”
8 E lyo imfumu yaebele Hasaele+ aiti: “Senda ubupe, uye ku muntu wa kwa Lesa wa cine.+ Uye umwebe anjipushisheko Yehova ati, ‘Bushe nkapola ubu ubulwele ndwele?’”
9 Hasaele alile mu kumona umuntu wa kwa Lesa wa cine, kabili asendele ubupe, e kutila ifisuma fyonse ifya mu Damaseke ifyo asendeele pa ngamila 40. Aileiminina pa ntanshi yakwe no kumweba ati: “Ben-hadadi umwana wenu kabili imfumu ya ku Siria antuma kuli imwe, aleipusha ati, ‘Bushe nkapola ubu bulwele ndwele?’”
10 Elisha amwaswike ati: “Kabiye umwebe auti, ‘Nangu cibe shani ukapola,’ lelo Yehova nananga ukuti ukufwa kwena akafwa.”+
11 Kabili alolekeshe Hasaele ica kuti aumfwa ne nsoni. Lyena umuntu wa kwa Lesa wa cine atendeke ukulila.
12 Hasaele amwipwishe ati: “Cinshi mulelilila mwe shikulu?” Na o amwaswike ati: “Ni co ninjishiba ifyo ukacita abena Israele.+ Ukoca amalinga yabo, ukepaya abaume babo aba maka ku lupanga, ukaputaula abana babo tupimfya tupimfya kabili ukalepula abanakashi babo abakaba na mafumo.”+
13 Hasaele alandile ati: “Bushe ine ne mubomfi wenu, ne mbwa fye, kuti nacita ica musango yu?” Lelo Elisha amwebele ati: “Yehova nananga ukuti iwe ukaba imfumu ya bena Siria.”+
14 Lyena alifumine apali Elisha, abwelelamo na kuli shikulu wakwe. Shikulu wakwe amwipwishe ati: “Finshi Elisha acikweba?” Na o amwaswike ati: “Acinjeba ati nangu cibe shani mukapola.”+
15 Lelo ubushiku bwakonkelepo, Hasaele abuulile ica kufimbana acitubika mu menshi e lyo amutitikisha na co pa menso,* mpaka afwa.+ Lyena Hasaele alimupyene pa bufumu.+
16 Mu mwaka walenga 5 ukutula apo Yehoramu+ umwana wa kwa Ahabu abelele imfumu ya Israele, ninshi Yehoshafati ni mfumu ya Yuda, e mo Yehoramu+ umwana wa kwa Yehoshafati imfumu ya Yuda aishileba imfumu mu Yuda mwine.
17 Atendeke ukuteka ninshi ali ne myaka 32, kabili atekele mu Yerusalemu pa myaka 8.
18 Alecita ifyabipa nga filya fine imfumu sha mu Israele+ shalecita, ifyo na ba mu ng’anda ya kwa Ahabu balecita,+ pantu aupile umwana wa kwa Ahabu;+ kabili alecita ifyabipa mu menso ya kwa Yehova.+
19 Lelo Yehova talefwaya ukulofya abaYuda pa mulandu wa kwa Davidi umubomfi wakwe,+ pantu alimulaile ukuti ena na bantu abali no kutuntuka muli ena ali no kubapeela inyali.+
20 Ilyo Yehoramu aleteka, abena Edomu bapondokele ubuteko bwa baYuda,+ kabili baisonteele imfumu.+
21 E ico Yehoramu asendele amaceleta yakwe yonse aya nayo ku Sairi. Aimine mu nshita ya bushiku kabili alicimfishe abena Edomu abamushingulwike na bakalamba ba bashilika abalenina pa maceleta; kabili abashilika bafulumukile ku matenti yabo.
22 Lelo Edomu alitwalilila ukupondokela Yuda ukufika na lelo. Pali ilya ine nshita e po na Libna+ apondokeele Yuda.
23 Kabili amalyashi yambi aya kwa Yehoramu na fyonse ifyo acitile, bushe tabafilemba mwi buuku lya malyashi ya mfumu sha mu Yuda?
24 Lyena Yehoramu alifwile nge fyafwile ifikolwe fyakwe, kabili bamushiikile uko bashiikile ifikolwe fyakwe mu Musumba wa kwa Davidi.+ Ahasia umwana wakwe+ e wamupyene pa bufumu.
25 Mu mwaka walenga 12 ukutula apo Yehoramu umwana wa kwa Ahabu uwali imfumu mu Israele atendekeele ukuteka, e mo Ahasia umwana wa kwa Yehoramu imfumu ya Yuda aishileba imfumu.+
26 Ahasia ali ne myaka 22 ilyo atendeke ukuteka, kabili atekele umwaka umo mu Yerusalemu. Nyina ali ni Atalia+ umwishikulu* wa kwa Omri imfumu+ ya mu Israele.
27 Alecita ifyabipa nge fyo aba mu ng’anda ya kwa Ahabu+ balecita kabili alecita ifyabipa mu menso ya kwa Yehova, nga filya fine aba mu ng’anda ya kwa Ahabu balecita, pantu ali ni lupwa wa ba mu ng’anda ya kwa Ahabu pa mulandu wa kuti e mo aupiile.+
28 E ico aile na Yehoramu umwana wa kwa Ahabu mu kulwa na Hasaele imfumu ya ku Siria mu Ramote-gileadi,+ lelo abena Siria balicenene Yehoramu.+
29 Lyena Imfumu Yehoramu yabwelelemo ku Yesreele+ pa kuti ipole ifilonda ifyo abena Siria baicenene ku Rama ilyo yalelwa na Hasaele imfumu ya Siria.+ Ahasia umwana wa kwa Yehoramu imfumu ya mu Yuda aile ku Yesreele mu kupempula Yehoramu umwana wa kwa Ahabu, pantu balimucenene.*
